Read Lelemi Yesaia 39 Bible Online

Yesaia 39 - Lelemi bible

Yesaia 39

¹Na uwi ɔmmɔ kani kemmo ni, Babilonƒuɔ ɔga ɔni ndi Baladan ubidi Merodak-Baladan únu ka Ɔga Hesekia úƒi na ɔ́ta ɔlɛ ɔmmɔ. Anwuɔsu ɔ́tala bekyuli na úti kakunkɛ ku etela adi úte-ma ka béti béteesienku-nwu.

²Hesekia ɔ́ƒɔ baƒɔ bammɔ ku ebiti na úti-ma ɔ́vinku nwuna ɔtɔ ɔni kemmo na uusé nwuna ala. Na ɔ́tina-ma nwuna akɛla ƒui ku nwuna sika ɔƒualadi ku ugyiedi ku nwuna kutu akyala ku awɛɛla ani muunwenyi ƒɛƒɛɛ ku nwuna ekpola ƒui na lɛla biala lítebu ɔni na úteti útatina-ma.

³Ɔmmɔ kama kenye udiene Yesaia úsie Ɔga Hesekia kudɔ na úye-nwu ɔnini, “Wɛ na bekyuli bamɛni bási na bi na básu-ɔ?” Na Hesekia údie kenye ɔnini, “Bekyuli bammɔ bási ɔgyu kakaaka na Babilon kalɔ lɛlɔ.”

⁴Na Yesaia úye Hesekia ɔnii, “Bi na bekyuli bammɔ bánu na ɔga kaduli mmɔ?” Amu na Ɔga Hesekia údie kenye ɔnini, “Lɛ́ya bekyuli bammɔ bánu lɛla biala. Na lɛla lɛdi lítebu na ala kesekɔ ɔtɔ ɔmmɔ kemmo ɔni na ńtaya na banu.”

⁵Amu na Yesaia ɔ́su Hesekia ɔnini, “Se atu na enu lɛla lɛni na Unwoti Ɔyikune Ƒui ɔnii mbasu-ɔ.

⁶‘Uwi ɔdi ɔdubo ɔni na lɛla biala lɛni nse ɔga kaduli mmɔ ku ala ani na ƒula baga bani na bélie bávi báwia bése úbedu ɔmwi kadi badubo-nya buti busienku Babilon kalɔ lɛlɔ ɔni na belébu lɛla lɛdi belése.

⁷Na badubo awɔ ɔlati bawɔ badi buti bɔtɔlɔku busienku Babilon na bedie-ma agobɛɛ. Na badubunwini Babilonƒuɔ ɔga kabla bablane.’ ”

⁸Na Hesekia únu kalɔ ka ɔdubo atu bɔyɔ bɔkɛ na ɔkɛ Unwoti kagyumana na nwuna ngba uwi ƒui. Anwuɔsu údie kenye ɔnini, “Kenye kani nási Unwoti kudɔ kébo-mi kudɔ mɛni kadia.”