Read Lelemi Yesaia 1 Bible Online

Yesaia 1 - Lelemi bible

Yesaia 1

¹Yesaia ɔni ndi Amos ubidi ɔ́nu kɔyu kemmo ala budie taatina adi na adanku Yuda ku Yerusalem. Útaanu ala amɛni na uwi ɔni na Usia ku Yutan ku Ahas ku Hesekia bélie bádi lɛga na ɔdi biala uwi kemmo na Yuda kalɔ lɛlɔ.

²Binu, amii bani nkya katɔ ƒui! Na bise atu, amii kalɔ lɛlɔ bekyuli! Ɔsika Unwoti ɔ́su kenye kadi ɔnini, “Lɛ́tumini bebi na lɛ́da-ma na bábi lɛlɔ, nsu báta bénye-mi lɛlɔ.

³Ɔmantɛ akɔ ɔgyani ɔgyi nwuna ɔtɔlati. Na ebuo ala utine ɔgyi kalɛkɛ kani kemmo na nwuna ɔtɔlati uuwi-nwu adila. Nsu mina kadi bekyuli Israelƒuɔ ni, ama beeese lɛni. Na belenu tɔ lɛla lɛdi kalɔ úti úbedu ɔƒɛni.”

⁴O kadi bekyuli bekpidi, bana ekpidi énwini etila na aayu-ma unu. Badi alaekpidi bablane kasala, bebi bekpidi bani muusé lɛlɔ! Béni na bédie Unwoti atu, na béni Israel Ɔlatidi Kedee ɔmmɔ, na bénwini kama bákya-nwu.

⁵Bi ɔsu na binye bɛɛwia lɛbibo teete lɛlɔ lɛni? Bi ɔsi na bɛdubɔta binye-mi lɛlɔ lɛni biteesie uwi ƒui? Bilánu ka bise aani bekyuli bani na bébo-ma eli bábwɛ na biinú ɔlɛ na bina kayi kemmo.

⁶Ɔ́si bina lɛgba kalɔ útédu lili ni, ɔlɛ ɔda-mii na bɛ́ƒɔ alɛbi ƒui, na akpanabi asia-mii lɛlɔ, na bina alɛbi eenwenyi, na biiibo evogyii na binyimi-ni.

⁷Bina kɔlɔ ƒui kɔ́yii udu na kuwi ukpludi. Na bákyula-mii lɛma linengudi ƒui. Na binye bɛɛnu baƒɔ bammɔ na béti-mii mmo ku lɛla biala bénwini bana lɛdi na bébile lɛla biala.

⁸Sion, lídie-ɔ atu aani kevo kani na bányonu bákya eƒu akɔ. Na útavumana ku ɔma unengudi ɔni bekpone báka bákya.

⁹Si Blɔti Ɔyikune Ƒui útebu bula ɛlɛɛ badi útese kama ni, bɔdubo udu bɔyii aani kalɛ na Sodom ku Gomora lɛma lɛ́yii udu.

¹⁰Amii bani nse aani Sodom batɔnkune, bise atu na binu Unwoti lɛla lɛni na ɔɔsu, binu bula Katɔti ɔda bubo, amii bani nse aani Gomora kadi bekyuli!

¹¹Unwoti ɔnini, “Bina akpala pii ani na biiboku-mi alaƒɔ-mi anu. Límo-nya na aaba-mi ɔkwɛ! Bi mɔɔka-nya? Na bina baƒonu ku bebuo bamba ƒui lɛmwi ni, naaawia-ni naaanu. Bina ɔmantɛ bakɔ ku baƒonu ku bese bammɔ ubugya uusé-mi lɛlɔ na naaawia-nwu naaanu.

¹²Si bɛ́da bɛ́lɛ-mi anumi ku ala ammɔ na bɛnii mina kakpakɔ na bíbo ni, ɔma névele-mii ɔnii biboku-nwu ala ammɔ, na bɛɛkɔ́-mi kaduli taayu?

¹³Bɛsɔ biteboku-mi akpala ani neeebo kɔsia kɔdi! Bina oloƒui ɔni bɛɛkyula ƒui uusé-mi. Na bina emeyi buni ani bɛɛdi ƒui átamanku-mi. Kɔbuli kɔwɔdi bɔlɛ ku lɛnwunameyi ku emeyi aƒunadi ani na biilie kɔka ku bina emeyi buni ani bɛɛsála lɛlɔ taadi ƒui adi likpidi ku ɔkɔ ala sɔɔn. Nsɔ naaawia-mii naaablaku lɛla lɛdi.

¹⁴Muukisi kɔbuli kɔwɔdi bɔlɛ ku bina emeyi buni ani bɛɛdi ku bina akpala ƒui na naaawia-nya naaanu, ɔsika énwini-mi etila na lɛ́ɛnɔ-nya buti.

