Read Lelemi Yesaia 27 Bible Online

Yesaia 27 - Lelemi bible

Yesaia 27

¹Na kɔnyi limeyi lɛmmɔ lɛlɔ ni, Unwoti ɔdubo ku nwuna kewii bonwu kani mbo ɔkplu na kebo ɔbi yayaaya, na ɔni bayikune bani ntulo ƒui mmɔ kɔtu. Ada bonwu ɔni muukeli, na ɔɔkono lɛlɔ taatu teetéwi, ku liƒu kebweyi bonwu kani na ɛpu kemmo, na badi bayikune mmɔ na ɔdubo bɔdu ƒui.

²Na limeyi lɛmmɔ lɛlɔ ni, Unwoti ɔdubɔsu ɔnini, “Bidie ɔnu na egyiibi kemo kani mɔɔnwu kaduɛ mɛni lɛlɔ.

³Bɛsu ka ami Unwoti mɔɔnu kemo kammɔ lɛlɔ. Na muuwi-ka ntu uwi ndi uwi na mɔɔgyumana-ka lɛnɔ usien ku ɔƒɛ kalɛ na ukyuli ɔdi ulésie uletébile-ka.

⁴Ńtakɛ kɔnyi na kemo kammɔ lɛlɔ. Ɔsika si bekisine badi-mi aani liyu ku alakpigya ni, nka ndubuduo-ma lɛlɔ mmɔ na lɛkyula-ma ƒui.

⁵Na si use lɛni na békeli bébekpi-mi kɔtɔ na báwia ka buwi kenye ntu na bɔbla unwi ni, ɔdia-ma utulo.”

⁶Uwi ɔdubo ɔni mina kadi bekyuli badubo ligyiitu budie na Israel kadi bamɛni badubo bɔta na bedie evete na banwu ebi pii beyile kayawi.

⁷Bɔni na Unwoti ɔ́ni Israelƒuɔ kɔtu kalɛ na ɔ́ni bana bekisine kɔtu? Munuu ɔ́du-ma kalɛ na ɔ́du bekyuli bani nádu Israelƒuɔ?

⁸Kekpo ku bana bɔbɔku taatákya kɔlɔ bamba kemmo ndi lɛla lɛni na éti ékpoku-ma aani ɔƒɛƒɛɛ kpakplaa ɔni muukpó taasi ɔƒɛ katukɔ na uubó ala taatɔlɔku.

⁹Na ɔkɛnku ɔmɛni lɛlɔ na ndubudie kɔtu bɔni bana lɛlɔ na bana ekpidi ammɔ alɛ-ma lɛlɔ ƒui. Na lɛnɔ ni, ntu bábwɛ akpabi ani na bátu ku atabi mmɔ kpɛtɛ kpɛtɛ. Na babwɛ Asera baƒiɔ na bagyu-ma ku lɛƒiɔgyii lɛmmɔ na abi lɛlɔ kesii kani na baakyula oloƒui teete-ma mmɔ ƒui na basɔ balanu ka ɔdi unye.

¹⁰Na Israel lɛma linengudi lɛni na bátu bámana mmɔ ƒui asɔ elénu kɔku kɔdi nina kemmo, ɔsika badubɔda lɛma ku kɔduli kɔmmɔ bewi na kɔkwɛ livo ɔbla aani kalɔ kakwiidi kesii kani na bebuo baaví na beekpeli egyii evete taakun taatɛ mmɔ na evete asa kɔgba kɔmmɔ lɛlɔ.

¹¹Na si egyii ammɔ kɔgba kɔ́kwii ni, kɔɔƒɛ na beleku babayɔ-ku basala ogya. Ɔsika lɛni na Israel kadi bekyuli bamɛni bese na belenu na balanu ala taati. Anwuɔsu na bana udiene lɛnɔ ɔɔɔdubo-ma kɔnyana bɔnu.

¹²Nsu ni, uwi ɔdi ɔdubo ɔni na Unwoti ɔdubo-mii bubo kedenkɛ lɛlɔ na ɔla-mii unwi unwi ɔsiku Euƒrate Ketu kɔtu na ɔƒɛ katukɔ útédu Egyipte utukwalɛ kalɔ na ɔƒɛ kanukɔ aani kalɛ na beebó kamu na kedenkɛ lɛlɔ teewiile-ka ebi.

¹³Na badubɔvwi lise bete bani na báyii bakya Asiria kalɔ lɛlɔ ku bani na bábɔku bálɛku Egyipte kalɔ lɛlɔ na limeyi lɛmmɔ lɛlɔ na bebo bebemwi Unwoti na kɔbi kedee kɔmmɔ lɛlɔ na Yerusalem.