Read Lelemi Yesaia 49 Bible Online

Yesaia 49 - Lelemi bible

Yesaia 49

¹Ukyuli biala use kɔtu na unu, amii ɔgyu kadi bamba bekyuli ƒui bani nkya ɛpu ɔvi. Unwoti ɔ́ƒuna-mi na ɔ́sia-mi lɛnyi asa na báwɔ-mi.

²Ɔ́ya na mina kenye etemila aatu bekyuli aani kewii kani mbo ɔbi geen iye lɛtula lɛni kenye nse ƒiolu ƒiolu na use yayaaya na atula koƒo kemmo. Ɔda-mi kɔkɔɔkɔ na ɔ́bɛla-mi na nwuna lɛkɔkɔ kemmo.

³Na ɔ́su-mi ɔnini, “Israel, awɔ ndi mina kabla ɔblane ɔni lɛlɔ na ɔkɛnku na bekyuli badubo-mi bumwi.”

⁴Nsu lɛ́su nnini, “Lɛ́bla kabla lítu lɛlɔ na ńtanu kɔsia kɔdi. Na líbile mina ɔyikun lɛnɔ keeke na ńtanu lɛla lɛdi. Nsu lɛla lɛni ndi mina lɛdi ni, Unwoti lɛkɔkɔ na lɛkya. Ɔsika anwu ndubo-mi kayu bɔƒɔ na lɛla lɛni na lɛ́bla kenye.”

⁵Na Unwoti ɔni návɔ-mi na mina uni kaƒɔ kemmo ɔnii nnwini-nwu kabla ɔblane asa na badubɔwɔ-mi ni, anwu nátala-mi ɔnii nkpanku Yakob ku nwuna kadi bekyuli Israelƒuɔ mboku-nwu kudɔ, ɔsika Unwoti ɔɔbu-mi geen na anwu kani mɔɔkya-mi ɔyikun asa na mɔɔbla lɛla biala.

⁶Unwoti ɔ́su-mi ɔnini, “Ndubo-ɔ kabla kenengudi kɔnu bɔkya butulo ka akpanku Yakob adua ammɔ ƒui ku Israelƒuɔ bani nébu eboku-mi kani. Mmomu ndubɔbla-a na enwini bukeye ete kadi bamba bekyuli ƒui kalɛ na bayawine ƒui bakɛ ngba bɔƒɔ.”

⁷Ɔmmɔ kama ni, Unwoti ɔni ndi Israel Katɔti Kedee ɔni lɛnɔ ndi bana ngba ɔƒɔne ɔ́su nwuna kabla ɔblane ɔni na bekyuli béni na beekisi-nwu kpakplaa ɔsu na únwini ɔɔbla-ma kabla ɔnini, “Baga badubɔnu-ɔ na bata benye na bagabi badubɔnu-ɔ na bakya-a lili kalɔ, ɔsika ami Israel Unwoti Kede ɔni náƒuna-a mɔɔdi mina litemi lɛlɔ.

⁸“Si mina uwi údu ka lɛƒɔ-mii ngba ni, ndubunu bina bɔkpali na libunku-mii. Na ndubɔgyumana-mii na lɛda-mii kɔkɔɔkɔ. Na ɔkɛnku amii ɔsu ni, ndubo bunyimiku kadi bekyuli ƒui bunyimi bɔdi. Na ndubɔya na bɛsɔ bilie kalɔ kpi na bina kalɔ kani nwi na lɛla biala líbie-ka kemmo ɔƒɛni mɛni kemmo.

⁹Na ndubɔsu bani na béƒie bátɔlɔku nnii ‘Bɛlɛ-ma lɛlɔ bɔdi kalɔ na bɛkɛ bɔnwuna. Na amii bani nkya kasuudikɔ ni, bɛlɛ bibo bukeye kemmo!’ “Na badubɔbla aani baƒonu bani nnye kɔbi lɛlɔ baakun livo.

¹⁰Na kɔka iye utukwɛ ulada-ma. Na ɔƒɛ ku kalɔ kakwiidi liwulu lilekeyi-ma. Mmomu anwu ɔni mɔɔnu-ma kɔnyana na ɔɔgyumana-ma ɔdubɔtɔnku-ma usienku kesii kani na abiɔ ntu bɔbuni bɔkya.

¹¹Ndubɔbwɛ abi ammɔ na lidie ulu unengudi lɛva-ma kalɛ na basia-nwu lɛlɔ.

¹²Mina kadi bekyuli badubɔsi ɔlɔgyu na katɔ kakɛ ku ɔƒɛ kanukɔ bebo na basi Siniƒuɔ kalɛkɛ lɛlɔ lɛnɔ bebo.”

¹³Bɛsu katɔ ku kalɔ bɛnii beteedie lɛnu na bataatɔ ku ebiti. Na bibo ɔda bite abi ammɔ lɛnɔ ƒui bɛnii ama lɛnɔ bebunku na beteedie lɛnu. Ɔsika Unwoti bekyuli bébo abi nsu ɔƒɛni amu ɔ́nu-ma kɔnyana na ɔ́yala-ma kɔƒɔ.

¹⁴Sion kadi bekyuli básu banini, “Unwoti únwini kama ɔ́kya-bu na ɔ́yiƒala-bu.”

¹⁵Nsu Unwoti údie kenye ɔnini, “Ubi uni ɔdi ɔdubɔkana na ɔyiƒala ubi ɔni nányimi-nwu lɛnyii? Munuu ɔdubuni na uláyɔ ubi ɔni nálɛ ɔ́si-nwu lɛlɔ kemmo? Ina ubi uni ɔdi ɔdubɔbla lɛni ni, ami lɛɛɛdubo-mii bɔyiƒala kudii.

¹⁶Lɛ́ta-mii lɛ́sia mina lɛkɔkɔ na bina ala akya-mi kasusu kemmo uwi ndi uwi.

¹⁷Bina bebi badubo ɔma ɔmmɔ bɔsɔku bɔtu kɔnakunwi butulo kalɛ na béti bébile-nwu. Na bina bekisine bammɔ badubɔlɛ-nwu kemmo batɔlɔ ƒui.

¹⁸Kɔliku anumi katɔ na anu amana, na anu ka ƒula bebi básala lɛlɔ na basi badubo. Na ka ami Unwoti ɔni nli uwi ƒui na ɔdi ɔsu ni, muusé-ɔ kenye nnii ƒula ɔma unengudi ɔmɛni ku nwuna bekyuli ƒui badubɔlɛ lili na badia bɔnu aani uleku ɔni na báwɛɛ-nwu ku sika ugyiedi asɛɛ abuni.”

¹⁹Ɔƒaani ni, buse na Yerusalem use aani ɔma ɔni na ɔ́bwɛ na lɛla lɛdi lɛsɔ liiibo-nwu kemmo. Nsu badubɔsɔku-nwu batu na bekyuli baƒɔ ɔma ɔmmɔ kemmo tɛtɛɛtɛ. Na bekisine balalane bani nkya ɔma ɔmmɔ lɛlɔ ama badubusie ɔgyu kakaaka na ɔma ɔmmɔ kudɔ.

²⁰Yerusalem use aani uleku ukpinele ɔni nsɔ naaanu nwuna bebi ɔsu únwini udinkɔ na uuwulo kɔnyana ka ɔ́yila nwuna bebi ku ɔgyani ɔsu. Nsu nwuna bebi bammɔ kani ndubo babasu-nwu banini, “Búmi na kesii kani na bɔkya na bɔɔwia ka abla keliekɔ bamba ete-bu na ɔma unengudi ɔni na bekyuli báƒɔ-nwu kemmo mmɔ.”

²¹Mmɔ na Yerusalem aani uleku ɔmmɔ kalɛ ɔdubuye ɔnini, “Ɔma náwɔ bebi bamɛni ama. Lɛ́yila mina bebi na nsɔ naaanu-ma. Wɛ na bamɛni bási? Béti-mi bésienku kaƒɔ na liiibo ɔma nanyuɛ bebi bamɛni? Ami lɛti kani nebu nli. Na wɛ na bebi bamɛni bási?”

²²Lɛla lɛmɛni geen na Unwoti ɔ́su nwuna bekyuli ɔnini, “Líbo kadi bamba bekyuli kɔnu na ndubɔkɔliku mina aƒlaga katɔ lɛtina bekyuli bammɔ ƒui. Na badubɔkpanku ƒula bebi bananabi bada kɔnu, na bagyu ƒula belekubi basia amangba beboku-ɔ.

²³Na kadi bani akɔ na bákya mmɔ baga ku beleku baga badububo babataanu-mii lɛlɔ aani bina kabla bablane bani nnye bati ku beni kenyekɔ bete-mii. Na badubɔkya lili kalɔ bete-mii. Na bɛdubɔnu bɔti ka ami ndi Unwoti ɔmmɔ. Na anumi elewi-mii kalɔ si bíti bina anu bɛ́sia-mi lɛlɔ.”

²⁴Uuuse kpɛtɛ kpɛtɛ ka esie na etékpo aƒɔ ukyuli ɔdi na ɔlalane ɔni na ubo ɔkplu geen enu kemmo.

²⁵Nsu Unwoti úse-bu kenye ka ɔdubukpo ute-bu na ɔƒɔ bula bebi ɔsiku bekyuli bekpidi bani ndi bula bekisine bayikune bani mbo kalala mmɔ enu kemmo.

²⁶Na ɔdubɔya na bekyuli bekpidi bammɔ bakun ama alati bana ɔlɔna aani lɛna na bani bana ubugya bekpi aani kalɛ na baaní ntɛ teekpi. “Na ukyuli biala ɔdubɔnu ɔti ka ami ndi Unwoti Israel Katɔti Ɔyikune Ƒui ɔni mɔɔƒɔ́-mii ngba na ɔɔyá na bɛɛkɛ́ bɔnwuna.”