Read Lelemi Yesaia 40 Bible Online

Yesaia 40 - Lelemi bible

Yesaia 40

¹Katɔti ɔnini, “Sia mina bekyuli kɔnu.

²Na atɛmiku Yerusalem ku lɛdi buɛɛ ku bɔyɔ, na aya na bati ka bana kabla ku lɛbibo lɛ́sa. Na báƒɔ bana ekpidi lili kayu, ɔsika Unwoti ɔ́ni-ma kɔtu ɔ́sia kama kunyɔ kunyɔ na bana ekpidi ɔsu.

³Ukyuli ɔdi ɔkɛ ɔɔva na ketele kalɔ kakwiidi kemmo ɔnini, ‘Bɛklibi ulu bise bite Blɔti, na binyene ulu ɔmmɔ na kalɔ kakwiidi kammɔ kemmo, na bɛbla ulu unengudi bite Katɔti.

⁴Biyile lɛbonka na bɛbwɛ abinkpo ƒui na atɛ kalɔ. Na kesii kani nse kpukplo kpukplo ni, bɛbla na ɔbla suɛlɛ suɛlɛ.

⁵Na Unwoti ɔni muukeye ni, ɔdubɔda ɔlɛ kayaa na ukyuli biala ɔdubɔnu-nwu nwaa.’ ” Lɛni na Unwoti ɔlati ɔ́su!

⁶Lɛdi lɛdi lɛ́su-mi lɛnini, “Va momoomo na atɛmi.” Amu na líye nnini, “Bi na nva nsu?” Lɛdi lɛmmɔ lɛ́su lɛnini, “Su anii, ‘Bekyuli ƒui bese aani lɛku kemmo alakpi, na ukyuli bɔdia buse aani alakpi anwula.

⁷Alakpi aayɛyɛ na anwula aanú. Ɔsika Unwoti ɔ́ya na ɔƒɛƒɛɛ úkpo ɔ́vi-ni lɛlɔ.

⁸Livo lɛɛyɛyɛ na anwula aanú, nsu Katɔti litemi ani lise lite uwi ƒui.’ ”

⁹Awɔ ɔni nda litemi buni éboku Sion ni, kɔ sie abi kangyaa ammɔ eli. Na awɔ ɔni nda litemi buni éboku Yerusalem ni, kɔliku ƒula lɛdi katɔ momoomo. Va momoomo, na tayia! Su Yuda lɛma lɛmmɔ anini, “Aanu ƒula Katɔti!”

¹⁰Bɛnu, Unwoti Ɔyikune Ƒui ɔ́si ɔdubo ubadi bekyuli lɛlɔ ku nwuna ɔyikun bonwu. Bɛnu, ɔdanku lɛyuƒɔla ku kɔnu bɔsia etela úboku bekyuli.

¹¹Ɔɔtɔnku nwuna badi aani baƒonu ɔdane buni, na ɔɔgyu baƒonubi bammɔ taada enu. Na ɔɔda-ma taamana nwuna kayi. Na bani nda bebi ni, ɔɔkpanku-ma buɛɛ.

¹²Ɔma ndubɔkana na ɔkɔku ɛpu ntu bumomo ku bɔgyu na nwuna lɛkɔkɔ iye unene kayaa ku nwuna enu na ɔti kana bune? Ɔma ndubɔkana na ɔsala kalɔ kamɛni lɛti uwi kagyigyɛ kemmo? Na ɔma ndubɔkana na uti abi ku abinkpo ɔsia unu lɛkɔkula lɛlɔ, na ɔti-nya unu?

¹³Ɔma nénu Unwoti kasusu kalɔ dii iye ɔma ndi nwuna kasusu utene ɔni nákya-nwu kakwɛ?

¹⁴Ɔma na Unwoti úye ɔnii ɔtina-nwu lɛla lɛdi asa na ɔ́ti. Na ɔma nátina-nwu kesii kani na ɔsia? Ɔma néte-nwu lɛlati iye ɔ́tina-nwu ulu ɔni na ɔsia unu ala kalɔ?

¹⁵Geen ni, bekyuli bayawine baaadi lɛla lɛdi na Unwoti anumi. Mmomu buse bese aani kalɛ na ntu buudú teebo lɛkpibui kemmo kani iye aani ɔtumu na unu lɛnila lɛlɔ. Na ɔɔnu ntuntɛkɔlɔ ƒui aani ɔtumu na nwuna lɛkɔkɔ.

