Read Lelemi Yesaia 48 Bible Online

Yesaia 48 - Lelemi bible

Yesaia 48

¹“Israelƒuɔ, Yakob ɔtɔ kemmo bebi na bɛdi na bɛ́si Yuda kɔdua. Bɛɛsu taatina bɛnii ami Unwoti Israel Katɔti na bɛɛbu, nsu ɔmmɔ ƒui ɔkɔ na ɔdi.

²Bɛnii Yerusalem ndi bina ɔma na bina anu ƒui asia ami Unwoti Ɔyikune Ƒui, Israel Katɔti, lɛlɔ.

³Lɛ́su-mii ala ani ndubo abálɛ ɔ́si kukuuku na lɛ́kɔ-nya lɛsa líte-mii ku mina kenye na lɛ́bla lɛni sɔsɔ kɔnakunwi na ébo éte lɛni.

⁴Ngyi ka bibo atu ɔkplu ku lili ɔkplu.

⁵Na lɛ́su-mii ɔmɛni ƒui líse kalɛ na si uwi ɔni na ébo aalɛ́ ni, na bilasu bɛnini, ‘Baƒiɔ bani na bɔɔkpá nábla ala ammɔ.’

⁶Bínu ala ani na lɛ́su na bɛ́nu kalɛ na álɛ lɛnɔ. Na amii na ɔdi ka bɛsu ka sɔsɔ na ɔdi. “Na ɔ́si ɔƒɛni ni, ndubudie abɛla ani na bɛɛɛgyi tɔ kudii lɛtina-mii

⁷Na adi ala awɔdi ani na átakya kuuku aani ɔmwi ɔdi ɔni na biinú-nya kɔku mɛni. Anwuɔsu ɔdi ulakana bɔsu ɔnii ‘Ngyi-nya na líinu-nya kɔku dii.’

⁸Ɔ́si kukuuku ƒui bina atu étebimi tɔ na binu lɛla lɛdi kalɔ. Na ɔ́si uwi ɔni na báwɔ-mii ni, ngyi-mii kalɛ na bɛ́lɛ-mi kama na bɛ́ta binye-mii lɛlɔ.

⁹Na ukyuli ɔni na ndi ku kalɛ na bekyuli bemwi-mi ku ɔbu ɔsu ni, muuwi lɛlɔ ku mina kɔnyi ablala kalɛ na naaayila bekyuli udu.

¹⁰Lɛ́kɔku-mii lɛ́nu na lɛbibo kemmo aani kalɛ na baakya sika ɔƒualadi ogya kemmo taabla-nwu kede kede.

¹¹Na lɛ́bla ɔmɛni na ami ɔlati lɛƒɔyɔ kenye ku ukyuli ɔni na ndi ɔsu. Ɔsika lɛɛɛdubo bɔtuna na mina lɛnyi lɛyii udu, iye ukyuli ɔdi ule mina ɔbu ku bukeye bɔni na bekyuli beete-mi.

¹²“Israel, mina kadi bekyuli baƒunadi, bise atu na binu. Ami lɛti kani ndi Unwoti udeedi ku ukplodi.

¹³Ami ɔlati néti mina enu na lídie kalɔ na líbimi kayaa lɛ́ƒala katɔ na beenú-mi lɛdi uwi biala na lɛ́kpali-ma.

¹⁴Bina ƒui bɛsala lɛlɔ na bibo-mi kudɔ, na binu lɛla lɛni na mɔɔsu. Bina baƒiɔ badi básu banii ala amɛni adi adubɔlɛ? Munuu básu-mii na bínu si ukyuli ɔdi ɔdubɔbla lɛla lɛmɛni udu ku Babelƒuɔ?

¹⁵Ami náƒuna-nwu na lɛ́ɛtɔnku-nwu ḿbedu kesii kani na bɛɛnu mɛni. Na ɔdubo lɛlɔ bɔdi lɛnɔ.

¹⁶“Bɛni bide-mi bibu na binu! “Ala ani ƒui na lɛ́ɛka bɔsu ni, ńtasu-nya ńtabɛ na ɔdi útenu-nya. Na uwi ɔni na ala ammɔ aalɛ́ lɛnɔ ni, nli mmɔ.” Unwoti Katɔti ɔkɛnku nwuna Kɔyu ɔyikun lɛlɔ na ɔ́tala-mi.

¹⁷Unwoti ɔnini, “Israel kadi bekyuli, ami ndi Unwoti Katɔti ɔni muudie-mii. Na kalɛ na ɔdianku-mii ɔsu na mɔɔtina-mii ala, na mɔɔkpanku-mii taasiaku ulu geen ɔmmɔ lɛlɔ.

¹⁸Si bunu na nka bínu-mi litemi ni, nka bíilie kalɔ kpi ku atu bɔyɔ aani kalɛ na ketu kaatɛ taagba buɛɛ na bɛbla siin aani kalɛ na ɛpu ntu bɔɔta ku bukeye.

¹⁹Na bekyuli bemomo bina kalɔ lɛlɔ utulo ɛpu kɔnwinimi. Na nka lɛɛɛdubo bɔya na kadi badi badi-mii lɛlɔ na bayila-mii udu.”

²⁰Anwuɔsu ɔƒaani ni, bɛtɔlɔ Babel! Na si bɛ́yu ulu bísela ni, na biteedie lɛnu taatɔ ku ebiti. Na lɛlɔ lɛyɔ-mii na biteebo kudu na ukyuli biala unu-mii kɔku bɛnini, “Unwoti údie nwuna kabla ɔblane Yakob.”

²¹Ɔ́kpanku-bu ɔ́sia kalɔ kakwiidi kemmo na ɔ́ya na ntu bɔ́bwɛ bɔ́lɛ lɛtakpɛ kemmo na bɔ́ni na bɔ́du bula utukwɛ.

²²Nsu Unwoti úse kenye ɔnii, “Ukyuli ukpidi biala ulákɛ atu bɔyɔ.”