Read Lelemi Yesaia 52 Bible Online

Yesaia 52 - Lelemi bible

Yesaia 52

¹Yerusalem, ta nye! Sion ɔma kedee, nye lɛgba lɛlɔ kpakplaa na ada lɛlɔ ku ƒula adala abuni ƒui. Ɔsika baƒɔ bani nébo bébebile ɔma kedee ɔmmɔ kemmo basɔ baaadubo keliekɔ kadi bɔkɛ na ƒula kemmo ɔƒɛni amu.

²Sion, ta na ɔtumu akɔ kesii kani na elie! