Read Lelemi Yesaia 23 Bible Online

Yesaia 23 - Lelemi bible

Yesaia 23

¹Unwoti údie lɛla lɛdi ɔ́tina na Tiro lɛlɔ. Amii Tarsis beyedine bani mɔɔsia ntu anumi ku lɛkɔlɔ na bɛɛdi kuye teesie Tiro, biteewulo kɔnyana, ɔsika bákyula Tiro, na ɔtɔ iye kabɛkɔ iye lɛkɔlɔ kalɛlɛkɔ kadi kasɔ keeebo. Beyedine bammɔ bénu kenye kamɛni uwi ɔni na báyu bébedu ntuntɛ kalɔ kani baalɔ Kipro.

²Bɛbla kpoo ku kɔnyana, amii bani nli ɛpu kalɔ ƒiaa lɛlɔ, ku amii Sidon beyedine lɛnɔ ƒui, na lɛla lɛni nébo ɔsu. Bina batalane bávia ɛpu anumi ekpo ekpo

³na bakɛ ntukpa lidu lidu lɛlɔ. Bésie bétédu Sihor ku Nil ntukpa bonwu lɛlɔ, na beeyé edula lidu lidu ebi teeboku-mii. Na Tiro mmɔ kénwini kuye kadikɔ bonwu kéte bayawine ƒui.

⁴Kɔƒa kukpo-mii, amii Sidon beyedine bani náƒɔ ɛpu ɔmmɔ ƒui anumi bilie-nwu lɛlɔ kpi, nsu kɔsia kɔdi kútalɛ-nwu kemmo, ɔsika ɛpu ɔmmɔ ɔlati mɔɔsu taatina ɔnini, “Nse aani ukyuli ɔni na kawɔƒɔ kátadu-nwu kudii iye útawɔ kudii. Na ńtada bakloƒu iye begblebi lɛnɔ dii.”

⁵Na si kenye kamɛni kétédu Egyipte ka lɛni nébo Tiro lɛlɔ ni, kɔnyana kɔdubo-ma buƒie.

⁶Bikeli beteesie Tarsis, na amii ntuntɛ kalɔ bekyuli beteewulo!

⁷Lɛlɔyɔ ku emeyi bɔdi ɔma ɔkukudi ɔmmɔ na ɔdi mɛni? Ɔma ɔni bekyuli návi bésie ɔgyu geen náyii udu lɛni?

⁸Ɔyikune ɔmani kakwɛ ku kasusu náya na ɔmɛni úbo Tiro lɛlɔ? Ɔma ɔni kemmo na nka adubɔkɛ lɛla lɛla na ukyuli ɔɔwia náta únwini lɛni? Ɔma ɔni beyedine na bekyuli baabu aani bekyuli batɔnkune ku lɛlɔ badine na ɔdi mɛni?

⁹Unwoti Katɔti Ɔyikune Ƒui nábla lɛla lɛmɛni udu, kalɛ na ala ani lɛlɔ lɛmɛne bekyuli baakun ka eekeye ayii udu. Na bani na báƒɔ lɛnyi na kalɔ lɛnɔ mɛni uboku-ma kalɔ.

¹⁰Amii Tarsis kadi bekyuli bɛtuma bina kalɔ kalɛ biala na bɛdubɔkana ina Nil bune, ɔsika ásɔ eeebo beyedine lɛkɔlɔ kalɛlɛkɔ.

¹¹Katɔti údie kɔnu na ɔ́tina nwuna ɔyikun ɔni mɔɔdi ɛpu lɛlɔ, na ɔɔkunku kayawi lɛga kɔdikɔ ƒui. Úbo ɔda ɔnii bekisine babwɛ Tiro ɔma kɔgyumanakɔ kpakplaa ƒui.

¹²Na ɔ́sɔ ɔ́su ɔnini, “Ƒula lɛlɔyɔ ku emeyi bɔdi kenye kékulo. Awɔ Sidon ɔma ɔbuni ɔni nse aani adagyaa, ɔƒɛni amu áyii udu! “Bɛta na bɛvia bisie Kipro, nsu mmɔ muedi bɛɛɛdubo bɔkɛ bɔnwuna bɔdi.”

¹³Amii binwini bɛnu Babel. Mmɔ kasɔ kaaadi keliekɔ buni kadi Asiriaƒuɔ békpo-ma, na mmɔ kénwini bakumbweyi keliekɔ. Bátu kunyekɔ bámana awodu ammɔ na bénye báƒɛ bana kɔgyumanakɔ kɔmmɔ ku awodu ammɔ ƒui, na báyila lɛla biala udu na mmɔ.

¹⁴Na amii Tarsis lɛkɔlɔ beyedine biteewulo keku ku kɔnyana, ɔsika bábwɛ bina kɔgyumanakɔ kpakplaa kɔmmɔ na kɔ́yii udu!

¹⁵Na uwi ɔni kemmo na ala amɛni adubɔlɛ lɛni ni, bekyuli badubɔyiƒala Tiro akwa liti ku aavlanyɔ uwi ɔni na ɔga ɔkana na ulie ngba ɔdi lɛga. Nsu na akwa liti ku aavlanyɔ amɛni kama ni, bekyuli badubudie ɔnu bɔsia Tiro aani ɔyalɛ kalɛ.

¹⁶Na batu kɔgya banini, “Ɔyalɛ ɔni nákɔ ligblebi dii, sɔ ti ƒula ɔbentaa na asɔ atu ƒula lɛnu mini mini lɛmmɔ avi ɔma, na bekyuli kayi kasɔ kenwini kasia-a lɛlɔ aani kalɛ na úse kuuku.”

¹⁷Na akwa liti ku aavlanyɔ ammɔ kama ni, Katɔti ɔdubɔbla ku Tiro lɛla lɛni na ɔɔyɔ́ na ɔya na basɔ benwini besie bana kabla kuuku kudɔ, na badi ku kayawi bekyuli ƒui kuye.

¹⁸Nsu na kawɔlɔkɔ ni, kɔsia kɔni na Tiro kadi bekyuli bamɛni bákɛ na bana kuye bɔdi kemmo ni, belému-nya belése lɛlɔ kani. Mmomu badubudie-ku bese sɛsɛɛ bete Unwoti na beti babla kabla na beye adala ku adila abuni bete bekyuli bani mɔɔbla Katɔti kabla.