Read Lelemi Etemila 4 Bible Online

Etemila 4 - Lelemi bible

Etemila 4

¹Lɛ́nu lɛla bamba lɛnɔ lɛ́ka lɛ́mana na lɛ́nu ulikplu ku kalala kani udu na bekyuli baabla bekyuli na kalɔ lɛlɔ. Na keku buwulo sɔɔn kani nda, nsu kɔnu ɔsiane ɔdi uuubo. Na bani mɔɔbla udu ɔmɛni lɛnɔ bebo ɔkplu geen.

²Ɔmmɔ ɔsu na lɛ́su kɔnakunwi nnini, “Bekpine bebo bɔnwuna betulo bayawine.

³Na bani na bétemonku-ma bɔwɔ ni, bana ɔdi ɔsɔ ɔdia utulo ƒui, ɔsika ama bátanu likyulikpi ala ani mɔɔlɛ́ na kayawi mɛni kudii.”

⁴Na lɛ́nu kabla kani lɛlɔ na bekyuli benye ku ala enengudi ani na baabla na bɔɔnu ƒui kási lɛlɔ kogyulo bukpo ku lɛnungyie lɛni nkya bekyuli ɔsu. Na ɔmmɔ ƒui uuubo kalɔ kadi, ɔsika use aani kalɛ na baabi taasiaku ɔƒɛƒɛɛ.

⁵Ɔdɔlɔdi muuti enu taasia nwuna kayi na anu ka ɔkɛ ɔɔví, na anwuɔsu lɛnɔ na kɔka kɔɔdú-nwu.

⁶Lɛdilabɔ blii lɛni na ákɛ ádi ku atu bɔyɔ ni, ɔdia utulo si étésusu lɛlɔ na ému-nya ada na use aani kalɛ na baabi taasiaku ɔƒɛƒɛɛ.

⁷Lɛ́nu lɛla bamba lɛnɔ na liiibo kalɔ bunu bɔdi na kalɔ lɛlɔ.

⁸Ukyuli ɔdi ɔ́kya ɔni na uuubo ubi ɔnanabi iye ɔnwani ɔdi, nsu ulada lɛlɔ butu taaya, na nwuna akɛla ani na ubo lɛnɔ elemo-nwu. Amu na úye lɛlɔ ɔnini, “Ɔma geen ɔsu na muubó abi, na líni lɛla lɛbuni biala líte lɛlɔ ku kalɛ na lɛkya lɛlɔ ebiti muedi?” Bi keyi udu na kadi mɛni na ukyuli ulenu lɛla lɛdi kalɔ?

⁹Nkyuli inyɔ kelie kadia ketulo ukyuli unwi. Ɔsika lɛlɔ lɛdubɔyɔ-ma si bása baadi lɛla lɛni na bákɛ.

¹⁰Ɔƒɛni si ɔdi nébuli ni, ɔkpanadi ɔdubo-nwu bubunku na ɔta. Nsu si anwu lɛti kani na ɔdi ni, nwuna bɔta bɔdubo-nwu bude.

¹¹Na si badi inyɔ na báyu bátɛ ni, bana lɛlɔ ogya ɔdubɔƒɔ ɔda-ma gugungu. Nsu si awɔ ukyuli unwi na ɔdi ntɛ ni, dɛ na adubɔƒɔ ogya ada lɛlɔ gugungu?

¹²Baakana na badi ukyuli unwi lɛlɔ si biikpó. Nsu si bibo inyɔ ni, bɛdubɔsala na bɛdi lɛlɔ. Anwuɔsu baasu banii kabuli kani na bámii básala ɛtɛ ni, kalatuna bukulo pla.

¹³Si adi okloƒu ɔwabane na áda anu ni, ɔdia ƒui utulo ɔga ɔdɔlɔdi ɔni na ulie na ulaƒɔ bekyuli kasusu.

¹⁴Na okloƒu ɔmmɔ udu ni, ina aban ɔtɔ katɛkɔ na ɔ́si úbo iye bawabane kaduli na báwɔ-nwu bákya na baaadi baga liku bekyuli muedi ni, ɔkana na unwini ɔga.

¹⁵Lɛ́ɛnu dii ka kayawi bekyuli ƒui básiaku okloƒu ɔmmɔ udu na ɔga ɔdi kukpi kama.

¹⁶Na ɔdi ulakana nwuna basiakune bɔka. Nsu na uwi ɛlɛɛ kama ni, bekyuli bani na bébebo kama ɔdi ulayɔ-nwu litemi. Na ɔmɛni ƒui úlieku ɔƒɛƒɛɛ kama bukeli taasia.