Read Lelemi Yesaia 29 Bible Online

Yesaia 29 - Lelemi bible

Yesaia 29

¹Bɔbuɛ beete awɔ Dawid ɔma unengudi, kesii kani básia lɛnyi banii Ariel, ɔsika eeti ƒula akpala teeboku lɛkwa ndi lɛkwa taabakpa.

²Nsu ina amu ndubɔya na ɔgbankpi ɔsiaku-ɔ na adubo keku ku kɔnyana buwulo. Na Yerusalem ɔdubo ubese aani Ariel ɔni kalɔ ndi lɛkpabi lɛni na ubugya ɔ́ƒɔ-ni lɛlɔ ƒui.

³Ndubɔya na baka-a bakya lɛƒɛnyi ƒui lɛlɔ na lɛya na batu kɔgyumanakɔ kɔni nákuku bamana-a na lɛbla kunyekɔ kesii kani na badubunye bayila ɔma ɔmmɔ udu.

⁴Na kaƒiɔtɔ kani kemmo na badubo-ɔ bɔva ni, mmɔ na adubo kabɛnsɛ butaatɛmi taasiku aani ukpine kɔyu na kalɔ kemmo mmɔ na ɔtumu akɔ.

⁵Nsu ɔƒɛƒɛɛ kpakplaa ɔdubo ƒula bekisine bubo bɔtɔlɔku kɔnakunwi aani ɔtumu ku aƒaƒaa.

⁶Na Unwoti Ɔyikune Ƒui ɔdububo, na bɛdubunu ka katɔ keedu momoomo, na kalɔ kaakunku, na ɔƒɛƒɛɛ kpakplaa uukpó, na ogya ɔni mɔɔkyula ala uudie unyemi.

⁷Na kadi balalane bani ƒui muukpó Yerusalem na baayá na uubó abi ni, badubo bɔyii udu aani kalɛ na baatɛ teegye kɔna na kɔyi-ɔ si kadi kégye.

⁸Kɔka ku utukwɛ ɔdubo kadi bekyuli bani ndubo bɔta bukpo Yerusalem bɔda geen. Na badubugye kɔna na ɔbla-ma aani bɔdi na bada nsu badubɔta na banu ka kɔna kani na bégye na kɔka ku utukwɛ ɔmmɔ ɔdubɔkɔ katɔ ubu.

⁹Amii bibulo bɔƒɔdi na bibile bina anumi na bibulo bɔnu. Na bɛkɛ bitaagbanta ina ka ɔɔɔdi ntɛ na bɛ́ni! Na bɛdubɔnu liƒu lɛla lɛni ndubo libalɛ-mii lɛlɔ.

¹⁰Unwoti ɔ́ya na lɛlɛɛ lɛ́ƒɔ-mii anumi susuusu na bɛ́lɛɛ bísie ɔgyu. Na úti ala úbi bina lili ku anumi amii bani ndi nwuna kenye bediene ku bekyuli bani mɔɔnu ala taasu bekyuli.

¹¹Na kenye kani na budie taatina bɔmɛni bɔdanku ƒui bɔdi lɛbɛla lɛni na Katɔti útile-mu kenye. Na si ɔdi ɔgyi bɔka muedi ni, ɔdubɔsu ɔnini, “Bétile bunweni bɔmmɔ kenye ɔsu bulakana bɔka.”

¹²Na bani na baaagyi bɔka lɛnɔ badubɔsu banini, “Bɔɔɔdubo bɔkana bɔka.”

¹³Unwoti ɔ́su ɔnini, “Bekyuli bamɛni bada bana kenye kani baabu-mi, nsu balayɔ-mi na bana kayi kemmo. Keeke kani na baabla-mi kabla. Baatina kayawi lɛlɔ ala aani si mina ɔda bubo bɔdi.

¹⁴Anwuɔsu nsɔ ndubo-ma buyu bɔtu ku liƒu ala ani ndubɔbla-ma kalɛ kadi. Ndubo banundane lɛnunda udu bɔyila. Na lídie lɛ́tina ka bakutine lɛnunda lɛɛɛdi lɛla lɛdi.”

¹⁵Bɔbuɛ beete bekyuli bani mɔɔbla ala bɔbɛ kemmo na baakali ka Unwoti ɔɔɔgyi, na baabla ala lɛdisa kemmo na beeye banini, “Ɔma mɔɔnu-bu? Na ɔma ndubo bɔti?”

¹⁶Bínwini ala bɛ́lɛ kekuma, aani si lɛvɔti náƒɔ kuye litulo ɔvɔne, munuu lɛkyami lɛni na bávɔ mmɔ lɛdubɔkana na lɛsu ɔvɔne ɔnii, “Ɔɔɔdi awɔ návɔ-mi?”

¹⁷Na uwi klukwii ɔdi kama ni, Lebanon akumiɔ ƒui adubunwini edula mmo, na edula ammɔ adubɔlɛ enye kemo na ana bɔdia adubɔbla aani lɛku na nnye.

¹⁸Na uwi ɔmmɔ kemmo ni, batutine muedi badubo buteenu ala ani na baaká teete-ma taasiku ɔku ɔdi kemmo. Na ɔbla banumbwɛne nwaa ɔni na ɔsɔ ulése-ma suu aani lɛdisa kemmo na bakya.

¹⁹Na bawabane ku bani mɔɔyaki ala ƒui ni, badubɔdi limeyi ku kɔvanu na bebo kudu momoomo na Israel Unwoti Katɔti ɔni nse kedee ɔsu.

²⁰Na balalane ku belikplune ƒui badubo udu bɔyii. Na bani mɔɔsa lili likpidi na lɛsɛ ala bɔbla lɛlɔ badubo bɔyii kɔnakunwi.

²¹Na ɔkɔ kenye bediene bani mɔɔnyi ɔkɔ teedie ala kenye kalɛ na badu bekyuli bani na nka bátaƒiɔ kɔtɔ lɛ́nɔ badubo bɔyii ƒui.

²²Anwuɔsu na Unwoti ɔni nédie Abraham ɔ́su Israel kadi bekyuli ɔnini, “Liƒu lɛsɔ lɛɛɛdubo mina kadi bekyuli bɔda na kɔƒa lɛnɔ kɔsɔ kulékpo-ma.

²³Ɔsika si bánu bana bebi pii bani na bebo ku kalɛ na líte-ma kusɛ kusɛ na bákɛ ala pii ni, badubo ami Israel Katɔti kedee butaabu na beteemwi-mi.

²⁴Na ukyuli biala ɔni na ɔ́yii ulu, ɔsu na ɔɔƒiɔ́ na kɔyu kemmo ni, ɔdubunu ala kalɔ na ɔbla-nwu nwaa. Na bani na mɔɔkya unyeƒi lɛnɔ ni, badubunu mina ala ani na mɔɔtina-ma kalɔ na badi-mu lɛlɔ.”