Read Lelemi Agba 26 Bible Online

Agba 26 - Lelemi bible

Agba 26

¹Ɔbu ɔdi ulásiaku badɔlɔdi kalɛ kani na etubankɛ aláyu kaƒɛndi iye ɔnantu ɔna edula ɔƒɛwi.

²Kalɛ na lɛsɛɛmɛɛ liibó avwi na lɛkpaƒɛɛlɛ liiveyi taatɔlɔ ni, lɛni na si éwida ukyuli kekeeke, nsu útabla lɛla lɛdi na eewida ammɔ eeveyi taatɔlɔ-nwu kudɔ.

³Uƒiɔ na beeti taatina ɔpɔnkɔ kesii kani na ɔsia. Na kabuli na baakya ebuo ala utine kenye taani na batina-nwu kasiakɔ. Na ɔdɔlɔdi ni, kugyiimi na beebó-nwu kama.

⁴Si awɔ ku badɔlɔdi bɛɛkya unyeƒi ni, tedie bana kɔdɔlɔ ala ani beeye-ɔ kenye amu awɔ lɛnɔ adubɔbla ala kɔdɔlɔ kemmo aani bana kalɛ.

⁵Si awɔ ku badɔlɔdi bɛɛní lɛla lɛdi teenene ni, die bana ala ani na beeye-ɔ kenye na aya basɔ bakya bana kɔdɔlɔ kemmo.

⁶Si áƒɔ ɔdɔlɔdi ádi anii watásu kenye kalɛ na ásia-ka ni, ɔdi kɔdɔlɔ kakali kani nse aani kalɛ na ekulo awɔ ɔlati ɔgba edie iye ani kuvo kukpidi.

⁷Si ɔdɔlɔdi ɔnii uubó lɛgba ni, úlieku aani kalɛ na ɔgba uukpi ukyuli gbinigbini.

⁸Si émwi ɔdɔlɔdi na ákɔliku-nwu lɛnyi katɔ ni, use aani kalɛ na baabala lɛtabi taakya kavwinvwi kemmo kalɛ na lilálɛ.

⁹Ɔdɔlɔdi lɛgba bubo buse aani kalɛ na ntɛ ukpine ɔɔgyú liyu kagba taada kɔnu teeƒwimi.

¹⁰Ukyuli ɔni mbo kabla na úti-ka ɔ́kya ɔdɔlɔdi lɛkɔkɔ ni, use aani ukyuli ɔni muubó kataminta taakya kayaa lɛla lɛdi tanu tanu.

¹¹Kalɛ na akpewe ɔsɔ uuti nwuna kɔdala ni, lɛni na ɔdɔlɔdi ɔɔsɔ teenwini teesie nwuna kɔdɔlɔ ala bɔbla kudɔ.

¹²Badɔlɔdi lɛnunsia na ala lɛlɔ ni, ɔdia utulo bekyuli bani mɔɔkali ka báda anu, nsu bátada anu.

¹³Ɔkɔsɔne ubo kɔkwɛ pii kɔni na uuti taawia kuƒi teete lɛlɔ na ɔɔsu ɔnini, “Ɔƒɛni kalɛ gyata unye-mi ulu na ɔdubuƒie-mi si lɛ́lɛ lísie ntábla lɛla lɛdi. Sɔsɔ ngyi ka gyata ɔdi unye mmɔ!”

¹⁴Kalɛ na ɔpunu ɔɔlɛmi teesie teebo ni, lɛni na ɔkɔsɔne ɔɔtɛ nwuna atɛla lɛlɔ teebo teeminime.

¹⁵Kɔkɔsɔ kɔɔdi ɔkɔsɔne lɛlɔ geen ɔni na kalɛ na ɔmini adila ɔkya kenye muedi ɔɔda-nwu kɔkɔsɔ.

¹⁶Bakɔsɔne baanu lɛlɔ ka ama mmomu náda anu betulo banundane kasusu betine maatɛ.

¹⁷Si ákya ukyuli kɔtɛ kenye na aaagyi-ku lɛlɔ lɛla lɛdi ni, ɔdi kɔdɔlɔ ala bɔbla. Na use aani si áda akpewe ɔni na aaagyi kɔtu aaní.

¹⁸Kalɛ na si ubuokpine ɔda lɛtula lɛni mɔɔkana na liibile ala na ɔɔda liƒu ni,

¹⁹lɛni kani na si ukyuli ɔdi ɔ́nyi ɔkɔ ɔ́su nwuna ɔkpana lɛla lɛdi na ɔ́ƒɔ-ni ku kayi asa kama na ɔnini, “Bɔƒia kani na nda” ni, ubo liƒu.

²⁰Si ekyweni aakywí laa na ása ni, buni na ogya uuni. Lɛni kani na si kɔtɛ keeke kɔ́sa bɔtɛmi ni, kadɔ lɛnɔ kása.

²¹Ukyuli ɔni mɔɔyɔ́ kadɔ uuubo kekpo bɔkya aani kalɛ kani na ogya egyiiku akukudi eeebo ogya bɔƒɔ iye agyabi aayá na aƒɛ aaƒɔ́ ogya.

²²Ɔkɔ etemila ani nse aani lɛna wɛlɛ wɛlɛ ebo emini na anya mɔɔyu teduo ukyuli kayi kemmo.

²³Kɔtɛ kɔni baakya emini aabɛla kasusu kekpidi kani nkya ukyuli ɔdi kayi kemmo aani kalɛ baanwamana sika ugyiedi ntu taakwaa libui.

²⁴Bekyuli bani na bekyuli litemi lɛkya-ma kayi ni, uwi ɔdi baatina ka badia geen, nsu taƒɔ-ma tadi.

²⁵Ina ka bekyuli bamɛni baabla lɛlɔ aani bebo lɛƒɔndia ni, likpidi lɛ́ƒɔ-ma kayi kemmo tɛɛ.

²⁶Ina ka badubɔkya lɛkwɛ na babɛla lɛla lɛmmɔ ni, ɔdubo ubalɛ keyi na bekyuli ƒui banu.

²⁷Si ákywɛ ƒula ɔkpana kakpagyuɛ ni, awɔ ɔlati ndubo-ka kemmo bɔnu buduo. Na si éminime lɛtakpɛ bonwu lɛdi anii litásia bekyuli lɛlɔ ni, lɛdubɔsɔ linwini libasia-a.

²⁸Unyemi ɔni mɔɔnyi ɔkɔ taasia ukyuli ni, uláwia ukyuli ɔmmɔ bɔdia. Na katɔlɔ kaadú ukyuli.