Read Lelemi Agba 3 Bible Online

Agba 3 - Lelemi bible

Agba 3

¹Mina ubi, tayiƒala ala ani na lɛ́tina-a. Mmomu da mina ɔda bubo kya ƒula kayi kemmo.

²Ɔsika ɔmmɔ ndubɔya na elie ngba gyɔlɔɔ na ala adianku-ɔ na keyi kayɔku-ɔ.

³Tanyonu lɛƒɔndia bɔbla ku litemi kama bɔsiaku siin. Ti ala amɛni bo bala ƒula limɔ na aya na akɛ keliekɔ na ƒula kayi kemmo.

⁴Ɔmɛni ɔdubɔya na aƒɔ lɛnyi na adia na Unwoti ku bekyuli ƒui anumi.

⁵Ti ƒula anu ku kayi ƒui sia Unwoti lɛlɔ. Na teti anu tasia awɔ ɔlati ƒula ala kalɔ bunu lɛlɔ.

⁶Nu-nwu ti na ƒula lilu ƒui lɛlɔ, na ɔdubɔtɔnku-ɔ na ƒula kasiakɔ ƒui.

⁷Ƒula anumi atatɔlɔ-ɔ na anu lɛlɔ ɔnundane. Mmomu yia Unwoti na enwini kama akya likpidi.

⁸Ɔmɛni ɔdubɔya na akɛ ɔlɔkplu na ɔlɔna kemmo na lɛlɔ ekubi asa-a kpakplaa.

⁹Ti ƒula lɛkɛ teemwi Unwoti. Na eti ƒula edula biala ebi edeedi ete-nwu.

¹⁰Ɔdubɔya na ƒula linwu liyi ku edula abuni na akpambui lɛnɔ eyi ku ntɛ mini mini.

¹¹Mina ubi, teni si Unwoti ɔɔní-ɔ kɔtu ka ɔklibi-ɔ. Na utekpoku-ɔ si ɔɔdɔnku-ɔ lɛnɔ.

¹²Ɔsika bekyuli bani na Unwoti ɔɔyɔ́ ni, ama na ɔɔlɛ kpakplaa aani kalɛ na ubi ɔti ɔdi ɔɔní ubidi ɔni na ɔɔyɔ́ kɔtu.

¹³Lɛlɔ lɛdubɔyɔ ukyuli ɔni nákɛ lɛnunda na uunú ala kalɔ.

¹⁴Ɔsika ubo kɔsia utulo sika ɔƒualadi. Na nwuna lɛkɛ litulo sika ugyiedi.

¹⁵Lɛnunda lɛ́ƒɔ kuye litulo asɛɛ ebi ani náƒɔ kuye geen muedi. Na lɛla bamba lɛni na ukyuli ɔɔwia lɛdi lítaƒɔ kuye liiitulo ɔmɛni.

¹⁶Lɛnunda lɛdanku ngba gyɔlɔɔ na nwuna kɔdianu. Na nwuna kɔmiinu lɛnɔ kɔdanku lɛkɛ ku ɔbu.

¹⁷Nwuna lilu lɛdi kasiakɔ kabuni. Na lɛdi keyi buɛɛ lilu.

¹⁸Ngba kugyii ndi lɛnunda ute bani nda-nwu kpakplaa. Lɛlɔ lɛdubɔyɔ bani nébo enu báda-nwu.

¹⁹Lɛnunda na Unwoti úti ɔ́kya kalɔ kammɔ ɔka kalɔ. Na ala kalɔ bunu na úti údie katɔ ɔ́ƒala kayaa.

²⁰Na ɔkɛnku nwuna lɛlati lɛlɔ na úle ntu bonwu bɔmmɔ akpa akpa. Na ɔɔyá na liƒlukutu lɛnɔ lɛɛyu amii.

²¹Mina ubi, sia ala bɔnu taati anu ku etemila kemmo bɔƒuna kaduɛ na tada ɔdi tava.

²²Ɔsika ɔmmɔ ndi ƒula ngba. Na ɔdubunwini aani sika asɛɛ na ƒula limɔ ani ndubɔkya-a bɔdia.

²³Na adubusie ƒula ngba ulu kɔkɔɔkɔ. Na ƒula ɔgba uletulo iye agbanta.

²⁴Si áyu átɛ ni, liƒu biala lilada-a, mmomu adubɔlɛɛ na lɛlɛɛ lɛyu-ɔ.

²⁵Tayia ɔgbankpi ɔni muuyú bekyuli taatu iye ala ani muubieku balalane.

²⁶Ɔsika Unwoti lɛlɔ na ése kayi na anwu ndubudie-ɔ na alakya kakpagyuɛ kadi ɔgba.

²⁷Teni lɛbuni bɔbla bute ukyuli ɔni mɔɔwia-a kebunku si ánu ka ébo ɔyikun ɔmmɔ.

²⁸Tasu ƒula ukyulikpana anini, “Teesie, kɔnaadi na ebo abaƒɔ,” si lɛla lɛni na uuvele-ɔ lise-ɔ ɔmwi.

²⁹Awɔ ku ukyuli ɔdi bitasa lili likpidi na ƒula liku ɔkpana lɛlɔ, ka bilie bide ku ebiti.

³⁰Tada ƒula ɔkpana kenye kekeeke si útabla-a lɛla lɛdi.

³¹Anumi etegyie-ɔ na bekyuli bekpidi bani mɔɔkya lɛsɛ lɛlɔ. Na tasiaku bana ɔbladu kama.

³²Bekyuli bekpidi bammɔ ala eesé Unwoti lɛlɔ geen. Nsu bekyuli bani nse siin ni, ulábɛla-ma nwuna kasusu.

³³Unwoti uuwida bekyuli bekpidi kɔduli. Nsu nwuna kusɛ kusɛ ɔɔsiaku bekyuli bani nse siin.

³⁴Na ɔɔpii bekyuli bani mɔɔpii bekyuli ka baatalaku lɛlɔ katɔ ɔsu. Mmomu uubunku bani muuboku lɛlɔ kalɔ.

³⁵Banundane baakɛ́ ɔbu kese. Nsu badɔlɔdi ama ni, kɔƒa na beli bete.