Read Lelemi Yesaia 21 Bible Online

Yesaia 21 - Lelemi bible

Yesaia 21

¹Unwoti údie lɛla lɛdi ɔ́tina na ɔdanku Babel. Kalɔ kakwiidi kani nwi ɛpu kɔmadɔ mmɔ lɛlɔ aani ɔƒɛƒɛɛ kpakplaa ɔni mɔɔkya ligede na uukpó na kalɔ kakwiidi kani na kada kakɛ mmɔ lɛlɔ, ala ubilene ɔdi ɔ́si kalɔ kakwiidi ɔni kani mɔɔda liƒu mmɔ lɛlɔ ɔdubo, lɛni na lɛla lɛni ndubo libebile ala na Babel lɛ́ɛsi kalɔ kakwiidi kani bekyuli lɛlɔ mbo liƒu mmɔ lɛlɔ lɛdububo.

²Katɔti údie liƒu lɛla bonwu lɛdi ɔ́tina-mi. Na lɛ́nu ulikplu ku kalala ala bɔbla ani na aládia bɔnu, bekyuli beedie bana bakpana teete, na babambadi beeƒie bekyuli ala taaƒɔ. Na kɔvanu kɔda, Elamƒuɔ bikpo-ma! Na amii Mediaƒuɔ, bɛka lɛma linengudi lɛmmɔ bɛkya! Na keku ku kɔnyana buwulo bɔni na ɔ́kya bekyuli ndubukulo-nwu kenye.

³Lɛla lɛmɛni lɛ́ya na mina kaƒɔna kádu-mi momoomo aani uleku ɔni ntɛ kɔwɔ, na ɔ́bla-mi aani bɔyila na nda ka línu lɛla lɛni na Katɔti ɔɔwia ka ɔbla. Lɛni na anumi ábla-mi suu na ɔ́bla-mi dɛye dɛye.

⁴Mina kasusu kéƒu, na mina kayi kaagyú taawɔ na bɔyia ɔsu. Na useyi uwi ɔni mɔɔwia ku udu na lɛnwuna ni, liƒu ala ani na mɔɔnu ɔsu naaakana lɛnumi bubile.

⁵Báklibi kadikɔ ku kuliekɔ kabuni bése, na badubo bɔdi na bani! Amii batɔnkune bammɔ, bɛta kɔnakunwi biti bina agyumanala na bísusu-ku nnɔmii!

⁶Lɛla bamba lɛni na Katɔti ɔ́su-mi ndi ɔnini, “Wia ɔgyumanane ɔdi nyene kesii kadi, na utaanu ala ani mɔɔlɛ́ taasu-ɔ.

⁷Na si ɔ́nu bekyuli bani nlie bapɔnkɔ lɛlɔ, ku bani nlie bebuo ala betine geen ku benengudi bani mbo keƒu lɛlɔ ni, ɔsia-ma anu kaduɛ na ɔsu-ɔ lɛla biala.”

⁸Na ɔgyumanane ɔmɛni ɔdubɔkpali ɔsu ɔnini, “O Unwoti, nnye mina bagyumanane ɔsangya na katɔ mɛni, kesii kani na ése-mi usien ku ɔƒɛ umodi ƒui, limeyi ndi limeyi.

⁹Bɛnu! Aanu kɛɛkɛ ku ukyuli ɔdi na bapɔnkɔ báni badububoku na bekpone lisu lɛdi belie bapɔnkɔ lɛlɔ na báda baalɛ́! Mmɔ ni, ukyuli ɔmmɔ údie lɛdi na ɔɔsu ɔnini, ‘Úbuli o-o, Babel úbuli na nwuna baƒiɔ bani na ɔ́nwi ku bani na ɔ́vɔ ƒui ni, bábwɛ-ma béwi kalɔ!’ ”

¹⁰O amii, mina bekyuli, bésusu-mii aani kalɛ na beewiile edula ebi teewi kakpa, na mɔɔsu-mii lɛla lɛni na Unwoti Ɔyikune Ƒui, Israel Katɔti, ɔ́su-mi ɔnii mbasu-mii.

¹¹Unwoti údie lɛla lɛdi ɔ́tina na Duma kalɔ lɛlɔ. Na línu ka ukyuli ɔdi ɔ́kpali-mi ɔ́siku Seir abi lɛlɔ ɔnini, “Ɔgyumanane, usien uwi ɔmani kemmo na bɔkya mɛni? Na uwi ɛlɛ asa na kadi kadubugye?”

¹²Mmɔ na ɔgyumanane ɔmmɔ údie kenye ɔnini, “Kadi aka kéegye káwɔlɔ, nsu ɔƒɛ ɔsɔ ɔdubo bɔsa. Na si aayɔ́ enu lɛla lɛmɛni kalɔ ebu ni, na asɔ enwini ebo ebeye-mi kaduɛ.”

¹³Unwoti údie lɛla lɛdi ɔ́tina Arabia kalɔ lɛlɔ. O amii bekyuli lisu bonwu bani nékeli bɛ́si Dedan kalɔ lɛlɔ na bíbo bíbawia kabɛkɔ na Arabia kalɔ alakpi akɔ,

¹⁴amii Tema ɔma bekyuli, biti adila ku ntu biboku baƒɔ bani na utukwɛ ɔɔda, baƒɔ bani nékeli bana ɔma mɛni.

¹⁵Kuwii ku kɔtaminta atula yayaaya kenye na békeli bási, na kekpo kani nányi anyi mmɔ kemmo.

¹⁶Unwoti ɔ́sɔ ɔ́su ala bamba lɛnɔ ɔnini, “Na lɛkwa linwi kemmo pɛpɛɛpɛ kalɛ kani na ukyuli ɔni na bése ɔkpa ɔɔká nwuna emeyi ani na ɔdubɔbla kabla ute nwuna ɔtɔlati ni, Kedar kadi bekyuli badubɔyila bana ala ani ƒui na bebo ɔsu na bebo ɔyikun na báƒɔ lɛnyi.

¹⁷Na bayikune pii bani náƒɔ lɛnyi na Kedar bekpone akɔ bani mɔɔní kɔtaminta teebo atula teetulo ni, bana ɛlɛɛ kani mebu. Ami, Unwoti Israel Katɔti, násu!”