Read Lelemi Yesaia 17 Bible Online

Yesaia 17 - Lelemi bible

Yesaia 17

¹Damasko lɛlɔ kɔtɛ. “Bɛnu! Damasko ɔma unengudi ɔdubɔyii udu na ɔƒaamu ɔdubunwini alakpi kebu bonwu kadi.

²Na lɛma linengudi lɛni na nwuna amadɔ ƒui lɛdubunwini baƒonu katɛnkɔ, na ukyuli ɔdi ulabɔku-ma.

³Eƒraim ɔma unengudi, ɔni na awodu bonwu aagyumana ɔdubɔyii udu na ɔsɔ ulakya, na Damasko lɛga kadikɔ kabwɛ ƒui, na Aram kadi nkyuli ɛlɛɛ bani mebu badubɔyila bana bukeye aani Israelƒuɔ.” Lɛni na Unwoti Ɔyikune Ƒui ɔ́su.

⁴“Na limeyi lɛmmɔ lɛlɔ ni, ala ani ƒui na Israel ubo ɔsu na uukeye adubɔyii udu, ɔsika ayaki adubo kalɔ kammɔ bɔda geen.

⁵Na kalɔ kammɔ kadubɔbla aani kemo kani na umonsene údie atu, uwi ɔni na báaƒɛ edula abunidi ƒui, ani nnye ku ebi sɛɛn bédie-ka kemmo. Lɛni geen na ɔdubuse aani Raƒaƒuɔ Kɔwɛ kemo kani kemmo na bávi bála lɛmuyɔ ƒui.

⁶Nsu bana ɛlɛɛ badi badubo bubu aani kalɛ na beeti ugyii ku asɔsɔ teede kɔdingyii ebi ƒui na kebu ɛlɛɛ na kayɔlɔ kɔgba akɔ. Lɛni na Unwoti Israel Katɔti ɔ́su.”

⁷Uwi ɔmmɔ ni, bekyuli badubunwini banu bana Udiene Israel Katɔti ɔni nse kedee.

⁸Na basɔ belésie bana akpabi ani na béti bana enu bávɔ béte lɛlɔ kudɔ, na basɔ beleti anu balasia Asera ɔƒiɔgyii ku nwuna lɛlɔ ala ku oloƒui bɔkyula akpabi ani na ama alati bátu mmɔ.

⁹Na uwi ɔmmɔ kemmo ni, bana lɛma lɛni na baagyumana kpakplaa na Israelƒuɔ bábɔku-ma bédie mmɔ lɛdubo bɔbwɛ na línwini aku.

¹⁰Bɛ́yiƒala bina Katɔti ɔni mɔɔƒɔ́-mii ngba, na bítenyimo bina kagyumanakɔ kpakplaa kani ndi lɛtakpɛ lɛni lɛlɔ na bíkpo kama. Ɔkɛnku ɔmmɔ ɔsu ni, ina ka bɛ́lɛ egyii abuni, na bíye adingyii abuni bɛ́siku kaƒɔ bíbalɛ,

¹¹na bɛ́nu-nya lɛlɔ ɔ́si ɔnta na áta álɛ lili kaduɛ ni, bilákɛ-nya biléde ɔsika bɛdubuduo lɛbibo ku bɔnɔ geen kemmo na nwuna kenye kelékulo.

¹²Binu bekyuli lisu kɔnyi kɔku kɔni ndubo, kɔku kɔni nse aani ɛpu ɔni mɔɔnwanɛ lɛlɔ, na uubó teebewi utubili! Binu kalɛ na badubo ku kudu ku kɔnyi.

¹³Nsu ina ka bábla kudu ku kɔnyi badubo lɛni ni, Unwoti ɔdubo-ma bɔbɔku busienku kama, aani kalɛ na ɔƒɛƒɛɛ uuƒwi aƒata taayulaku abi, iye kalɛ na ɔƒɛƒɛɛ uuduo kɔnwinimi kemmo taakya ligede.

¹⁴Bekisine bákya-bu liƒu ku bɔyia geen useyi uwi, nsu kadi bugye ni, bana ƒui báyii bákya. Bekyuli bani muukpóku-bu lɛyuƒɔla lɛdi mmɔ.