Read Lelemi Yesaia 3 Bible Online

Yesaia 3 - Lelemi bible

Yesaia 3

¹Unwoti ɔni ndi Unwoti Ɔyikune Ƒui ɔdubutile kebunku biala kuƒi, na ɔdubɔya na adila ku ntu bɔsɔ bulédu Yerusalem ku Yuda bekyuli,

²kadi bayikune ku bekpone, litemi batɛne ku kenye bediene, ku bani muubó like ku benengu ƒui,

³ku bekpone esu batɔnkune ku bekyuli babune ku kasusu bakyane ku enu kabla lidu bablane ku bani mɔɔkanti taakya ala.

⁴Na bakloƒu na ɔdubɔya na bataanu-ma lɛlɔ, na ɔya na banamu keeke bataadi-ma lɛlɔ.

⁵Na bekyuli badubo lɛlɔ butaanya taakya, na banwani ku bakpana beteekpoku lɛlɔ. Bakɔdi badubɔta benye benengu lɛlɔ, na bani na nka balábu-ma kadi akɔ badubɔta benye bekyuli babune lɛlɔ.

⁶Na uwi ɔmmɔ ni, ɔnwa ɔdubɔta na ɔsu ɔnwani na ɔti kaduli ɔnini, “Ka awɔ ebo ala adadi ɔsu ni, awɔ nwini bula ɔtɔnkune na anu kalɛ na aklibi ala ani nébie mɛni!”

⁷Nsu ɔdubudie kenye ɔnini, “Oowo! Lɛɛɛdubo bɔkana kebunku kadi bute, ɔsika liiibo adila iye adala adi na mina kaduli, anwuɔsu tabla-mi ɔtɔnkune tete bekyuli bammɔ.”

⁸Yerusalem ku Yuda lɛma ƒui lɛdubo bubie na ala ƒui eƒu akya, ɔsika bana etemila áta énye Unwoti lɛlɔ, na béni ka babu anwu ɔni muukeye na bana akɔ.

⁹Na bana anumi lɛlɔ muedi adubɔnu bana bɔƒiɔ ati. Na anumi ku anumi na baabla ekpidi ammɔ, aani Sodom kadi bekyuli kalɛ na balábɛla-nya muedi. Bɔbuɛ ute-ma! Ama alati néti bana ɔgbankpi kɔtu bɔni béboku lɛlɔ.

¹⁰Su bekyuli bani nse siin anii, ɔdubɔtɛ ute-ma ɔsika badubɔdi bana kabla ebi.

¹¹Bɔbuɛ ute likyulikpi ala bablane! Ɔgbankpi ɔ́ɔda ɔ́lɛ-ma lɛlɔ! Bana enu kabla lɛyuƒɔla badubo bɔƒɔ.

¹²Bekyuli bani ablala nse aani banamu mɔɔnya mina bekyuli taakya, na beleku baadi-ma lɛlɔ. O mina kadi bekyuli, bina batɔnkune bákpanku-mii bésela batáyila. Bákpanku-mii bálɛku ulu geen ɔmmɔ lɛlɔ.

¹³Katɔti úusie ulie kalɔ na litemi katɛkɔ, na ɔdubo bekyuli ƒui litemi bɔtɛku.

¹⁴Ɔdubɔtɛku nwuna kadi benengu ku batɔnkune litemi ɔnini, “Amii nébile Yerusalem ɔni nse aani mina adingyii ebi kemo. Na bíyile bina kɔduli ku ala ani na bíƒie bɛ́ƒɔ bawabane kudɔ.”

¹⁵Unwoti Ɔyikune Ƒui ɔnini, “Ulu ɔmani udu na bɛ́kɛ, na bɛɛkɔ́ mina bekyuli bawabane kpɛtɛ kpɛtɛ lɛni binwini ɔtumu?”

¹⁶Unwoti ɔnini, “Yerusalem beleku balábu. Bákpa bana amɔ bakɛ beesé anumi teete banana, na bana enwu eti kayaa, na ala ani nda-ma akɔnkɔ ku anikpo aabla kɔku na beebó lɛlɔ kudu. Katɔti ɔdubɔni-ma kɔtu.

¹⁷Unwoti ɔdubɔya na bana eli alɛ alɛlɛbi na bana eli apa na linwini lɛsɔ lilákwɛ.”

¹⁸Limeyi lɛmmɔ ni, Unwoti ɔdubɔda bana ala abuni ani na beeti taaklibi lɛlɔ udie-ma lɛlɔ. Ala ammɔ adi ndi asɛɛ ani na baakya amɔ ku ani mɔɔƒa bana lɛduuku lɛlɔ ku duuku ɔmmɔ alati

¹⁹ku asɛɛ ani baakya atu ku usɔ ku aduni ani baabala amɔ.

²⁰Na ɔdubudie bana dukuu ku asɛɛ ebi ani nda-ma anikpo, ku kedi kani baabala agblinti, ku ligyulo ku ala ani na beeti teeƒie bakyuli kayi.

²¹Na ɔdubudie bana asikpɛɛ ku sika ugyiedi ala,

²²ku limeyi kadikɔ adala ku lɛwu gyɔlɔɔ ku bana sika ugyiedi ala ani náƒɔ kuye ku egulabi kɔvumi wɛlɛ wɛlɛ kɔmmɔ ƒui

²³ku bana kɔnu kɔni baanu lɛlɔ ku lɛwu kpɛtɛ kpɛtɛ gyɔlɔɔ ku ala ani beeti taakya bana eli bɔdia ku aduni ani beebi eli ku amangba mmɔ ƒui ɔdubo-nya budie.

²⁴Na bana ugyulo ɔnyi ƒɛƒɛɛ ɔmmɔ ɔdububie. Na bana agblinti aduni buni enwini lɛbuli lɛbuli. Na bana eli linwini lɛni báklibi ƒui lɛdubɔyii udu. Na benyimi adikpi na lɛwu buni gyɔlɔɔ lɛmmɔ kenye. Na bayila bana bɔdia ƒui, na beti kɔƒa kani bataavi.

²⁵Bana banana badubukpi kekpokɔ na kuwii kenye, na bekpone batɛ kekpo.

²⁶Na Yerusalem lɛban kenye ƒui lɛdubuse aani bekyuli bani néduo kɔnyana, na beewulo bani nékpi. Na ɔma umodi ɔmmɔ ɔdubɔbla aani uleku ɔni náyu uwi kalɔkplu na ɔsɔ uuubo lɛla lɛla.