Read Lelemi Agba 6 Bible Online

Agba 6 - Lelemi bible

Agba 6

¹Mina ubi, si ákya ɔku ɔdi kɔnu éte ƒula ɔkpana iye enye-nwu kama na nwuna kayu kadi ɔsu, nsu aaagyi-nwu kaduɛ,

²iye si ényimi lɛlɔ ku linyese lɛdi na ánu áti ka ábala lɛlɔ na lɛla lɛni na ásu ɔsu ni,

³babla na awia ulu na edie lɛlɔ! Use aani ka éti lɛlɔ ése ɔkpa éte-nwu. Anwuɔsu sie-nwu kudɔ na etéboku lɛlɔ kalɔ na evele ƒula ɔkpana ɔmmɔ kpakplaa!

⁴Tatɛ litemi lɛmmɔ lɛlɔ talɛɛ na lɛlɛɛ biala litasia-a anumi.

⁵Keli ɔgbankpi aani kalɛ na akwa uukeli ɔgbini iye aasɛ uukeli kakpagyuɛ kani na bákywɛ-nwu.

⁶Amii bakɔsɔne bɛnu balalɛ na bɛtɛya lɛla. Bɛnu bana ablala na bɛda anu!

⁷Beeebo ukyuli ɔni muudie lɛdi taasu-ma lɛla lɛni babla, na beeebo ukyuli ɔni mɔɔví taanu-ma lɛlɔ iye lɛlɔ ɔdine ɔdi.

⁸Nsu baaklibi edula buse kaƒɛndi uwi, na baasála-nya na edula ɔƒɛwi.

⁹Na amii bakɔsɔne ni, uwi ɛlɛ sɔɔn na bɛdubɔtɛ butaalɛɛ butédu? Na uwi ɔmani na bɛdubɔta bina kalɛɛkɔ?

¹⁰Si ánu ka átɛ ávili, iye eli aalɛɛ teesie taasɔ, iye eti enu ényimi kayi eli aanwuna ukpludi ni,

¹¹kɔwaba kɔdubo-ɔ buyu bɔtu aani uyune kalɛ. Na ayaki adubo-ɔ bukpoku aani kekpo ukpone kalɛ.

¹²Ukyuli ukpidi ku ɔlalane ni, bɔkɛ kani na ɔɔkɛ taavi uwi ƒui ku ɔkɔ etemila.

¹³Anumi na baamana bekyuli. Na lɛgba na baata ala taasia kalɔ teeti taatina bekyuli ala. Na animi na beedie kayaa teeti taatɛmi.

¹⁴Bana kayi kemmo kasusu kekpidi kaayá na likpidi kɔkwɛ kani na baakya. Na baakya lɛsɛ uwi ndi uwi.

¹⁵Nsu ɔgbankpi ɔdubɔsiaku-ma kɔnakunwi. Na badubɔyii udu ɔni na baaagyi beeese, na kakwɛ kadi keeebo.

¹⁶Alakpa aku adi akya na Unwoti ukisi geen. Na maatɛ adi eesé-nwu lɛlɔ,

¹⁷ɔnusɛ ukpidi ukyuli bɔnu, ku unyemi ɔni mɔɔnyi ɔkɔ, ku enu ani mɔɔta pla pla taadu bekyuli bani nátabla lɛla lɛdi,

¹⁸ku kayi kani muulie taakya likpidi kakwɛ, ku lɛgba lɛni mɔɔta pla pla na likpidi lɛlɔ,

¹⁹ɔkɔ kenye litemi bediene bani mɔɔnyi ɔkɔ taaka ala. Ukyuli ɔni mɔɔkya bekyuli ntɛ taabla ala ani na ubile banwani ntɛ.

²⁰Mina ubi, da ami ƒ'ɔti ɔda bubo kaduɛ, na teni ala ani na ƒ'ini ɔɔtina-a.

²¹Bo-nya da ƒula kayi lɛlɔ uwi ƒui. Na ebo-nya ada ƒula limɔ.

²²Na ala ammɔ adubɔtina-a ulu kesi kesii na akɛ. Si atɛ alɛɛ ni, adubɔgyumana-a. Na si áta katɛnkɔ ni, adubɔtɛmiku-ɔ.

²³Ɔsika ɔda bubo bɔmɛni bɔdi asogya, na ala bɔtina bɔmɛni bɔdi-ɔ bukeye. Na kalɛ na etemila amɛni aaklibi-ɔ na ati lɛlɔ bɔda ni, adi ulu ɔni lɛlɔ na adubɔsia na akɛ ngba.

²⁴Ɔdubɔda-a udie uleku ɔyalɛ enu kemmo ku uleku ɔsɔnɔdine kenyemini etemila kudɔ.

²⁵Ƒula kayi ketenwini katasia nwuna bɔdia lɛlɔ na ɔda-a limɔ. Taya na uti nwuna anumi ani na uusé ɔtɔlɔ-ɔ na uƒu-ɔ kasusu.

²⁶Ɔsika ɔyalɛ ɔdubɔyila-a udu butédu ƒula limeyi bodobodo muedi. Na ngba bumodi bɔmmɔ geen na uleku ɔsɔnɔdine ɔɔtú-ɔ uƒie aani eƒiebuo.

²⁷Si ukyuli édie ogya ku agyabi ásia lɛlɔ ni, webulo-ɔ bɔkyula ku ƒula adala?

²⁸Na si ésie ávi ogya ku agyabi lɛlɔ ni, lɛgba lɛdubo bubulo-ɔ bɔnani?

²⁹Lɛni geen na use ute ukyuli ɔni matɛ nwuna ɔkpana ulekudi kudɔ. Na ukyuli ɔni makya ɔkpana uleku kɔgbu ni, badubɔni-nwu kɔtu.

³⁰Bekyuli beleni uyune si úyu ɔsika kɔka mɔɔdú-nwu ɔsu na úyu ɔnii ɔɔdi umo.

³¹Nsu si béƒie-nwu ni, ɔdubɔƒɔ eyula ammɔ kayu akpa maatɛ ina nwuna ɔtɔ kemmo ala ƒui na ɔdi ka uti uye asa waƒɔ kayu kammɔ.

³²Na ɔnana ɔni nádi kɔsɔnɔ ni, ɔdɔlɔdi geen na ɔdi, ɔsika ɔɔyila nwuna lɛlɔ udu ƒui.

³³Anwu ku alɛlɛbi ku kɔƒa. Na kɔƒa kɔmmɔ kulása-nwu lɛlɔ kudii.

³⁴Ɔsika uleku ɔmmɔ ɔgyani kogyulo kɔdubɔya na kɔnyi kutaakɔ-nwu. Anwuɔsu ɔɔɔdubo kɔnyana bɔnu si uudie-nwu kasi.

³⁵Na kɔnu bɔsia ku etela biala aaadubo-nwu kaƒɔ bɔyɔ si ina dɛ na etela ammɔ emomo.