Read Lelemi Lɛnu Ƒui Ɔnu 4 Bible Online

Lɛnu Ƒui Ɔnu 4 - Lelemi bible

Lɛnu Ƒui Ɔnu 4

¹Ɔbuni, ése álɛ ligblebi geen si mɔɔnu-ɔ taavinku ƒula lɛduni lɛni mbi-ɔ anumi mmɔ kemmo. Ƒula anumi eekeye aani lɛmangbɛ. Na ƒula linwini liibó ɔƒɛƒɛɛ aani kalɛ na bese pii baasí taayu Gilead abi.

²Na ƒula kenye anyi ása-a kenye kemmo na eekeye ƒututuu aani koƒonu kɔni na bákpila-ku ntu ɔƒɛni kani.

³Ƒula kenye kemodi kammɔ kese munu munu. Na enyekuli egyiedi ani na ese aani adi abuni ƒui aduni gyie wɛlɛ wɛlɛ anyɔ ékulo-nwu kemmo. Na lɛduni lɛni na libi-ɔ anumi ni, ƒula akpu munu munu suɛlɛ suɛlɛ ani mɔɔtu ubu aatina ana bɔdia.

⁴Ƒula limɔ lɛ́lɛ sɛsɛɛ ku aka ku bɔdia aani Salomo katutaasia kagyumanakɔ kani na ɔ́tu. Na agyumanala ani mɔɔgyumana bekpone mpim mpim ada-a limɔ.

⁵Ƒula anyii ani nnye-ɔ kayi ése aadia bɔnu aani bakwa bakɔdi inyɔ bani na benye baadi na eveteli ku anwula ƒualaƒuala akɔ.

⁶Ndubɔbabla lɛkɔ lisie abi ani lɛlɔ na kutu akyala ɔnyi ƒɛƒɛɛ ɔ́ƒɔ mmɔ ƒui asa na kadi kada kebewi nwaa.

⁷Ɔbuni, álɛ ligblebi na ulu biala lɛlɔ.

⁸Mina uleku uveledi, ami ku awɔ ƒui bɔdubo bɔtɔlɔ Lebanon mɛni! Na bɔdubuƒwimi enu na bɔsu Amana ku Senir ku Hermon abi kesii kani bagyata ku bebuoƒuala bakya atakpɛ ubu kemmo bɔnii bɔ́tɔlɔ.

⁹Ami ɔlati mina uleku uveledi, ƒula anumi ani na ánu-mi lɛti pɛ áda-mi kayi geen! Na sika asɛɛ ani na akya ɔkwɛ bukeye bɔ́ya na mina kayi kénwini kasia-a lɛlɔ.

¹⁰Ƒula bɔyɔ bɔɔyu kayi teetulo ntɛ. Na ƒula ugyulo ƒɛƒɛɛ ɔni na áwɛɛ ɔnyi utulo kutu akyala ɔnyi ƒɛƒɛɛ ɔni na uudie.

¹¹Ƒula enyekuli ese aani uwɔ kɔtakɛ, na bebuo anyii ntu ku uwɔ mɔɔyu taasi ƒula unyemi lɛlɔ. Na ƒula adala eedie ɔnyi ƒɛƒɛɛ aani Lebanon egyii ani muudie ɔnyi ƒɛƒɛɛ.

¹²Ami ɔlati mina uleku uveledi, ese aani kevoma kemo iye libiɔ lɛgyumanadi lɛni na ukyuli bamba ɔdi ulakana bɔta budu kalɛ kalɛ.

¹³Na aanwu egyiibi mini mini ku kutu akyala ku ugyulo ebi pii ani baabla ugyulo ɔni baalɔ hena ku nard,

¹⁴ku oloƒui ku mira ku ana lidu ku kutu akyala ani udu adi ndi ɔyii ku keyeeyi ku abintolobi ku lidu bamba pii lɛnɔ.

¹⁵Libiɔ lɛni mɔɔyu ntu buni geen na adi na kevoma kemo kammɔ kemmo. Na álɛ ási Lebanon abi lɛlɔ na adi ntu bɔni mɔɔyu kayi geen.

¹⁶Ɔƒɛƒɛɛ ukpo ɔsi katɔ ku kada kakɛ ƒui na ugyingya mina ɔnyi ƒɛƒɛɛ ɔni muudie taasiku mina kemo kammɔ kemmo na ɔƒɔ kesi kesii. Na mina ɔyɔne uduo-mi lɛlɔ aani kemo kalɛ na utu egyiibi mini mini ammɔ unyemi ɔnu kalɛ na mbo emini sɔsɔ.