Read Lelemi Yesaia 10 Bible Online

Yesaia 10 - Lelemi bible

Yesaia 10

¹Bɔbuɛ beete bekyuli, ama bani muunyimi ɔda bubo bukpidi kalɛ na bataanya bekyuli taakya.

²Na balátɛ litemi ulu lɛlɔ teete bawabane ku bekpinele ku bekpinebi kalɛ kɔnu kutuku-ma bana ala lɛlɔ.

³Bi na bɛdubo bɔbla ɔgbankpi uwi, uwi ɔni na ndubɔya na ɔsi kalɔ kakaaka ubo ubalɛ-mii lɛlɔ? Ɔma na bɛdubo bukeli bɔtamiku? Na ɔma na bɛdubo bina akɛla bɔda buse?

⁴Badubɔni-mii batɔlɔku na abuli kemmo ku bekyuli beƒiedi bakladi na biiibo lɛla lɛdi bɔbla, iye badu-mii bebunku bani na báadu béwi. Nsu ɔmmɔ ƒui Katɔti kɔnyi kɔɔɔdubo-nwu bɔyɔ tɔ.

⁵“Bɔbuɛ beete Asiria, mina ugyii ɔni nda ku kɔnyi. Bana enu kemmo na mina kɔnyi ligyiiku lɛkya!

⁶Na mɔɔtala-ma ka betékpoku mina bekyuli bani naaadi mina etemila lɛlɔ. Lídie-ma ulu nnii betékpo mina kadi bekyuli, bekyuli bani mɔɔkya-mi kɔnyi, na beƒie-ma ala baƒɔ na besusu-ma kpɛtɛ kpɛtɛ.

⁷Nsu Asiriaƒuɔ baaagyi banii ami nda-ma mɔɔbla lɛla lɛni mɔɔyɔ́. Ama bana kasusu ndi ka ama alati nda bana ɔyikun ka bekpo na badi kɔlɔ pii lɛlɔ na bayila-ma udu.

⁸Anwuɔsu na Asiria ɔga ɔɔkun lɛmɛnɛ ɔnini, ‘Mina kekpo batɔnkune ƒui badi baga.

⁹Na bádi Kalno ɔma lɛlɔ aani kalɛ na bádi Karkemis ku Hamat ku Arpad ku Samaria ku Damasko lɛnɔ lɛlɔ.

¹⁰Geen ni, líkpo lɛ́di kɔlɔ kɔni baƒiɔ nákuku lɛlɔ, na kúbomo kútulo Yerusalem ku Samaria badi.

¹¹Na lɛni kani na ndubo bukpo na lɛdi Yerusalem ku nwuna baƒiɔ ƒui lɛlɔ.’ ”

¹²Ɔƒɛni si lebo lɛni na Unwoti Katɔti ɔ́sia Asiriaƒuɔ lɛlɔ ɔ́wɔlɔ lɛla lɛni na ɔɔwia ka ɔbla na Yerusalem ku Sion ni, ɔdubunwini na ɔsu ɔnini, “Ndubɔni Asiriaƒuɔ ɔga ku nwuna kadi bekyuli kɔtu, ɔsika uutú kɔnu kayi na ɔɔkun lɛmɛnɛ na ɔɔnu bekyuli bani lɛlɔ na ɔ́di ɔnusɛ.

¹³Ɔɔtina lɛlɔ ku enyekpi taasu ɔnini, “ ‘Ami ɔlati mina ɔyikun ku lɛlati ku lɛnunda kemmo na líkpo bekyuli bamɛni na lɛ́di-ma lɛlɔ na líƒie kɔlɔ pii ku bana akɛla lɛ́ƒɔ na lɛ́di baga bammɔ lɛlɔ na lɛ́yila-ma udu ƒui.

¹⁴Kalɛ na ukyuli ɔɔkya kɔnu nwuna bebuo lɛyu teeƒie ebuo ɔni na ɔɔyɔ́ ni, lɛni na lɛ́kya kɔnu kadi bamba kalɔ kemmo na lɛ́kpala-ma akɛla ƒui lɛ́tɔlɔku. Kalɛ na ukyuli ɔɔla avala na lɛyu kemmo ni, lɛni na lɛ́sala kalɔ lɛlɔ baga ku bana bekyuli ɔni na ɔdi útebimi kenye iye unene kɔvwi muedi.’ ”

¹⁵Bɔkana na kadadi kadubɔkana lɛlɔ katɔ bɔkɔli butulo ukyuli ɔni nda-ka? Munuu lɛbuala lɛni bada baabwɛ kugyii ndubɔkana kayi butu bɔkya ukyuli ɔni nda-nwu? Aani si lɛbuala mɔɔgyú ukyuli teeƒwimi iye ligyiiku mɔɔda ukyuli taaƒiɛmi lɛla lɛdi.

¹⁶Anwuɔsu Unwoti Ɔyikune Ƒui, ɔdubɔya na ɔlɛ kpakplaa ubo Asiria ɔga ku nwuna bekpone bani mɔɔtina lɛlɔ lɛlɔ, na bana ɔlɔna kemmo keteenu ɔlɛ aani ogya mɔɔkyula-ma.

