Read Lelemi Agba 8 Bible Online

Agba 8 - Lelemi bible

Agba 8

¹Ɔɔɔdi bɔkpali na lɛnunda lɛda bekyuli? Na ɔɔɔdi ala kalɔ bunu muubó kudu momoomo mmɔ?

²Unye lilu lɛlɔ na kesii kani nákuku ƒui. Na uudí teenye elukpo ƒui lɛlɔ.

³Unye lɛban lɛni ƒui na baasia teeduo ɔma unengudi ɔmmɔ kemmo kenye na ɔɔkɔ́ lɛsa na kɔyakun kɔmmɔ ƒui ɔnini,

⁴“O amii bekyuli na mɔɔkpali. Amii kadi ƒui bekyuli na mɔɔtalaku lɛdi katɔ kalɛ na binu.

⁵Bina kasusu kásɔ bibo na lite-mii lɛnunda. Bɛ́dɔlɔ bibo na lite-mii ala kalɔ bunu.

⁶Bise atu na binu! Ɔsika ndanku ala abuni geen na ndubo-mii bɔsu. Ala ani ndi ulu na muubimi mina kenye taatɛmi.

⁷Na lɛla lɛni ndi litemi geen lɛmmɔ na mina kenye kaasu. Na mina enyekuli ekisi ulikplu ala.

⁸Mina kenye etemila adi etemila geen. Na lɛla biala líteƒu lítakya iye lɛbla gontii na etemila ammɔ kemmo.

⁹Mina etemila ese nwaa ete ukyuli ɔni muunú ala kalɔ. Na bani na bagyi lɛla badubɔnu ka bɔƒiɔ bɔdi buuubo-nya kemmo.

¹⁰Ƒuna mina ala bɔtina utulo sika ɔƒualadi. Na aƒuna lɛlati etulo sika ugyiedi.

¹¹Ɔsika lɛnunda lɛ́ƒɔ kuye litulo sika asɛɛ ani náƒɔ kuye geen. Na lɛla lɛdi liiibo na ukyuli ɔɔwia na kalɔ kamɛni lɛlɔ na bakana-ni buti bɔkɔku lɛnunda.

¹²“Ami ndi lɛnunda, na nli na unwi bɔbla kemmo ku litemi bɔtɛ na ulu geen ɔmmɔ lɛlɔ. Mbo lɛlati ku ala kemmo bɔnu taati.

¹³Unwoti bɔyia ndi likpidi bukisi. Nkisi lɛlɔ katɔ bɔtalaku ku bekyuli lɛlɔ bɔta teenye. Na nkisi likyulikpi ala bɔbla ku enyekpi bɔtɛmi.

¹⁴Ami mɔɔlɛ ukyuli na mɔɔtɛ etemila siin. Ami mbo ɔyikun na muunú ala kemmo nwaa.

¹⁵Mina lɛlɔ na baga baasia taadi bekyuli lɛlɔ. Na lɛlɔ badine beeti ɔda bubo bɔbuni teete bekyuli.

¹⁶Ɔkɛnku-mi lɛlɔ na bagadine baadi bekyuli lɛlɔ ku babune bani mɔɔtɔnku bekyuli ulu lɛlɔ siin.

¹⁷“Bekyuli bani ƒui mɔɔyɔ́-mi ni, ami lɛnɔ mɔɔyɔ́-ma. Na bani mɔɔwia-mi kama ulu baanu-mi.

¹⁸Mina kudɔ na lɛkɛ ku ɔbu ɔɔsí. Na ɔdi lɛkɛ lɛni muutu uwi na ala aatɛku ukyuli.

¹⁹Na ala ani muute mmɔ eekeye teetulo sika ugyiedi. Na kayu kani mɔɔƒɔ bekyuli ɔdia utulo sika ɔƒualadi buni ƒui.

²⁰Ulu ɔni nse siin lɛlɔ na mɔɔsia, na mɔɔbla ala ulu lɛlɔ.

²¹Bekyuli bani ƒui mɔɔyɔ́-mi ni, lɛkɛ na muusé-ma kama, na muuyile bana egulabi kɔvumi.

²²“Ami na Unwoti ɔdanku asa na ɔdubuse kalɔ ku lɛla biala budie ku kuuku ala ani ƒui nákya.

²³Únyene-mi mina kenyekɔ asa na lɛla biala lɛdubuse kalɔ. Na nli asa na ɔdubudie kayawi.

²⁴Báawɔ-mi asa na Unwoti údie ɛpu, na nli uwi ɔni na abiɔ ku ntukpa ƒui bútebo tɔ.

²⁵Asa na abi adubɔkɛ kenyekɔ na abinkpo akɔ alɛ ni, báawɔ-mi kukuuku.

²⁶Asa na Unwoti wedie kalɔ kamɛni ku egyii ku livo iye lɛti lɛni lɛlɔ na ákwɛ enye ni, nkya kukuuku.

²⁷“Nnye mɔɔnu asa na údie kayaa na ɔ́bla-ka aani ligegu útébi ɛpu lɛlɔ.

²⁸Na nnye mɔɔnu asa na ɔ́bla ulɔyɔ ɔ́ƒala kayaa ku uwi ɔni na ɔ́bla ntukpa bonwu bɔni nágyu voo mmɔ ɔ́kya kalɔ lɛlɔ.

²⁹Na mɔɔnu asa na ɔ́sia kalɔ ubili aani ɔmii úte ɛpu ɔmmɔ ƒui kalɛ na uleyi ulavia mmɔ. Na kalɛ na úse kalɔ kammɔ ɔka kalɔ ni, nnye mɔɔnu.

³⁰Geen ni, ami ndi-nwu kabla kammɔ kakwɛ ɔkyane na nwuna kɔmadɔ. Na mɔɔkɛ́ ebiti limeyi ndi limeyi na lɛlɔ lɛɛyɔ́-mi na nwuna anumi uwi ndi uwi.

³¹Na ami lɛnɔ ni, lɛlɔ lɛ́yɔ-mi na kayawi kammɔ ƒui ɔsu na ebiti áƒɔ-mi lɛlɔ kemmo ƒui na kadi ƒui bekyuli bammɔ lɛlɔ.

³²“Ɔmɛni ɔsu ni, mina bebi, binu-mi litemi, ɔsika lɛlɔ lɛdubɔyɔ bekyuli bani ƒui mɔɔsia-mi kasiakɔ.

³³Binu mina ala bɔtina na bɛda anu na biteni-mu.

³⁴“Lɛlɔ lɛdubɔyɔ bekyuli bani muunú-mi litemi na baanu-mi ulu limeyi ndi limeyi na benye bagya-mi na mina kayakun kenye.

³⁵Ɔsika ukyuli biala nánu-mi ɔti ni, ɔ́kɛ ngba, na nwuna lɛlɔ lɛdubɔda Unwoti ebiti.

³⁶Nsu bekyuli bani na báyii ulu na bátanu-mi ni, bábla lɛlɔ kalala. Na bani muukisi-mi ni, bati ka kukpi na baayɔ́.”