Read Lelemi Lɛnu Ƒui Ɔnu 5 Bible Online

Lɛnu Ƒui Ɔnu 5 - Lelemi bible

Lɛnu Ƒui Ɔnu 5

¹Ami ɔlati mina uleku uveledi, líbo-ɔ kudɔ aani ami ɔlati mina kemo na mbadi ala mini mini ammɔ. Ndubɔƒiɔ mina uwɔ kɔtakɛ na lɛni uwɔ ɔmmɔ. Ndubɔni mina ntɛ ku mina bebuo anyii ntu bɔmmɔ. Mina bakpana, bɛdi na bɛni utédu uwi ɔni na bɔyɔ bɔmmɔ búmo-mii.

²Ntɛ mɔɔlɛɛ, nsu mina kayi kenye kagyumana, na muugyé kɔna ka mina ɔyɔne úbo únye kayakun uubó-mi kɔnu taasu-mi ɔnini, “Mina kayi ku ɔyɔne, mina lɛmangbɛ ɔni na lɛla lɛdi lítebie-nwu lɛlɔ, lɛmi kayakun te-mi! Amii ani náyu usien umodi ɔmmɔ áƒɔ-mi lili.”

³Nka lɛ́ɛƒɔ lɛgba na lídie mina adala ƒui líse. Buti na nsɔ ndubo mina adala buti bɔkya, na aba asɔ etuku-mi lɛgba?

⁴Mmɔ kani na lɛ́ti ka mina ɔyɔne ɔ́kya kɔnu kegbuta kama na údie ugyii ɔni na líti lɛ́bala kayakun mmɔ, na ɔ́bla-mi aani mina utu ɔ́da bubo ɔ́ya.

⁵Uwi ɔni na lɛ́ta lɛ́da kayakun kalɛmikɔ kammɔ nnii mɔɔlɛmi ɔtɔ lite mina ɔyɔne ni, ugyulo nnɔmii ƒɛƒɛɛ kani mɔɔyu-mi kɔnu ku animi lɛlɔ.

⁶Na ka unye ɔɔtɛmiku-mi ni, ɔ́bla-mi aani mina utu ɔ́da bubo ɔ́ya. Nsu ka lɛ́lɛmi ɔtɔ ni, mina ɔyɔne ɔ́yii-mi anumi kɔnakunwi na lɛ́sɔ ńtanu-nwu. Lɛni na ɔ́bla aani mina utu bɔnu na ɔ́nu úduo-mi kaƒɔ ɔni na lɛ́wia-nwu laa na mɔɔva taakpali-nwu taanɔ.

⁷Mmɔ na usien bagyumanane bani nkɛ mɔɔkɔ́ taayu ɔma unengudi ɔmmɔ kemmo bénu-mi kɔku. Na béƒie-mi na bébo-mi na bákya-mi ɔlɛ lɛlɔ na bédie-mi kɔdi kɔni na mbi-mi lɛlɔ.

⁸Yerusalem begblebi, mɔɔsu-mii kpakplaa nnii si bɛ́nu mina ɔyɔne ni, bɛsu-nwu bɛnii nwuna bɔyɔ bɔɔda-mi na lɛ́bla kpɛtɛ kpɛtɛ.

⁹O begblebi ƒui ugblebi, bi ɔsu na ƒula ɔyɔne lɛlɔ libo-ɔ kubiti lɛni utulo ukyuli bamba biala? Na bi ɔsu na aatala-bu akya-nwu anii bɔsu-nwu kalɛ na ƒula kayi kaabla-a na nwuna lɛlɔ?

¹⁰Na nkyuli mpim leevu akɔ ni, anwu nálɛ-mi lɛkloƒu utulo na ɔɔdia bɔnu na ubo ɔlɔkplu geen.

¹¹Nwuna lili lɛ́ƒɔ-mi kuye litulo sika ugyiedi ɔni ndia utulo ƒui. Na linwini ƒuku ƒuku liwi-nwu lili na lise totonto aani aasɛ otondi.

¹²Na uukeye aani lɛmangbɛ lɛni nákpi ntu, na unye libiɔ kɔtu aani sika ugyiedi asɛɛ, na béti báklibi-nwu, na nwuna anumi ebi eekeye aani bebuo anyi ntu.

¹³Na nwuna litugya ƒui lise aani kevoma kemo kani kemmo na kutu akyala egyiibi ƒɛƒɛɛ áƒɔ ƒui. Nu-nwu enyekuli aani ugyulo egyii anwula ani na nwuna ɔnyi ƒɛƒɛɛ ɔni na uudie únwini aani oloƒui ntu na bɔɔyu-nwu lɛlɔ.

¹⁴Na nwuna enu ese aani kugyii kɔgba kɔni na béti sika ugyiedi bákya-nwu bɔdia ku asɛɛ ani na áƒɔ kuye. Na nwuna ɔlɔgyii umodi use aani atu ɔtunkpɛ.

¹⁵Na nwuna lɛgba lise aani ɔtɔ akpa ani lɛlɔ na bámana atabi ani náƒɔ kuye na eekeye geen na enye sika ugyiedi atabi lɛlɔ. Na unye lɛgadi kemmo aani Lebanon Kɔbi ku kuna egyii kpakplaa ani nálɛ lili enye bonwu bonwu.

¹⁶Kalɛ na ɔɔkya-mi kɔgbu ɔɔyu-mi kayi geen, na mɔɔwia-nwu lɛni uwi biala kemmo!