Read Lelemi Yesaia 32 Bible Online

Yesaia 32 - Lelemi bible

Yesaia 32

¹Ɔga ɔdi ɔdubo ubadi bekyuli lɛlɔ ulu siin lɛlɔ, na lɛlɔ badine batɛ etemila na ulu geen ɔmmɔ lɛlɔ.

²Na badubunwini kabɛkɔ bete bekyuli si uwi ɔni na ɔƒɛƒɛɛ kpakplaa uukpó. Na badubunwini libiɔ bete bekyuli na kalɔ kakwiidi kemmo ku lɛtakpɛ lɛni ndubɔkya bekyuli ɔyuli si ɔƒɛ ɔɔbi.

³Na ukyuli biala na ubo anumi ɔdubo-nya bubimi na ɔnu, na bani na bebo atu lɛnɔ badubuse atu na benu.

⁴Na bekyuli bani na beeebo lɛlɔ buwi na bana lɛlɔ kemmo lɛnɔ badubɔkɛ kayi na babla kasusu. Na bani mɔɔtɛmi taawalɛ lɛnɔ badubɔtɛmi siin.

⁵Basɔ balakya lili kalɔ belete badɔlɔdi ɔƒɛni amu. Na bekyuli bekpidi basɔ balákɛ kenyekɔ kadi na bekyuli akɔ aani babune.

⁶Adɔlɔtɛ na badɔlɔdi baatɛmi, na likpidi bɔbla kɔkwɛ kani na baakya. Na baasu ɔkɔ ala teedumi Unwoti na baayá na kɔka ku utukwɛ ɔɔdú bekyuli na beekpi.

⁷Balalane ni, ɔkɔ na baanyi taasu ala, na baabla likyulikpi ala na baakya likpidi kɔkwɛ kalɛ na badu bekyuli bani nse kpɛtɛ kpɛtɛ na baayaki ala na belenu-ma buvele ina dɛ na beekpi-ma kɔtɔ banii banu-ma kɔnyana.

⁸Na bekyuli babuni ama baawia ulu ɔni lɛlɔ na basia beteebunku bekyuli. Na ɔmmɔ ɔsu na badubɔkɛ kusɛsɛ na benye kpakplaa uwi ƒui.

⁹Amii beleku bani nédie lɛlɔ atu na bɛɛɛdaku lɛla biala lɛda ni, bise atu na binu lɛla lɛni na ndubo-mii bɔsu!

¹⁰Lɛla lɛdi lɛɛɛdubo-mii tɔ bukpoku ɔƒɛni nsu asa na lɛkwa liteedu ni, bɛdubɔti kalɛ na use. Akutu udewi ɔɔɔdubo kɔtɛ bɔbla, na mmɔ na lɛlɔ lɛdubo-mii bɔtɔ.

¹¹Amii beleku bani na bulie kani na bilie na bilábla kasusu taasiku lɛla lɛdi lɛlɔ ni, bɛya na lɛlɔ litaatɔ-mii kpakpaakpa ku liƒu! Bidie bina adala bise na binyimi ala ani mɔɔtina ka biiwulo kɔnyana.

¹²Biti enu biwi kayi ku kɔnyana na ala ani ndubo bɔlɛku bina adingyii mmo ku mmo bamba lɛnɔ ƒui ɔsu, ku ala ani ndubɔlɛku Yerusalem lɛnɔ ɔsu.

¹³Mina kadi bekyuli kalɔ ƒui kadubunwini liyu kalɔ sɔɔn.

¹⁴Baga kesii kadubɔƒɔ lɛlɔ kese ukpludi na ɔma ɔni kemmo na nka bekyuli báƒɔ-nwu kemmo tɛtɛɛtɛ dii ɔdubɔsa ɔbla ukpludi. Na bekpone kɔgyumakɔ kpakplaa ku lɛma kɔgyumanakɔ ƒui kɔdubunwini alakpi akɔ bebuo kaƒiakɔ na kunwini baƒonu kadikɔ.

¹⁵Uwi ɔni na Unwoti ɔdubɔsɔku nwuna kɔyu ute-bu ɔsiku katɔ ni, kɔlɔ kɔkwiidi ƒui kɔdubunwini adingyii mmo bɔni adingyii ndubɔlɛ lili abla aani aku, na kalɔ kammɔ kadia geen.

¹⁶Na litemi lɛlɔ bɔdi ku ala bɔbla ulu lɛlɔ siin ndubɔkya mmɔ.

¹⁷Na ka ukyuli biala ɔdubɔbla ala ulu lɛlɔ siin ɔsu ni, keyi buɛɛ ku atu bɔyɔ bɔdubɔkya na ukyuli biala ɔƒɔ ɔkpana ɔdi.

¹⁸Amii Unwoti bekyuli bɛdubulie kpoo ku keyi buɛɛ na atu ayɔ-mii na bina kɔkyakɔ ƒui.

¹⁹Na si ina ɔƒɛƒɛɛ ku ɔnantu ku etubankɛ aana teebile ala, na lɛma lɛɛbwɛ muedi ni,

²⁰Unwoti ɔdubute-mii kusɛ kusɛ uwi ɔni na bɛɛvá bina edula na ketu kɔtu na bina bebuo ala betine ku bebuo bamba badubusie bavi ƒaa na lɛla lɛdi lilabla-ma.