Read Lelemi Etemila 6 Bible Online

Etemila 6 - Lelemi bible

Etemila 6

¹Lɛla bamba lɛnɔ lɛkya na lɛɛɛdia munu munu lɛni na muukpóku bekyuli kasusu.

²Katɔti uute ukyuli egulabi ku lɛlakɛ bonwu na ɔɔyá na ukyuli ɔmmɔ ɔƒɔ lɛnyi ɔni na ɔsɔ uláyaki lɛla lɛdi mmomu kayi kaayɔ́-nwu buɛɛ. Nsu Katɔti ulaya na uulie taadi ala ammɔ mmomu ɔƒɔ muubo taabadi-nya. Na ɔdi kɔnyana litemi lɛni ndi ɔgbankpi na uuubo kalɔ bunu.

³Ukyuli ɔkana na ulie ngba ɔƒɔ akwa pii na ɔwɔ bebi ina eti anyɔ muedi. Nsu si lɛlɔ lítayɔ-nwu na nwuna ngba kemmo na uwi ɔmmɔ lɛnɔ ukpi na bátava-nwu kaduɛ ni, ubi ɔni nékpi na ntu kemmo muedi ɔ́ƒɔ kuye utulo-nwu.

⁴Ukyuli ɔdi ɔɔɔgyi ubi ɔmmɔ udu bɔwɔ kalɔ. Mmomu ɔɔsɔ teenwini aani kalɛ na lɛdisa lɛɛyila lɛla lɛdi taakya. Na útebo na ɔdia lɛnyi lɛdi muedi bɔsia.

⁵Ina ka útanu ɔƒɛ iye ɔti lɛla lɛdi ni, ubi ɔmmɔ ubo bɔnwuna utulo bebi pii ɔti ɔni nélie útu uwi mmɔ.

⁶Anwuɔsu si ina akwa mpim inyɔ na úlie na lɛlɔ lítayɔ-nwu na nwuna ngba bulie ku kabla kani na ɔ́bla lɛlɔ ni, bi na ɔ́kɛ ka likpo linwi kani na bana inyɔ ƒui bátáyii bákya?

⁷Kenye bɔdi kani na ukyuli ulie uususu lɛlɔ teete nsu ala eledu-nwu ɔkwɛ kudii.

⁸Kenyekɔ kamani na ɔnundane ubo utulo ɔdɔlɔdi? Na ɔwabane lɛnɔ ni, dɛ na ɔdubɔkana ngba bulie na ɔti lɛlɔ bɔda utulo bakladi na ayaki ani nda-nwu kemmo?

⁹Si bɔ́di lɛla lɛni nse-bu ku kubiti ni, ɔdia utulo ka butaasia lɛla bamba anu. Ɔsika uuubo kalɔ bunu bɔdi na buse kani na use aani kalɛ na baabi taasiaku ɔƒɛƒɛɛ.

¹⁰Lɛla biala mɔɔlɛ́ ni, lɛdi lɛla lɛni na Katɔti ɔ́ɔlɛ ugyii úse kukuuku. Na abu bekyuli bɔgyi kalɛ na buse ɔsu ni, buuubo unyeƒi ɔdi na bɔɔkyaku Katɔti, ɔsika ubo ɔyikun utulo-bu ƒui.

¹¹Si bɔnii butaatɛmi pii ni, lɛni kani na bɔdubo kɔdɔlɔ keyi buteedie. Anwuɔsu kɔsia kɔdi kuuubo-nwu kemmo ka bunye butaaka ala.

¹²Ngba buse klukui geen na buuubo kalɔ bunu bɔdi. Na bɔɔyii taakya aani ɔƒɛ kɔyu. Ɔma ndubɔti lɛla lɛni ndia lite-bu utulo ƒui? Na ɔma ndubɔti lɛla lɛni ndubo bɔlɛ uwi ɔni na abu bɔsɔ buuubo?