Read Lelemi Yesaia 19 Bible Online

Yesaia 19 - Lelemi bible

Yesaia 19

¹Linyesia lɛmɛni lɛdanku Egyipte kalɔ lɛlɔ. Bɛnu! Unwoti uli liƒlukutu bonwu lɛdi lɛlɔ, na ɔkɛ ku usi momoomo úsela Egyipte kalɔ lɛlɔ, na lɛlɔ lɛɛtɔ́ Egyipteƒuɔ baƒiɔ ku liƒu bonwu. Na Egyipteƒuɔ bammɔ alati báyɛyɛ, na enu áƒɛ-ma na bɔyia ɔsu.

²Ɔsika Unwoti ɔnini, “Ndubɔtu-ma lɛkya ama alati lɛlɔ lɛlɔ, na ama Egyipteƒuɔ lɛti lɛti bekpoku lɛlɔ. Ɔnwa ɔnanabi ɔdubukpoku ɔnwani ɔnanabi, na ɔkpana ukpoku ɔkpana, na ɔma ɔta na ukpoku ɔma na kalɛkɛ kata kekpoku kalɛkɛ.

³Na enu adubɔƒɛ Egyipteƒuɔ. Na libile bana kɔkwɛ ƒui, na beye kasiakɔ basiku bana baƒiɔ ku bekpine, ku bekebone ku bevone kudɔ banɔ.

⁴Na ndubuti Egyipteƒuɔ lɛkya ɔga lɛlɔ ɔdine ulikplune kalɔ, na ɔlalane ɔdi-ma lɛlɔ.”

⁵Nil Ketu kadubo bɔkwii kede kede, na ntu bɔdi bɔsɔ bulakya-ka kemmo, na kana kavikɔ kenwini kalɔkplu.

⁶Ntukpa bɔni nákya kenye Nil kemmo ƒui bɔdubo bɔda na buteenwenyi buɛ buɛ. Na Egyipte ntukpa bɔmmɔ butaakpɛ na bɔkwii ƒui, na ketu kemmo egyii mmɔ ƒui ekpi ayii udu na akwii enye,

⁷Na mmo bɔni na bése mmɔ ƒui bɔyii udu ku ketu kenye ku amadɔ egyii ammɔ ƒui.

⁸Kɔbɛ bediene badubo kɔnyana buteewulo, na bani mɔɔtu lɛdaa ku lɛsawu bewine ƒui badubo enu butaaƒɛ ku kɔnyana.

⁹Lɛbuli lidu adi bedine badubɔyila lɛnunsia, na bani mɔɔbla adi kpɛtɛ kpɛtɛ basɔ baláti kalɛ babla.

¹⁰Kayi kadubo bedine butaakpulu na kayu kenye kabla bablane beƒu.

¹¹Kɔdɔlɔ kútulo amii Soan ɔma kasusu betine, na amii bani ndi Ƒarao kelisa benengu kasusu kasɔ kalalɛ bekyuli kɔsia kɔdi. Dɛ na ɔdi ɔdubɔkana na ɔsu Ƒarao ɔnii, “Ami ndi banundane bammɔ akɔ unwi na kuuku baga bammɔ kudɔ na lɛ́tɛya ala?”

¹²Wɛ na bina banundane bammɔ bávi ɔƒɛni amu? Bɛya na basu-mii na binu kasusu kani na Unwoti ubo na Egyipte lɛlɔ.

¹³Soan ɔma kasusu betine bénwini badɔlɔdi. Na Memƒis ɔma benengu béƒu ku ɔkɔ etemila, na bekyuli bani lɛlɔ na Egyipte úkpo kama bákpanku-ma bésela batáyila.

¹⁴Unwoti ɔ́ya na lɛlɛɛ kɔyu kɔni mɔɔbla ukyuli gyuma gyuma mɔɔdi Egyipteƒuɔ lɛlɔ. Anwuɔsu na baagbánta na bana lɛla biala na baabla kemmo, aani kalɛ na ntɛkpine ɔɔdada na nwuna kɔdala akɔ.

