Read Lelemi Etemila 7 Bible Online

Etemila 7 - Lelemi bible

Etemila 7

¹Lɛnyi buni bɔƒɔ bɔdia butulo nnɔmii ku ɔnyi ƒɛƒɛɛ. Na likpimeyi lɛdia litulo lɛwɔmeyi.

²Na kekwa kalɔ busie bɔdia butulo ka esie limeyi buni kadikɔ. Ɔsika kukpi ndi ukyuli biala kawɔlɔkɔ ku kesiekɔ.

³Kɔnyana kɔdia kutulo lɛma. Ɔsika anumi ani muuwulo kɔnyana aayá na ukyuli kayi kemmo ablala eeboku ukyuli kubiti.

⁴Ɔnundane kayi kaasia ala ani mɔɔlɛ́ na kɔnyana kewulokɔ lɛlɔ. Nsu ɔdɔlɔdi uuti nwuna kayi taasia ebiti kakɛkɔ ala lɛlɔ.

⁵Ukyuli bɔdɔnku kpakplaa bɔdia butulo si badɔlɔdi beedie lɛnu teemwi-ɔ.

⁶Ɔdɔlɔdi lɛma ni, buse na use aani kalɛ na liyu alakpi eetulo na ogya kemmo na libui kalɔ. Na ɔmmɔ lɛlɔ uuubo kalɔ bunu bɔdi.

⁷Ala buƒu taakya ɔɔyá na ɔnundane uunwíni ɔdɔlɔdi. Na ala bɔbɛ taaƒɔ taadi ulaya na ukyuli kayi keeti-nwu taasiaku ala bɔbla ulu lɛlɔ siin.

⁸Litemi kawɔlɔkɔ kadia ketulo litemi kalɔ kesekɔ. Na kayi buɛɛ kadia ketulo lɛlɔ bɔtina.

⁹Tataababla ku kɔnyi buti na ƒula lɛlɔ kemmo. Ɔsika badɔlɔdi lɛgba akɔ na kúti-ɔ kúsela kutálɛlɛ.

¹⁰Teye anii bi ɔsu kuuku uwi ɔdia utulo uwi ɔni kemmo na bɔkya mɛni. Ɔsika kɔdɔlɔ litemi na lɛdi.

¹¹Si ukyuli ebo lɛnunda ni, ɔdia utulo kese bamba biala ƒui.

¹²Ɔsika lɛnunda lɛdubudie-ɔ na lɛla biala kemmo aani egulabi. Na lɛlati ku kasusu buni kadubo-ɔ bɔgyumana ngba uwi ƒui.

¹³Bla kasusu na Katɔti ala ani ƒui na ɔ́bla lɛlɔ na anu anii adubɔkana lɛdi bunyene si ánu ka lɛdi lɛ́bu?

¹⁴Si ala aatɛku ukyuli ɔdi ni, lɛlɔ lɛyɔ-nwu. Na si bubie na ala eebieku-nwu ni, na ulie kalɔ na uye lɛlɔ lɛla lɛni kudɔ na ɔ́si. Ɔsika Katɔti nábla alakpa anyɔ ammɔ kalɛ na ukyuli ɔsia lɛlɔ anu ka ɔɔɔgyi lɛla lɛni nsɔ ndubo bɔlɛ ɔsu.

¹⁵Na mina ngba bɔni neeebo-mi kalɔ mɛni kemmo ni, lɛ́nu kalɛ na ukyuli ɔni nsiaku Katɔti kama siin ɔɔkana na uukpi taayii udu. Na lɛ́nu kalɛ na ukyuli ukpidi lɛnɔ ɔɔkana na uulie ngba taabi lɛlɔ geen na nwuna likyulikpi ala bɔbla kemmo.

¹⁶Anwuɔsu tabla lɛlɔ aani ukyuli kedee tagya, na tabla lɛlɔ ukyuli ɔni na ɔ́da anu ɔ́gya lɛnɔ.

¹⁷Telie tabla ulikplu tavili na ekulo ƒula ngba liku iye tadɔlɔ, na ƒula kɔdɔlɔ kɔya na ƒula ngba bɔda liku.

¹⁸Nu ka akɛ ulu ntɛntɛ na étedeyi étésie kakɛ kadi átavili. Na ɔmɛni bɔbla ulayu-ɔ ɔkplu ulavili si aabu Katɔti.

¹⁹Lɛnunda lɛɛyá na ukyuli unwi ɔɔkɛ́ ɔyikun teetulo lɛlɔ badine leevu na ɔma unengudi ɔdi kemmo.

²⁰Ukyuli ɔdi uuubo na banii anwu use siin na ɔɔbla lɛla biala kaduɛ ɔsu na ulábla likpidi lɛdi na kalɔ kamɛni lɛlɔ.

²¹Tese atu anii eenú lɛla biala na ukyuli ɔɔsu, si ɔɔɔdi lɛni ni, ésela eténu ka ƒula kabla ɔblane unye uudumi teewida-a.

²²Ɔsika awɔ ɔlati agyi nwaa ka áabla lɛni kɔlɛ kɔlɛ.

²³Ala amɛni ƒui na lɛ́nu laa kpoo na lɛ́su ka ndubɔda anu na lɛnu lɛla lɛni ɔsu na ala amɛni ese lɛni lɛti, nsu útulo-mi.

²⁴Ina bi anu na ukyuli ɔ́da ni, litemi geen lɛmmɔ lɛ́gyunku-bu na nina kemmo bunu bɔ́gyu geen ɔni na ɔdi ulakana kalɔ bunu bɔwɔlɔ.

²⁵Anwuɔsu na lɛ́bla kasusu nnii mɔɔtɛya lɛla biala na makana kalɛ na lɛda anu na lɛti lɛla lɛni na ngba bumodi bɔmmɔ bɔdanku. Na lɛti kɔdɔlɔ ku libuokpi lɛni udu nkya likyulikpi bulie taabla lɛnɔ kemmo.

²⁶Lɛ́nu lɛ́ti ka uleku ukpidi ubo ɔdu utulo kukpi. Na úbimi enu ku kayi ƒui úse aani kakpagyuɛ ka uƒie ukyuli. Na ɔnana ɔni mɔɔdi Katɔti litemi lɛlɔ ni, ɔkana na ukeli-nwu. Nsu ukyuli ɔni na uládi-ni lɛlɔ ni, ɔdubo-nwu buƒie aani kakpagyuɛ na ɔyii udu kede kede.

²⁷Ala ɔtinane ɔnini, “Lɛ́sia mina lɛnunda lɛni ƒui na mbo lɛlɔ nnii mɔɔnu kalɛ na ala amɛni ámanku lɛlɔ.

²⁸Nsu lítuku laa lɛ́nɔ. Mmomu lɛ́nu ka na nkyuli apim unwi kemmo ni, bakana na bakɛ ɔnana ɔbuni unwi nsu beleku ama lítuku lɛ́nɔ na ńtakɛ ɔdi na bɔka bɔmɛni kemmo.

²⁹Lɛla linwi nábla-mi nwaa ƒui ndi ka Katɔti ɔ́bla-bu na nka bɔdi bekyuli siin, nsu búbavumana kasusu bɔ́sia ala bamba pii lɛlɔ na búƒu bula kasusu.”