¹⁶Lebanon egyii ƒui étedu ka basala-nya ogya babla lɛkpa. Na bebuo bani nkya Lebanon abi lɛlɔ mmɔ ƒui bétedu ka beti-ma bakyula babla akpala bete Unwoti.

¹⁷Kayawi kadi bekyuli ƒui baaadi Unwoti lɛla lɛdi na ulánu-ma taakya lɛla lɛdi kemmo munu munu.

¹⁸Na si use lɛni ni, ɔma na ukyuli ɔdi ɔdubuti Katɔti bɔkɔku, iye bi udu na ukyuli ɔdubɔnwi uti ɔtina kalɛ na Katɔti use?

¹⁹Katɔti uuuse aani lɛla lɛni na bakywɛɛne bánwamana sika ugyiedi bámana na béti sika ɔƒualadi asɛɛ bákya-nwu bɔdia.

²⁰Na bekyuli beeti ugyii kpakplaa ɔni na bánu ka ulebun. Na bawia ɔnwine ɔni ndubɔnwi lɛla lɛmmɔ unyene na ulálɛ ulébo.

²¹Bɔgyi na bɛɛɛgyi tɔ ukyuli ɔni na Katɔti ɔdi? Munuu bítenu tɔ? Na ɔdi lɛnɔ útasu-mii tɔ ɔ́si kalɔ kesekɔ? Bítenu tɔ ɔmɛni kalɔ ɔ́si ɔni na údie kayawi?

²²Anwu ɔni nédie kayawi ni, uli nwuna lɛgaboku lɛlɔ na ɔɔdi kayawi bekyuli ƒui lɛlɔ ɔ́ka ɔ́mana ɔ́si kayaa katɔ katɔ ƒui. Údie kayaa kammɔ na kebi bekyuli lɛlɔ na bakya-nwu kemmo aani kɔdi kevo bonwu, na ɔɔnu-ma teemene aani bakpɔtilikpɔ.

²³Uuboku bagabi kalɔ na ɔɔyá na kayawi lɛlɔ badine ƒui baayii udu na basɔ baaadi lɛla lɛdi na bekyuli anumi.

²⁴Bese aani egyiibi akɔdi ani na bágyu bátálɛ, na uwi útetu tɔ ana lɛlɔ na bedie ligyiitu, asa na Unwoti ɔ́ya na ɔƒɛƒɛɛ úkpo ɔ́vi-nya lɛlɔ, na áyɛyɛ na ákwii ábla aani lɛtɔ lɛni na ɔƒɛƒɛɛ uuti taavinku.

²⁵Ɔma na bɛdubuti Unwoti Kedee bɔkɔku? Buse na ukyuli ɔdi use aani nwuna kalɛ?

²⁶Bɛkɔliku bina anumi katɔ na bɛnu kayaa, na biye lɛlɔ bɛnii ɔma nédie ala ammɔ ƒui? Anwu mɔɔlɛ́ku ayabi keyi unwi unwi na ɔ́sia ɔdi biala lɛnyi. Na ɔkɛnku nwuna ɔyikun bonwu ɔsu ni, lɛyabi lɛdi liláyii nina kenyekɔ.

²⁷O Israel, bi ala na bɛɛká taasu ka Unwoti ulánu bina ala ani muukpóku-mii taati, na ɔɔɔdaku-mii lɛda lɛnɔ?

²⁸Bɛɛɛgyi na bítenu dii lɛnɔ ka Unwoti ndi Katɔti ɔni nli usela uwi ƒui, na anwu nédie kayawi ku kana kemmo ala ƒui? Lɛlɔ liletu-nwu kudii na ukyuli ɔdi lɛnɔ ulakana-nwu kasusu bɔkɔku bɔnu kalɛ na kese.

²⁹Anwu mɔɔsɔku ɔlɔkplu teete bekyuli bani na lɛlɔ lítu na bese kpɛtɛ kpɛtɛ.

³⁰Bakloƒu ku begblebi muedi lɛlɔ liitú-ma na baabla kpɛtɛ kpɛtɛ na baagbánta teebuli.

³¹Nsu bani néti bana anu básia Unwoti lɛlɔ ni, bana ɔyikun ɔdubɔsɔ ɔbla ɔwɔdi. Na bana ɔyikun ɔdubuse aani kalɛ na kɔdigbo aasɛ uuveyi taavi kayaa. Na badubo usi bukeli na balanɔ bukeli. Na badubusie lɛgba na lɛgba lilakpulu-ma.