Read Lelemi Yesaia 15 Bible Online

Yesaia 15 - Lelemi bible

Yesaia 15

¹Kenye kamɛni kaatina lɛla lɛdi na Ar ku Kir Moab lɛma linengudi lɛlɔ. Usien unwi kani na bábwɛ lɛma lɛmmɔ na lɛ́yii udu ƒui!

²Dibon ɔma bekyuli bákɔ bésie kɔbi lɛlɔ, na bana baƒiɔ kɔdu, na Moab kalɔ bekyuli ƒui béwulo na Medeba ɔma lili. Békpeyi bana eli ku kuduo ƒui.

³Na bakɛ bana ɔma kemmo lilu lɛlɔ ƒui, na benyimi adikpi, ani mɔɔtina ka beewulo kɔnyana. Na benye kadi kasakɔ ku lɛsa eli na keku kada ƒioƒiooƒio na báyu bewi kalɔ.

⁴Na kɔvanu ku keku kani nda momoomo na Hesbon ku Eleale lɛma linengudi kemmo, na kɔku kɔmmɔ kuusié ɔgyu teetédu Yahas ɔma kemmo. Ɔkɛnku ɔmmɔ ɔsu liƒu líƒie Moab kalɔ bekpone bammɔ na ama lɛnɔ bése kalɔ baava na ɔƒɛƒɛɛ ɔ́sa-ma.

⁵Mina kayi keenú ɔlɛ teete Moab kadi bekyuli, ka bana bekyuli beekeli kekpo béti bésela Soa ku Eglat-Selesia lɛma kakaaka ƒui. Béti Luhit ɔma ulu na bákɔ bésela na beewulo. Na bakɛ baaká bana ɔgbankpi ala ku kɔnyana na Horonaim ɔma ulu lɛlɔ.

⁶Nimrim ntukpa bɔ́kwii! Na ɔƒɛ ɔ́du utubili livo lɛmmɔ ƒui, na livo lɛdi lɛsɔ liiide mmɔ.

⁷Anwuɔsu akɛla ani na bábla na báklibi bese lɛlɔ ni, béti-nya na bávia utukwalɛ ketudɔ egyii gyɛnglɛɛ ammɔ kemmo bátɔlɔku.

⁸Na kɔku kɔni na Moab kalɔ lɛlɔ bekyuli baabla ni, kɔvanu kɔmmɔ ku kɔnyana etemila aaku teetéwi Eglaim na ɔkɛ mmɔ útédu Ber-Elim na kalɔ kammɔ ɔmii lɛlɔ muedi.

⁹Dibon ketu ntu bɔ́ƒɔ ubugya, nsu ubugya ɔni nsɔ ndubo kama uuuse buɛɛ. Na Moabƒuɔ bani na banii bukeli na bada ni, gyata na ndubo budie bɔkya-ma ku bana ɛlɛɛ bani nébu ƒui.