Read Lelemi Yesaia 14 Bible Online

Yesaia 14 - Lelemi bible

Yesaia 14

¹Unwoti ɔdubo Israelƒuɔ kɔnyana bɔnu, na ɔsɔ ɔƒuna-ma, na ɔsɔku-ma utésie bana keliekɔ na bana kalɔ lɛlɔ. Baƒɔ badubɔsalaku-ma na bablaku Israelƒuɔ unwi.

²Na kadi bamba bekyuli ndubo-ma butiku na beti-ma besienku bana kalɔ lɛlɔ. Na Israelƒuɔ beti-ma benwini bana banana ku beleku kabla bablane na Unwoti kalɔ kammɔ lɛlɔ. Na kadi bani néƒie-ma bátɔlɔku na bénye-ma lɛlɔ na baabla bana kabla ni, Israelƒuɔ mmomu badubo bunwini bunye-ma lɛlɔ na bataabla-ma kabla.

³Na limeyi lɛni na Unwoti ɔdubɔya na bɛlɛ bina lɛbibo ku lɛlɔ bukpoku ku kalɛ na benye-mii lɛlɔ na bɛɛbla bekyuli bamba kabla kemmo ni,

⁴bɛdubo ɔnu bɔnwi bɔsia Babel ɔga na bɛsu bɛnini, “Báyila ɔyikune ɔmmɔ udu! Na nwuna kɔnyi kpakplaa ku lɛlɔ bɔtina bɔmmɔ kenye kékulo!

⁵Unwoti ɔ́ƒɛ balalane ɔgagyii, lɛlɔ badine bammɔ likposela,

⁶lɛni na bada baadú bekyuli ku kɔnyi, na baláda baláya uwi ɔdi. Na ɔmmɔ udu na béti baadi kɔlɔ ƒui lɛlɔ, na balásɔ bana likyulikpi kama.

⁷Kayawi ƒui kábla buɛɛ na ukyuli biala atu áyɔ na békeyi lɛnu na benye beedie.

⁸Egyii enengudi gyɛnglɛɛ ammɔ muedi, lɛlɔ lɛɛyɔ́-nya na Lebanon kalɔ banini, ‘Ɔni na bébo-ɔ kalɔ ɔƒɛni amu ni, ala ɔnwine ɔdi ɔsɔ ulebo ulabada-bu uláva kalɔ.’ ”

⁹Kekpine muedi owogyo úwi, na lɛlɔ badine bani lɛnɔ néesie kekpine mmɔ báta babasiaku-ɔ ka bánu-ɔ ka ási adubo.

¹⁰Na baasu ku lɛdi linwi banini, “Abu ku-ɔ búlie, ɔsika kablakɔ kása awɔ lɛnɔ aani abu.”

¹¹Ƒula kenyekɔ ku ɔyikun ɔ́sa, ɔsika báva awɔ ku ƒula lɛbentaa ku lɛnu ƒui, na atɛ beklubi lɛlɔ, na bani bewi-ɔ lɛlɔ.

¹²O ukyuli ɔni muukeye aani ɔtanta lɛyabi na ese aani ɔtanta kadi bugye! Nu kalɛ báya-a na ánu ási katɔ katɔ kesii kani na élie ábayu kalɔ lɛlɔ mɛni, Awɔ ɔni na nka ákɔ kayawi ƒui bekyuli ásɔ!

¹³Awɔ mɔɔsu na ƒula kayi kemmo anii, “Ndubɔkɔ lisie katɔ katɔ ntése mina liboku na mmɔ na keliekɔ kammɔ kebo kavi Katɔti ayabi, na ndubulie kɔbi kedee kɔmmɔ lɛlɔ katɔ ƒui, ntaadi katɔ bayikune bani ƒui mɔɔsála mmɔ lɛlɔ.

¹⁴Na ndubɔkɔ lisie katɔ katɔ ƒui, na ami ku Unwoti Ɔyikune Ƒui bɔdubɔbla likeke.”

¹⁵Nsu aanu-ɔ mɛni na báayula kalɔ na ébeduo kekpine na ubu kemmo mɛni.

¹⁶Na bekyuli ƒui bágyu anumi bálɛ-ɔ baanu-ɔ kaduɛ, na béye banini, “Awɔ ndi nkyuli ɔni nágyu kayawi éti átaatanyi-ka dii mmɔ?

¹⁷Na awɔ nésusu kayawi kammɔ na kénwini kalɔ kakwiidi, na ábwɛ lɛma linengudi na étete kuƒi ka bekyuli bani na éƒie basɔ benwini besie bana lɛma?”

¹⁸Baga bani na békpi mmɔ ƒui batɛ bana kɔƒiɔtɔ kemmo ku bana agala.

¹⁹Nsu aanu-ɔ na béƒwimi bábava mɛni aani kalɛ na baavá kaƒɔ kebiledi, na bekyuli bani na áya na bátu kuwii bádu ubugya ɔ́ƒɔ-ɔ lɛlɔ ƒui.

²⁰Na baaadubo-ɔ bɔva bubunku bakladi kalɛ na báva ama, ɔsika ébile ƒula kalɔ na ádu ƒula bekyuli. Ukyuli ukpidi bebi ni, basɔ baaadubo-ma anyi bɔkpali kudii.

²¹Bɛklibi kesii kadi na bɛdu alaekpidi ɔblane ɔmɛni bebi, na bana bati ekpidi ɔsu. Na ɔdi ɔsɔ utakɔ utetédu ka ɔɔkɛ́ ɔyikun na ɔsɔ utaadi kayawi lɛlɔ, na ɔtu lɛma linengudi uyile kalɔ lɛlɔ.

²²Unwoti Ɔyikune Ƒui ɔnini, “Ndubunye litile Babelƒuɔ kuƒi, na bana lɛnyi lɛmmɔ lɛyii udu. Na bana ɛlɛɛ bani mebu ku bana bawɔ ƒui ndubo-ma bɔkyula.

²³Ndubɔya na mmɔ kenwini bekuku keliekɔ ku ntu ku lɛba sɔɔn. Ndubɔyila-ma ƒui na lɛkpala-ma aani uƒiɔ kalɛ lɛkyula.”

²⁴Unwoti Ɔyikune Ƒui úse kenye ɔnini, “Kasusu biala na lɛ́bla líse ni, ndubɔya na kebo-nwu kemmo lɛni kani na mina bɔyɔ kenye.

²⁵Ndubo Asiriaƒuɔ udu bɔyila na mina kalɔ, na lɛkɔ-ma lɛbwɛ kpɛtɛ kpɛtɛ na mina kɔbi lɛlɔ, ama bani nákɔ belie mina bekyuli lɛlɔ, na lidie bana lɛbibo kɔgba kɔni nda Israelƒuɔ, na bana etila atimi mina bekyuli lɛlɔ.”

²⁶Unwoti ɔ́bla kasusu kadi úse úte kayawi kemodi kammɔ ƒui, ɔsika nwuna ɔyikun unengudi ɔmmɔ ɔ́ƒɔ kayawi kammɔ kesii biala,

²⁷na úudie kɔnu úse na kɔnyi kemmo ka ɔni kayawi kɔtu na ɔdi uletile-nwu kuƒi.

²⁸Lɛkwa lɛni na Ɔga Ahas úkpi ni, anwu na Unwoti úti kenye kamɛni úte-mi.

²⁹Ɔƒɛni amii Ƒilistiƒuɔ ni, lɛlɔ litayɔ-mii tɔ bɛnii bina ugyii ɔdadi ɔni ndi ɔga ɔmmɔ ɔ́ƒɛ. Ɔsika kɔlakpi kukpidi ubi ni, use aani kugyii ugyiitu ukpidi bɔta. Kuna ebi adi avan ɔni mɔɔtu ku ugyulo ukpidi.

³⁰Ndubute bawabane geen ƒui na badi aani baƒonu ɔdane buni kalɛ na bani mɔɔyaki ƒui batɛ ku banwuna. Nsu amii ni, ndubɔya na kɔka kɔdu-mii ƒui na bɛyii udu ku ligyiitu.

³¹O amii Ƒilistiƒuɔ! Biteewulo na biteedumo, na bina lɛma linengudi lɛmmɔ kemmo ku bina lɛma ɔban kenye, na bɛyu biwi kalɔ ku bɔyia, na bɛnu bina bekisine uyɔ ka ɔ́si katɔ kakɛ ɔ́yu ɔdubo, na bɛnu bekpone bammɔ kalɛ na básala lɛlɔ badubo gbini gbini.

³²Bi kenye na bɔdubudie bute bekisine bammɔ si banii bana batu badi bébeye lɛla lɛdi? Bɔdubɔsu-ma bɔnini, “Unwoti úse katamikukɔ úse Sion, na nwuna bekyuli bani ƒui na baanya taakya badubɔkɛ katamikukɔ.”