¹⁷Unwoti ɔni ndi Israel bukeye ɔdubunwini ogya na udie ogya unyemi na ɔkyula-ma limeyi linwi pɛ na bakywi aani liyu ku alakpigya kalɛ.

¹⁸Na bana akumiɔ ani nábi ku kɔlɔ kɔni nélie lɛmwi mmɔ ƒui ndubo-ku bɔkyula na kɔyii udu aani kalɛ na ɔlɛne uuƒi taayii udu.

¹⁹Na egyii alɛɛ geen ndubo bubu na ɔnamu blii muedi adubɔka-nya!

²⁰Na uwi ɔmmɔ ni, Israelƒuɔ ɛlɛɛ bani mebu na badi Yakob kaba kemmo bebi ni, basɔ beleti bana anu balasia bekyuli bani nékpo-ma na bádi-ma lɛlɔ banii ama ndubo-ma bubunku. Mmomu Unwoti Israel Katɔti Kedee na badubuti bana kayi ƒui basia.

²¹Yakob kaba kemmo nkyuli ɛlɛɛ badubunwini bebo Katɔti Ɔyikune Ƒui kudɔ.

²²O Israel, ina ka bina kadi bekyuli bemomo aani ɛpu kɔnwinimi muedi ni, bina ɛlɛɛ kani ndubunwini bibo kama. Katɔti ɔ́lɛ ugyii na nwuna ulu siin lɛlɔ úse ka ɔkyula-mii na ɔyila-mii udu.

²³Na Unwoti ɔni ndi Ɔyikune Ƒui ɔdubo kalɔ kammɔ ƒui kɔtu kɔmɛni bɔni sɔsɔ.

²⁴Anwuɔsu binu lɛla lɛni na Unwoti Ɔyikune Ƒui ɔmmɔ ɔ́su, “Mina kadi bekyuli bani nkya Yerusalem, bise kayi na bitayia Asiriaƒuɔ si beekpóku-mii na baanya-mii taakya aani kalɛ kani na Egyipte kadi bekyuli bábla kuuku dii bábavi.

²⁵Bana bukpoku bɔmmɔ buletu uwi. Na uwi klukwii kemmo ni, kɔnyi kɔni na líti lɛ́kya-mii kɔdubo-mi bɔyɔ na bana lɛlɔ mmomu na kɔnyi kɔdubo-mi bɔkɔ kalɛ na lɛkyula-ma.”

²⁶Unwoti Katɔti Ɔyikune Ƒui ɔdubo-ma bubo bɔƒiɛmi kalɔ na ebola eduo-ma lɛlɔ aani kalɛ na ɔkɛnku Gideon lɛlɔ, na ɔ́di Midian kadi bekyuli lɛlɔ na kesii kani baalɔ banii Oreb lɛtakpɛ. Iye uwi ɔni na Mose ɔ́talaku Unwoti ugyii katɔ na ɛpu úle ntɛ na ɔ́nyina Egyipteƒuɔ bekpone bammɔ ƒui na ntu kemmo.

²⁷Limeyi lɛmmɔ lɛlɔ na Unwoti ɔdubɔya na kalɛ na nwuna kadi bekyuli bakya bekyuli bamba kalɔ baabla-ma kabla ɔdubɔwɔ. Na ɔƒɛ bana lɛlɔ bɔdi kɔgba kɔni nda-mii amɔ ku amangba udie-mii lɛlɔ.

²⁸Bɛnu! Báasi bébedu Aiat ɔma, na básia bálɛ Migron ɔma kemmo. Na baaklibi bana ala buse na Mikmas.

²⁹Bávia ketu na utukwalɛ bonwu ɔdi, na bátáƒɔ lɛlɔ bátɛ Geba ɔma kemmo. Na liƒu lɛ́ya na lɛlɔ lɛɛtɔ́ Rama ɔma bekyuli. Na Saul ɔma Gibea kadi bekyuli beekeli ka baƒɔ bana lili ngba.

³⁰Amii Galim ɔma bekyuli, bibo kɔnu kenye! Na amii Laisa ɔma bekyuli, binu kudu kɔni nda O Anatos ɔma bekyuli, bíduo kɔnyana.

³¹Madmena ɔma bekyuli bakɛ usi baawia kabɛkɔ. Na Gebim kadi bekyuli bábɛ beeduo ala kalɔ.

³²Ɔmwi ni, bekisine bammɔ badubɔƒɔ lɛlɔ bakya Nob ɔma na bataadu anyi teekene lɛvu taayila Sion teemene kɔbi kɔmmɔ na Yerusalem.

³³Nsu bɛnu! Unwoti Ɔyikune Ƒui ɔdubo kugyii bonwu ku kuna kɔgba bonwu bɔmɛnɛ buwi kalɔ ku nwuna ɔyikun bonwu. Egyii enengudi ani nákuku mmɔ na ɔdubo bɔƒɛ na uboku-nya kalɔ.

³⁴Ɔdubɔda lɛkumiɔ egyii ammɔ ku kadadi. Na Lebanon egyii mmɔ ewi kalɔ na nwuna anumi na ayii udu.