Read Lelemi Yesaia 5 Bible Online

Yesaia 5 - Lelemi bible

Yesaia 5

¹Ndubudie ɔnu lite mina ɔyɔne ɔsiku nwuna adingyii kemo lɛlɔ. Mina ɔyɔne ubo adingyii kemo kadi na kɔbi kaƒɔna kalɔ buni lɛlɔ.

²Ɔ́tu kalɔ kammɔ únwini na údie atabi ammɔ ƒui. Na ɔ́va adingyii ebi abuni ani ndia geen. Na ɔ́tu bagyumanane kenyekɔ únyene-ka ntɛ. Na údie egyiibi ammɔ ntu kewikɔ ubu. Na unye ɔgya egyiibi ammɔ bugyie na bede. Nsu ebi ani na adingyii ammɔ ánwu ni, ana ntu ese nyanyaanya na aaadia.

³“Na ɔƒɛni ni, amii Yerusalem ku Yudaƒuɔ, bɛtɛ ami ku mina kemo ntɛ litemi lɛmɛni na bɔnu.

⁴Bi na nka ɔlɛka lɛsɔ lɛbla na mina kemo kamɛni lɛlɔ litulo kalɛ na lɛ́bla mɛni? Ka nka ebi buni na mɔɔsia anu ka lide ni, bi ɔsu na ebi ani nse nyanyaanya sɔɔn na kánwu?

⁵“Bɛya na lɛsu-mii lɛla lɛni na ndubo mina adingyii kemo bɔbla. Ndububile ɔban ɔni na lɛ́gyi lɛ́kya-ka na kayii udu. Na ndubɔƒɛ awodu ammɔ ƒui liwi kalɔ na bataanya-ka teesusu.

⁶Ndubo-ka atu budie na uyi ɔbla lɛku. Na nsɔ neeedie adingyii ammɔ kɔgba akɔ iye lidie livo kana kemmo. Liyu ku alakpi bamba ndubɔƒɔ-ka kemmo. Ndubutile liƒlukutu kuƒi na ɔnantu ɔsɔ ulana ulewi-ka.”

⁷Unwoti Ɔyikune Ƒui adingyii kemo ndi nwuna bekyuli Israelƒuɔ, na Yudaƒuɔ badi nwuna kevomadɔ kemo kani mɔɔyɔ́-nwu kaƒɔ. Ɔsia anu ka batɛ bekyuli etemila ulu lɛlɔ siin Nsu ubugya kani na beewi kalɔ. Na ɔɔwia ka bekyuli babla ala siin. Nsu bekyuli keku kani na uunú ka ala étulo-ma na baanya-ma taakya ɔsu.

⁸Bɔbuɛ ute amii bani muuyé lɛtɔ taasia kama na bɛ́bɛbɛ bina kɔlɔ kuyedi bísela anumi ƒui. Bekyuli bamba basɔ beeebo keliekɔ kana kemmo mmomu kénwini amii lɛti keliekɔ.

⁹Unwoti Ɔyikune Ƒui ɔ́su na ami ɔlati línu ku mina atu ɔnini, “Lɛtɔ pii ku katu taasia lɛtɔ buni lɛmmɔ lɛdubo buse ukpludi ɔni na basɔ balákɛ bekyuli bani nelie-ni kemmo.

¹⁰Adingyii kemo kɔbuli eti atɛ ku leevu muedi uledie ntɛ abo aku. Na edula ani báƒɛ bálɛku kemo kani na bákya edula akyami leevu aaadubo ebi bɔlɛ na edu lɛkyami linwi.”

¹¹Na amii bani mɔɔta ɔtanta tutuutu teelie ntɛ bɔni lɛlɔ teetédu usien lɛdiba ni, Unwoti uwi úudu ka ɔkyula-mii.

¹²Biiti lɛnu lɛni mɔɔdia bunu ku ntɛ bɔbuni teesienku bina emeyi kadikɔ ku lɛbentaa ku ese ku atoloyii ku kɔkpɛɛ lidu lidu. Nsu bina kasusu kadi biala kelesie Unwoti ku nwuna ablala lɛlɔ.

¹³Ɔmɛni ɔsu ndubɔya na mina bekyuli benwini bekeline na lɛma bamba ala kalɔ tenu ɔsu. Benengu bani nnye kunyekɔ kunengudi ku babune ƒui kɔka kɔdubo-ma bɔdu. Na utukwɛ ɔdu bekyuli lisu bakladi.

¹⁴Kaƒiɔtɔ kadaku akpu bɔta na adila abuni ani na ɔdubɔkɛ bɔsiku Yerusalem lɛlɔ ɔsu. Babune ku bekyuli keeke ƒui badubo-ma bubweli ku bana ntɛ bekpine ƒui.