¹⁵Egyipteƒuɔ basɔ beeebo lɛla lɛdi bɔbla, bati o-o, beni o-o, bebi o-o, ɔdi ɔsɔ uuubo lɛla lɛdi bɔbla lɛnɔ.

¹⁶Na limeyi lɛmmɔ lɛlɔ ni, Egyipteƒuɔ badubɔta babla aani beleku, na lɛlɔ litaatɔ-ma geen ku bɔyia na Unwoti Katɔti kɔnu kɔni na ɔ́talaku katɔ ɔnii ɔɔƒiɛmi-ma ɔsu.

¹⁷Na si bénu ka ukyuli ɔdi ɔ́lɔ Israel lɛnyi muedi ni, liƒu lɛdubuƒie-ma na kayi kemmo na lɛla lɛni na Unwoti ɔ́ɔklibi lɛlɔ úse ka ɔbla Egyipteƒuɔ ɔsu.

¹⁸Ɔmmɔ kama ni, Egyipteƒuɔ lɛma linengudi ɛlɔ badubɔtɛmi Kanaan lɛdi na badubuse kenye ka béti lɛlɔ béte Unwoti Katɔti kadi ƒui Unwoti. Na lɛma lɛmmɔ akɔ unwi baalɔ banii Ɔƒɛ ɔma unengudi.

¹⁹Na batu lɛkpabi na Egyipte kalɔ kemmo ntɛntɛ, na balɛ likpose lɛkpa lɛdi na lɛkpabi lɛmmɔ kɔmadɔ na ɔmii lɛlɔ.

²⁰Likposela lɛmɛni muudie kenye ka Unwoti Katɔti ɔdubo butaanu na Egyipte kalɔ kammɔ lɛlɔ na si báva bákpali-nwu na bekisine bukpoku ɔsu ni, na Katɔti uti ɔƒɔne ɔdi umene-ma na ubebunku-ma na bakɛ bɔƒɔ.

²¹Na mmɔ na Egyipteƒuɔ badubɔnu bɔti ukyuli ɔni na Unwoti ɔdi na bataakpa-nwu na bataakyula akpala ku etela bamba lɛnɔ teete-nwu. Badubuse kenye bete-nwu na badi linyese lɛmmɔ lɛlɔ lɛnɔ.

²²Unwoti ɔdubo Egyipteƒuɔ bubo bɔkya ɔlɛ, nsu anwu kani ndubo-ma lɛlɛ lɛmmɔ bunyimi na ɔbwi-ma. Ɔsika ɔdububo-ma kalɛ na benwini bebo-nwu kudɔ, na si békpi-nwu kɔtɔ ni, na unu-ma buvele na ɔbla lɛla lɛni na bévele-nwu ute-ma na ɔbwi-ma.

²³Uwi ɔmmɔ ni, ulu unengudi ɔdi ɔdubo bɔtɛ bɔsi Egyipte usie Asiria na Asiria ku Egyipte kadi bekyuli besie basɔ betenku lɛlɔ. Na kalɔ akpa anyɔ amɛni bekyuli bakpa Unwoti basala.

²⁴Na uwi ɔmmɔ kemmo ni, Israel ku Egyipte ku Asiria kalɔ bekyuli badubɔbla kadi akpa atɛ bani ndubo bɔsala na benwini kusɛ kusɛ bete bayawine ƒui.

²⁵Unwoti Katɔti ɔdubute-ma kusɛ kusɛ na ɔ́su ɔnini, “Kusɛ kusɛ ɔdubɔsiaku Egyipte mina kadi bekyuli ku Asiriaƒuɔ bani ndi mina enu kabla ku badi mina bekyuli na Asiria kadi bekyuli ku Israel kadi bani bekyuli na lɛ́ƒuna líte lɛlɔ.”