Read Lelemi Agba 9 Bible Online

Agba 9 - Lelemi bible

Agba 9

¹Lɛnunda lɛ́tu ɔtɔ, na nwuna kemmo kéwi. Na ɔtɔ ntɛ akpa maatɛ ada-nwu.

²Ɔ́nwa adila na úse kadikɔ bonwu ku ntɛ lidu lidu úse ka bekyuli babadi.

³Na ɔ́tala nwuna kabla bablane ka batálɔ bekyuli ƒui bavi na bebo. Unye kesii kani nákuku na ɔɔnu ɔma unengudi ɔmmɔ ƒui.

⁴Mmɔ na ɔ́kpali ɔ́su bani na bana kasusu kásɔ na baaagyi bana kɔmii iye kɔdianu ɔnini,

⁵“Bibo na bibadi mina adila na bɛni mina ntɛ bɔni na lɛ́sala líse.

⁶Na bɛda bina adɔlɔla bɔbla bɛya na bise kalɔ ku ngba geen bulie na bɛda anu lɛnɔ.”

⁷Awɔ ɔni madɔnku ukyuli ɔni na bekyuli anyikpi kani na ɔɔlɔ ni, kenye na ɔdubo-ɔ bɔtu. Na ukyuli ɔni madɔnku ukyuli ukpidi ni, kalala na ɔdubo-ɔ bɔbla.

⁸Anwuɔsu tekpoku lɛlɔ ka adɔnku ukyuli ɔmmɔ udu. Si ɔɔɔdi lɛni ni, badubo-ɔ bukisi. Nsu si ádɔnku banundane ama ni, badubo-ɔ bɔyɔ bubu.

⁹Tina banundane ala na badubɔda anu bebu. Na atina ama bani nlie siin ala na badubɔti ala bebu.

¹⁰Si aayia Unwoti ni, ese kalɔ aadá anu. Na si ánu Unwoti Kedee ɔmmɔ áti ni, agyi anii ése kalɔ adubo lɛla bɔti.

¹¹Lɛnunda lɛdubɔya na ƒula emeyi emomo ebu. Na akwa asia-a akwa lɛlɔ.

¹²Na si áda anu ni, awɔ ndubɔkɛ kɔsia. Na si apii lɛnunda ni, awɔ ndubo abi bubo.

¹³Uleku ɔni básia lɛnyi banii Kɔdɔlɔ ni, ubo lɛsɛ na uláƒalɛ. Ɔɔɔgyi lɛla lɛdi, nsu anwu ɔlati ɔɔɔgyi lɛni.

¹⁴Uulie nwuna kayakun na kesii kani náta kákɔ, na ɔɔnu ɔma unengudi ɔmmɔ taamana.

¹⁵Ɔɔkpali banana bani nkɛ bésela bana kabla kadi akɔ unwi unwi teemene ɔnini,

¹⁶“Bo-mi kudɔ na abanu lɛla lɛdi na mina kaduli!” Na bani neeebo kasusu ni, ɔɔsu-ma ɔnini,

¹⁷“Ntu bɔni na éyu kesii kadi áni ni, amu mɔɔyu kayi geen. Na adila ani na ábɛ átádi ni, anya mɔɔyu emini geen!”

¹⁸Nsu ɔmɛni ƒui ni, banana bammɔ baaagyi ka bana bani na uleku ɔmɛni ɔ́ɔka bɔkpali lɛni na bésie ni, kaƒiɔtɔ kemmo na bátáwɔlɔ.