¹⁵Limeyi lɛmmɔ lɛlɔ na bani mɔɔtalaku lɛlɔ katɔ ƒui badubo bubuli bɔkpi ɔtumu. Na bani mɔɔnu lɛlɔ katɔ katɔ ƒui beboku-ma kalɔ.

¹⁶Na Katɔti lɛnyi likeye na lɛkɔ katɔ ka ɔɔtɛ litemi siin ɔsu. Na banu kalɛ na Unwoti use kedee, na kalɛ na ɔɔbla ala siin ɔsu.

¹⁷Na kesii kani na Unwoti úbile ala mmɔ ni, mmɔ na baƒonu badubo bɔdi. Na baƒonubi ku besebi ƒui badubɔkɛ kadikɔ.

¹⁸Bɔbuɛ ute amii bani nda ɔkɔ etemila na bɛ́ni ekpidi bɛdanku bɛkɛ aani kɔbuli, na bina ulikplu ala bɔbla ese aani kɔbuli kɔni mɔɔní kɛɛkɛ taavinku.

¹⁹Amii bani mɔɔpii Israel Unwoti Kedee bɛnini, “Babla na abla lɛla lɛdi bɔnu! Bo lɛlɔ na atina-bu lɛla lɛni na adubɔkana bɔbla.”

²⁰Bɔbuɛ beete bekyuli bani mɔɔnu likpidi banii lɛbuni na lɛbuni banii likpidi lɛdi, ku bani mɔɔnu lɛla suu banii bukeye, na si bánu bukeye banii lise suu, ku bani mɔɔnu ɔdu banii emini na si bánu emini banii ɔdu na ɔdi.

²¹Bɔbuɛ beete bekyuli bani mɔɔnu lɛlɔ banundane na baakali ka bagyi lɛla lɛdi.

²²Bɔbuɛ beete bani na ntɛ kanikɔ na badi bayikune na ama ntulo ƒui ka baasála-mu lidu lidu taani ɔsu.

²³Bekyuli bani mɔɔbɛ́ taaƒɔ ala, na beete balalane ubo ka bekeli bana kɔtu bɔni, na baaní bekyuli babuni mmomu kɔtu ni, bɔbuɛ beete-ma.

²⁴Anwuɔsu bana ƒui badubo bɔkywi bɔyii udu aani kalɛ na ogya ɔɔkyula livo ku keti. Bana ligyiitu lɛdubo bubun na bana anwula awiɛ. Ɔsika bekyuli bamɛni béni Unwoti Ɔyikune Ƒui ɔda bubo. Na béni banii belenu Israel Unwoti Kedee litemi.

²⁵Ɔmmɔ ɔsu na Unwoti uuti kɔnyi kpakplaa taakya nwuna bekyuli. Na ɔ́talaku kɔnu katɔ ka ɔƒiɛmi-ma ɔva kalɔ. Abi ƒui ákunku, na bani nékpi ƒui ɔlɔna uwi lilu lɛlɔ aani alakpi. Nsu ɔmmɔ ƒui útayɔ tɔ Unwoti kaƒɔ. Ɔsika ɔ́mu ɔ́tala kɔnu unye.

²⁶Ɔ́kɔliku aƒlaga úte kadi bani na ɔgyu kakaaka. Na ɔ́vwi uƒiomu ɔ́kpali bani na kayawi kawɔlɔkɔ ƒui. Aanu-ma ka bakɛ ku usi badubo.

²⁷Na lɛlɔ liletu ɔdi iye ɔgbanta lɛnɔ. Lɛlɛɛ liléti ɔdi iye ɔtɛ ɔlɛɛ lɛnɔ. Bana akɔ ɔdi kadii iye lɛgbanvuo kabuli kaláƒɛnimi.

²⁸Bana atula inye bubo ɔbi yayaaya, na báni bana kɔtaminta benye bete kekpo. Na bana bapɔnkɔ lɛgbanvuo libo ɔkplu litulo abuala na bana kɛɛkɛ kagba kuunwíni teetulo ɔƒɛƒɛɛ ɔni mɔɔkya ligede.

²⁹Na baakwanyi aani bagyata, na beebó adi si béƒie lɛla lɛdi, na beti-ni batɔlɔku ɔni na ukyuli ɔdi uuubo na ɔkana-ni bɔƒɔ na bana kudɔ.

³⁰Na limeyi lɛmmɔ ni, badubɔnwini bakya-ma, aani kalɛ na ɛpu ɔɔnwini. Na liƒlukutu suu lɛdi ku kɔnyana kɔdubɔƒɔ Israel ƒui, na ɔkɛnku ɔmmɔ ɔsu basɔ balanu bukeye bɔdi.