Read Lelemi Etemila 3 Bible Online

Etemila 3 - Lelemi bible

Etemila 3

¹Lɛla biala libo nina uwi na kabla biala lɛnɔ kebo kana uwi.

²Uwi ɔni na bawɔ ubi ɔkya, na uwi ɔni na ukyuli ukpi lɛnɔ ɔkya. Edula ɔkyawi ɔkya, na ana ɔƒɛwi lɛnɔ ɔkya.

³Uwi ɔni baadú lɛla lɛdi ɔkya, na uwi ɔni na baabwi lɛnɔ ɔkya. Na uwi ɔni na baabwɛ lɛnɔ ɔkya, na uwi ɔni na baatú lɛnɔ ɔkya.

⁴Uwi ɔni na beewulo ɔkya, na uwi ɔni na baamá lɛnɔ ɔkya. Na uwi ɔni na beewulo kɔnyana ɔkya, na uwi ɔni na baatɔ́ lɛnɔ ɔkya.

⁵Uwi ɔni na beegyingya atabi ɔkya, na uwi ɔni na baasála-nya lɛnɔ ɔkya. Na uwi ɔni na baakya lɛlɔ kɔgbu ɔkya, na uwi ɔni na beegyingyaku lɛlɔ lɛnɔ ɔkya.

⁶Uwi ɔni na baawia lɛla lɛdi ɔkya, na uwi ɔni beedie-ni atu lɛnɔ ɔkya. Na uwi ɔni na baada lɛla teese lɛlɔ ɔkya, na uwi ɔni na beevakun-ni lɛnɔ ɔkya.

⁷Uwi ɔni na baaní lɛla taabwɛ ɔkya, na uwi ɔni na baaka-ni taasala lɛnɔ ɔkya. Na uwi ɔni na beebile kenye kpoo ɔkya, na uwi ɔni na baatɛmi lɛnɔ ɔkya.

⁸Uwi ɔni na baayɔ́ lɛlɔ ɔkya, na uwi ɔni na beekisi lɛlɔ lɛnɔ ɔkya. Na uwi ɔni na beekpó kekpo ɔkya, na uwi ɔni na beewi kenye ntu taabla unwi lɛnɔ ɔkya.

⁹Bi kɔsia na ukyuli ɔni na unye nwuna kabla lɛlɔ ɔɔkɛ́ taasiku nwuna lɛlɔ bususu kemmo?

¹⁰Lɛ́nu etila ani na Katɔti úti ɔ́sia bekyuli lili.

¹¹Katɔti ɔɔyá na lɛla biala lɛɛlɛ́ na uwi lɛlɔ pɛpɛɛpɛ. Nsu bula ɔdi biala ulenu ala ani ƒui na ɔ́bla kalɔ taawɔlɔ geen. Na ɔɔyá na bula kasusu keekpóku-bu, na buuye lɛlɔ ala ɔ́siku ala ani na Katɔti ɔ́bla, ɔ́si uwi ɔni náavi úti úsela uwi ɔni ndubo lɛlɔ.

¹²Anwuɔsu lɛla lɛbuni ƒui lɛni na ɔlɛka bɔbla ndi ka ɔdi biala unye nwuna kabla lɛlɔ ku kubiti, na utaabla lɛbuni na nwuna ngba kemmo.

¹³Ɔsika lɛla lɛni na Katɔti úte-bu ndi ka bunye bula kabla lɛlɔ na bɔkɛ adila bɔdi, na bɔni, na lɛlɔ lɛyɔ-bu.

¹⁴Ngyi nwaa ka lɛla lɛni na Katɔti ɔ́bla ni, ani kani ndubo bunye uwi ƒui. Na ɔdi ulakana lɛla lɛdi buti bubunku iye ɔda ɔdi udie. Na Katɔti ɔ́bla ɔmɛni kalɛ na bekyuli beti ɔbu ku bɔyia bete-nwu.

¹⁵Ala ani ƒui mɔɔlɛ́ ɔƒɛni ni, áalɛ ábavi. Na ani ndubo abálɛ lɛnɔ áakya dii. Katɔti ɔɔyá na ala ani náalɛ dii aasɔ teebo taabalɛ.

¹⁶Na lɛ́nu lɛla bamba lɛnɔ ka na kesi kesii. Kekpo ku ala tabla ulu lɛlɔ siin kani nkya na lɛbuni kenye mmomu.

¹⁷Anwuɔsu mina kasusu kátina-mi ka Katɔti ɔdubɔtɛku bekyuli babuni ku bekpidi ƒui litemi, ɔsika uwi ɔdubo ute lɛla biala na ukyuli ɔ́bla na kesii biala.

¹⁸Na lɛ́nu lɛ́ti ka bɔkɔku na Katɔti ɔɔkɔ́ku abu bekyuli bayawine ƒui taanu na bɔnu bɔti ka bútavumanaku bebuo.

¹⁹Ukyuli ngba bulie ku nwuna kawɔlɔkɔ kátavumanaku ebuo ɔdi. Ɔƒɛƒɛɛ unwi na bɔɔnwuna aani bana kalɛ. Anwuɔsu ukyuli uuubo kenyekɔ kadi na kadia ketulo ebuo kadi.

²⁰Ala ani na Katɔti údie na ebo ngba ni, likpo linwi na bana ƒui baasɔ teenwini teesie. Ɔsika lɛti kemmo na bédie bula ƒui bálɛku na lɛti kani na bɔdubɔsɔ bunwini.

²¹Ɔma geen ngyi si ukyuli kɔyu aku katɔ na kɔɔkɔ́ teesie, na ebuo kɔyu aku kalɔ kemmo na kɔɔyu teeduo?

²²Anwuɔsu lɛla bamba lɛdi liiibo liiite ukyuli uuutulo ka lɛlɔ lɛyɔ-nwu na nwuna kabla lɛlɔ, ɔsika ɔɔɔdubo lɛla lɛni malɛ bɔti na nwuna kama.