Read Lelemi Agba 31 Bible Online

Agba 31 - Lelemi bible

Agba 31

¹Ala ani bɔdubo bunu mɛni ndi lɛsuse na Masa Ɔga Lemuel lɛlɔ lɛni na uni ɔ́tina-nwu.

²“O mina ubi, mina kaƒɔ ubi, ubi ɔni lɛlɔ na líse kenye,

³tebile ƒula ɔyikun na beleku lɛlɔ na ayila ƒula ɔlɔkplu na ama bani muubó baga muedi kalɔ lɛlɔ.

⁴“Lɛla lɛdi lɛkya na lɛɛɛdia liiite baga. Lemuel, ɔɔɔdia uuute baga ka bataani ntɛ. Útalɛka ntɛ butaada batɔnkune ɔkwɛ.

⁵Ɔsika si báni ntɛ ni, ɔƒɛni kalɛ badubɔyiƒala lɛla lɛni na ɔda bubo bɔmmɔ bɔɔtina na balakana litemi bɔtɛ budie bani na baanya taakya na bakɛ bana kuƒi kadikɔ.

⁶Nyonu ntɛ te bani néedu kaƒiɔtɔ kɔtu, ama mɔɔní ntɛ ku bani na kayi kaakpulu-ma geen.

⁷Ya na bekyuli bammɔ udu bani ntɛ na bayiƒala bana kɔwaba na basɔ beléteenyimo ala ani muukpóku-ma.

⁸“Nye bani naaakana bɔtɛmi kenye na atɛmi ete-ma. Na bawabane bani neeebo lɛla lɛdi bɔbla bakɛ bana kuƒi ƒaa.

⁹Geen ni, tɛmi na atɛ litemi na ulu siin lɛlɔ, na edie bawabane ku bani neeebo bebunkune.”

¹⁰Ɔma ndubɔkɛ uleku ɔbuni? Uleku ɔmmɔ udu ɔ́ƒɔ kuye utulo sika asɛɛ ani náƒɔ kuye geen.

¹¹Ɔgyani ɔdubuti nwuna anu ƒui ɔsia-nwu lɛlɔ. Na ɔnana ɔmmɔ ulayaki lɛla lɛbuni lɛdi.

¹²Ɔdubɔya na ɔgyani ɔkɛ lɛbuni na ulabla-nwu ukpidi ɔdi nwuna ngba uwi ƒui.

¹³Ɔɔƒuna bebuo linwini ku unwo ɔbuni na nwuna enu alanɔ ala budi uwi ɔdi.

¹⁴Use aani beyedine ɔkɔlɔ ɔni mɔɔsíku edula ɔgyu teeboku kaduli.

¹⁵Ɔɔta ɔtanta tutuutu uwi ɔni na kadi kátada tɔ na ɔɔbla lɛdila teete nwuna kaduli bekyuli, na uute nwuna kaduli kabla bablane belekubi bana limeyi kabla.

¹⁶Uusié taatávi taanu mmo na uye bɔni ndia. Na kɔsia bamba kɔni na ɔɔkɛ́ ni, uuti-ku teese kemo.

¹⁷Uusé nwuna kabla kalɔ ku ogya, na lɛlɔ lɛ́sa-nwu na ubo ɔlɔkplu ute nwuna kabla.

¹⁸Ɔɔsia nwuna kabla kani mete-nwu kɔsia anu kaduɛ. Na nwuna asogya uleni usien uwi ɔdi.

¹⁹Nwuna enu eeebo bɔnwuna na unwo bɔta lɛlɔ, na nwuna animi aatu kedetila uwi ndi uwi.

²⁰Ɔɔnu bawabane kɔnyana na bekyuli bani mɔɔyaki lɛla lɛdi ni, uute-ma ala.

²¹Liƒu liláda-nwu si kɔyɔ uwi ɔdubo, ɔsika ubo kɔyɔ adala ute nwuna kaduli bekyuli.

²²Uudí ala ani na ɔɔvá nwuna katɛnkɔ. Na ɔɔda lɛlɔ ku adi ani na áƒɔ kuye geen.

²³Bekyuli baabu ɔgyani kaduɛ na ɔma unengudi ɔmmɔ ɔban kenye kesii kani na baasa, ɔsika ɔdi ukyuli ɔni mɔɔkya kadi benengu kasusu bakyane akɔ.

²⁴Na ulekudi uudí lɛwu gyɔlɔɔ lɛbuni lɛni na bákya-ni bɔdia kaduɛ teeye ku lɛwu lidu lidu bamba teete beyedine lɛnɔ.

²⁵Si ánu uleku ɔmmɔ ni, aanu ka ubo ɔbu ku ɔyikun. Ɔƒɛni si ɔɔmá ni, aatí ka liƒu lɛdi liiibo-nwu lɛlɔ kemmo na uwi ɔni mebo lɛlɔ.

²⁶Ɔɔtɛmi lɛnunda etemila, na ɔɔlɛ ukyuli ku lɛƒɔndia na ulu geen ɔmmɔ lɛlɔ.

²⁷Na ɔɔsia lɛla biala mɔɔlɛ́ na nwuna kaduli anu kaduɛ, na ulákya enu lɛgba akɔ taakɛ nwuna lɛdila.

²⁸Nwuna bebi baalɔ-nwu lɛnyi teete kusɛ kusɛ. Lɛni kani na ɔgyani ɔɔtɛmi-nwu lɛlɔ kɔtɛ na uumwi-nwu ɔnini,

²⁹“Beleku babuni bakya kayawi na baada kaduli, nsu awɔ ƒula udu ɔɔɔbɔ!”

³⁰Ala ani mɔɔda kayi aatɔ́lɔ ukyuli. Na uleku bɔdia bɔnu bulétu uwi. Nsu uleku ɔni mɔɔyia Unwoti ni, ɔlɛka bemwi-nwu.

³¹Ƒɔ uleku ɔmmɔ udu kayu na ala ani na ɔ́bla kenye. Na nwuna kabla alati kebo-nwu kudu na ɔma bekyuli ƒui akɔ.