Read Lelemi Agba 5 Bible Online

Agba 5 - Lelemi bible

Agba 5

¹Ubi, nu mina lɛnunda etemila kaduɛ. Na enu-mi lɛlati etemila ani mɔɔsu-ɔ.

²Mmɔ na adubɔtɛya kalɛ na baabla ala ulu lɛlɔ, na ƒula enyekuli aklibi lɛlati ala ese lɛlɔ.

³Uleku ɔsɔnɔ ɔdine ni, nwuna enyekuli aatɛmi ala mini mini aani uwɔ. Na etemila ani mɔɔlɛ́-nwu kenye aayu kayi buɛɛ aani nnɔmii.

⁴Nsu lɛla lɛni mɔɔsia kama teebo lɛɛyu ɔdu kati kati na use yayaaya aani kewii kani bádɔ-ka lɛvi inyɔ.

⁵Kekpine ulu na nwuna lɛgba lɛtɔ lísela. Na kaƒiɔtɔ kemmo kani na ɔdubo buduo.

⁶Ɔsika ɔɔɔda ngba lɛda munu munu. Lilu gonti lɛlɔ kani na ɔkɛ úsela na anwu ɔlati ɔɔɔgyi.

⁷Ɔƒaani ni, mina bebi, bise atu na binu. Na lɛla lɛni na ndubo-mii bɔsu mɛni ni, ɔdi utedeyi utesie kesii bamba.

⁸Sia ulu ɔni nse sɛsɛɛ na ɔ́gyunku uleku ɔmɛni udu kakyakɔ. Na tani tede nwuna ɔtɔ kayakun,

⁹si ɔɔɔdi lɛni ni, adubɔda ƒula ɔyikun ala abuni ƒui ewi bekyuli bamba. Na ɔlalane ɔdi enu kemmo na ƒula ngba bɔdubɔwɔlɔ.

¹⁰Na baƒɔ ndubo ƒula lɛkɛ bɔƒɔ bunwini bana lɛdi. Na ƒula lɛbibo ƒui ebi enwini bekyuli bamba kaduli lɛkɛ kese.

¹¹Na ɔmɛni ƒui kama ni, ɔlɛ kemmo na adubo bɔtɛ buteedumo uwi ɔni na éesusu ƒula ɔlɔna ku ɔlɔgyii ɔmmɔ ébile áwɔlɔ.

¹²Mmɔ na awɔ ɔlati adubɔsu lɛlɔ anini, “Ńtenu bɔlɛ! Na líni na mina kayi kemmo ka lɛƒɔ bɔklibi bɔni na baaklibi-mi.

¹³Ńtadi mina ala batinane litemi lɛlɔ. Na ńtaƒɔ bekyuli bani mɔɔtina-mi ulu buni bɔlɛ.

¹⁴Líibo ḿbedu ubu kɔtu kesii kani na mina ngba bɔyii udu ƒui, na kadi bekyuli ƒui anumi.”

¹⁵Du ntu na awɔ ɔlati ƒula libiɔ kemmo ni, ntu buni bɔni mɔɔgbá taasi ƒula libiɔ kemmo.

¹⁶Bɔda na aada ƒula libiɔ ntu buni ese na buyi bɔgba butéwi lilu lɛlɔ? Na aya na ƒula ntukpa buni ntu bamamba bɔgba butéwi ɔma kemmo kadi ƒui kasakɔ?

¹⁷Ya na ala amɛni ƒui ese ete awɔ lɛti kani. Na tele-nya tete baƒɔ.

¹⁸Ya na ƒ'ulekudi unwini libiɔ lɛni ndanku kusɛ kusɛ. Na lɛlɔ lɛyɔ-ɔ na uleku ɔni ndi-ɔ lɛkloƒu uwi uleku ɔni na éti mmɔ lɛlɔ.

¹⁹Use aani akwa ubi ɔkɔdi ɔni mɔɔdia bɔnu ku lɛlɔyɔ. Ya na nwuna anyii ani nlɛ-nwu kayi emo-ɔ uwi ndi uwi. Na nwuna bɔyɔ butaada-a kayi uwi ƒui.

²⁰Mina ubi, bi ɔsu na ɔyalɛ mmomu ala na ɔlɛka ada-a kayi, na ataaƒuƒuɛ ukyuli bamba uleku anyii?

²¹Ɔsika Unwoti ɔɔnu ukyuli biala lɛla lɛni na ɔɔbla, na ɔɔkɔ́ku nwuna kasiakɔ biala taanu.

²²Ukyuli ukpidi ni, nwuna ekpidi lɛlɔ na baasia teeƒie-nwu. Na nwuna ablala muunwíni kɔbuli kɔni muudie-nwu.

²³Na nwuna lɛlɔ lɛlɔ takana bɔdi ɔsu na ɔdubo bukpi. Na nwuna kɔdɔlɔ pii ɔsu na ɔdubo bɔyii.