¹⁵Na ɔ́si ɔƒɛni úsela ni, si bɛ́kɔliku bina enu katɔ bɛɛkpali-mi muedi ni, lɛɛɛdubo-mii bunwini bɔnu. Na si ina binye bɛɛkpali-mi na uwi útu muedi ni, lɛɛɛdubo-mii bɔkpete. Ɔsika bekyuli bani nátabla-mii lɛla lɛdi asa na bɛ́du-ma ubugya ɔ́ƒɔ-mii enu ƒui.

¹⁶Bɛkpi ntu na bɛbla lɛlɔ sɛɛn. Na bɛsɔ bitaya na ntaanu bina alaekpidi ani na bɛ́bla mmɔ. Na bɛda bina udunkpi ala bɔbla bɛya.

¹⁷Bɛtɛya lɛbuni bɔbla. Na bɛbla ala ulu lɛlɔ siin. Bibunku bekyuli bani na beekpóku, na bikpo bite bekpinebi, na bɛya na bekpinele bakɛ bana kadikɔ.”

¹⁸Unwoti ɔnini, “Bibo na bɔdi kasusu bɔsala, na bɔwia ala kemmo bɔnu. Ina dɛ na bina alaekpidi áya na bɛ́nwu aani aƒɛ muedi ni, ndubɔkana na lidie-nya bina lɛlɔ. Na lɛya biteekeye aani etubankɛ. Na si ina dɛ na ekpidi ammɔ áya na bígyie dɛ muedi ni, ndubɔƒɔ-mii lɛlɔ na bɛƒuala aani unwo.

¹⁹Ɔƒɛni si bɛdubunu-mi litemi na binu kalɔ na libunku-mii ni, bɛdubɔkɛ ala pii bɛdi.

²⁰Nsu si bɛ́ta bínye-mi lɛlɔ ni, bina bekisine badubo-mii bɔyila ku udu.

²¹“Bɛnu kalɛ na Yerusalem ɔma ɔni kemmo na balawia ala basa basa balanu ɔƒɛni amu úbenwini aani ɔyalɛ ɔni kudɔ banana lidu lidu beeduo taalɛ. Ɔma ɔni kemmo na nka bátaadi mina etemila lɛlɔ ulu lɛlɔ ku ala bɔbla siin ni, ɔƒɛni amu bekyuli badune néyi-nwu kemmo tɛɛ.

²²Ɔma ɔni néteekeye aani sika ɔƒualadi dii ɔƒɛni amu únwini lɛbuala libi. Awɔ ɔni nése sɛɛn aani ntɛ bɔwɔdi ni, ɔƒɛni amu ese aani ntɛ bɔni béwi ntu.

²³Na ɔma umodi ɔmmɔ batɔnkune bénwini bekyuli bani mɔɔta teenye-mi lɛlɔ, na baadiku beyune kɔkpana, na baaƒɔ́ ala na bɔbɛ kemmo taasiku bekyuli kudɔ. Béni ka bekpo bete bekpinebi. Na bekpinele litemi ani lɛɛɛkɛ-ma munu munu.

²⁴Ɔmmɔ ɔsu Unwoti Ɔyikune Ƒui, ɔni ndi Israelƒuɔ lɛlɔ ɔdine Ɔyikune ɔ́su ɔnini, ‘Ndubo-mii atu budie aani mina bekisine na mina livoƒi libo-mii lɛlɔ.

²⁵Ndubo-mii bina likpidi kasi budie geen na ndubo-mii bɔnwamana na lidie eku ana ƒui bina lɛlɔ ku bina bɔsɔ ƒui kaduɛ.

²⁶Na ɔmmɔ kama ni, ndubute-mii litemi batɛne babuni ku kasusu betine aani bani nákya-mii akɔ kuuku. Na bekyuli badubɔsɔ balɔ Yerusalem banii Ɔma unengudi ɔni kemmo baatɛ litemi geen ku Ɔma unengudi ɔni bekyuli mɔɔdi etemila lɛlɔ.’ ”

²⁷Ka Unwoti Katɔti ɔɔtɛ litemi ulu lɛlɔ na use siin ɔsu ni, alaekpidi bablane bani nkya Sion na bana ekpidi éduo-ma na bénwini kayi, badubɔkɛ bɔƒɔ.

²⁸Na bani na ekpidi kani na beli baabla ni, ɔdubo-ma udu bɔyila ƒui, ɔsika béni na banii belebo Unwoti kudɔ.

²⁹“Kɔƒa ndubo-mii bukpo geen si bɛ́kali bɛ́nu uwi ɔni na bítaakpa ala teete baƒiɔ na egyii enengudi ani bɛ́da bínyene sɛsɛɛ na bina akunkpo ammɔ kemmo. Na bilákɛ anumi kesekɔ si bínyimo alaekpidi lidu lɛni na bɛ́bla na bina nvoma mmo bɔni na bɛ́da bíse bíte lɛƒiɔkpa mmɔ kemmo.

³⁰Na bɛdubo bɔyuɛ na biwiile evete aani kemo kani egyii nátakɛ ntu.

³¹Na bina bayikune ƒui badubɔyii aani kalɛ na keti kaakywí na ɔdi ulakana bunine.”