Read Lelemi Etemila 12 Bible Online

Etemila 12 - Lelemi bible

Etemila 12

¹Taakali ƒula udiene lɛlɔ taanu uwi biala na ƒula lɛkloƒu uwi! Ɔsika uwi ɔdubo ɔni na kayawi ala adubukpi-ɔ ɔkwɛ na etila ani nsia-a lɛlɔ ɔsu.

²Uwi ɔdubo ɔni na ɔƒɛ ku kɔbuli ku ayabi bukeye ƒui bɔdubɔbla-a suu. Na kayaa kadubɔbla-a aani ɔnantu kadi na ƒula eli.

³Ƒula lɛlɔ ekpo adubɔyɔ na abla kpɛtɛ kpɛtɛ. Na ƒula kenye anyi ese kalɔ atayii udu. Na ƒula anumi asɔ alanu nwaa.

⁴Ƒula atu asɔ aaadubo buteenu kaduɛ na ina kukɔ mɔɔkɔ́ ala muedi asɔ elénu. Nsu aasɛ ɔnu budie muedi bɔdubɔya na ekeyi lɛlɔ agyinya.

⁵Adubo butaayia ina lɛbinkpo na aakɔ́ iye bɔyu na ada ulu ɔni nénwini ɔ́yu. Ƒula lili linwini lɛdubɔta lɛƒuala aani kɔdingyii anwula ƒuala ƒuala. Na adubɔkɛ ataakpɛ lɛgba kalɔ aani kɔɔgyu kɔni náabi na ɔɔyɔ́ ɔvumana livuo. Bula ƒui bɔdubɔsɔ bunwini busie bula kasikɔ na bekyuli bani muuwulo-bu baƒɔ lɛblɔnu lɛmmɔ ƒui lɛlɔ.

⁶Nyimo ƒula Udiene asa na lɛkun lɛni nda-a aani ɔkun mmɔ ukulo iye sika ugyiedi lɛkyami lɛni náƒɔ-ɔ kuye mmɔ lɛbwɛ, iye ƒula ketubui kabwɛ iye ɔbuli ɔni na eeti taani ntu taalɛku libiɔ kemmo mmɔ ukulo.

⁷Lɛni na bula ɔlɔna ɔɔsɔ teenwini teesie kalɔ kemmo na ɔƒɛƒɛɛ ɔni nkya-bu lɛlɔ kemmo uute-bu ngba mmɔ ɔsɔ uunwíni teesie Katɔti kudɔ.

⁸Ami lɛ́ɛnu lɛ́ti ka lɛla lɛdi liiibo kalɔ bunu bɔdi.

⁹Ndi ala ɔtinane ɔni muunú ala kalɔ geen na lɛ́da anu na lɛ́sala agba adi na líduo mu kemmo kaduɛ.

¹⁰Ɔmmɔ kama lɛ́kya ɔkplu na lídie-mu kalɔ pɛpɛɛpɛ kalɛ na ɔ́manku.

¹¹Lɛnunda etemila ese aani ugyii ɔni na umonsene uuti taakpanku nwuna bebuo. Asugba amɛni ási Katɔti ɔlati kudɔ na ese kɔbuɛlɛ ani na beeti taakana ligyii taadanku lɛlɔ.

¹²Ubi, mɔɔlɛ-ɔ kpakplaa nnii die ala bɔtina bamba biala atu na eti bɔmɛni kani. Lɛku liiibo kawɔlɔkɔ. Na ala ƒui bulie taatɛya lɛnɔ ɔɔyá na ukyuli ɔɔyii udu.

¹³Ala ani ƒui na bátina-a ni, akana na asala-nya akya etemila klo klo amɛni kemmo anini, “Di Katɔti litemi lɛlɔ na abu-nwu. Lɛla lɛni ƒui na ngba bumodi bɔmmɔ bɔdanku kani na lɛdi mmɔ.”

¹⁴Katɔti ɔdubɔtɛku-bu litemi na lɛla biala na ukyuli ɔ́bla lɛlɔ ina bɔbɛ na ábɛ ábla-nya na adi likpidi iye lɛbuni.