Read Lelemi Lɛnu Ƒui Ɔnu 7 Bible Online

Lɛnu Ƒui Ɔnu 7 - Lelemi bible

Lɛnu Ƒui Ɔnu 7

¹Uleku ɔga ubi na adi, na ƒula lɛgba lɛɛdia bɔnu na ƒula lɛgbanvuo kemmo. Na ƒula ebuli aadia bɔnu aani si ɔvɔne ɔdi néti sika ugyiedi na ɔ́nwi-nya ɔ́lɛku-nwu kemmo.

²Ƒula lɛkun lise aani ntɛ ɔɔƒɛɛ ɔni na béyile ku ntɛ. Na ƒula ɔlɔgyii úyi ɔ́lɛ munu munu na use salalaa aani ɔmukɔ ɔni na bényimi ku anwula ƒuala ƒuala limu lɛdi.

³Na ƒula anyii ani nnye-ɔ kayi ese aani bakwa inyɔ bani nnye básala kesii kadi.

⁴Na ƒula limɔ lise aani atu ɔtunkpɛ. Na ƒula anumi ebi eekeye aani Hesbon libiɔ ntu na Bat-Rabin ɔma ɔban kenye. Na ƒula enwu aadia bɔnu aani Lebanon Kɔbi kɔni nákɔ kɔ́lɛ na Damasko ɔma unengudi.

⁵Ƒula lili linye ligeen katɔ katɔ aani Karmel Kɔbi. Na ƒula lili linwini lɛɛdia bɔnu geen, na ɔmmɔ lɛti muedi ɔkana na uƒie ɔga umodi unwini ƒula kabla ɔblane.

⁶Ése álɛ ligblebi na aadia bɔnu na aada ukyuli biala ɔkwɛ!

⁷Ákuku na ese salalaa aani kubo, na ƒula kayi anyii ani nlɛ-ɔ kayi éyi álɛ munu munu.

⁸Ndubɔkɔ kugyii kɔmmɔ na ntébo lɛda nwuna kɔgba kɔmmɔ. Na liƒie anyii ammɔ lɛda na lɛnu kalɛ na ese aani akutu lɛboyo. Na ƒula ɔƒɛƒɛɛ ɔni na aanwuna taalɛku enwu kemmo ɔnyi use ƒɛƒɛɛ aani adingyii ebi abuni ɔƒɛƒɛɛ ɔni na eedie.

⁹Si ukyuli ɔ́kya-a kɔgbu ni, ɔɔyu kayi teetulo si áni ntɛ bɔni ndia ntulo ƒui. Bi nsɔ nse mini mini na ɔdia lɛni?

¹⁰Mina Ɔyɔne, awɔ ɔdi na ndi, na mɔɔnu kalɛ na mɔɔda-a ɔkwɛ geen.

¹¹Ya na bɔvi ɔgbami busie kemo na butátɛ akpaklɔ ammɔ kemmo.

¹²Na aya na buyile bɔlɛ ɔtanta tutuutu butánu si adingyii ammɔ éewi anwula. Na si uwi ɔni na búdu mmɔ ni, ndubudie mina kayi bɔyɔ lɛtina-a na mmɔ.

¹³Egyii anwula ani ɔnyi ƒɛƒɛɛ mɔɔda ukyuli enwu aani kuvo áƒɔ kayaa ƒui. Ɔyɔne, lɛ́ɛsala adingyii ebi abuni lidu lidu líse bula ɔtɔ kayakun líse-ɔ.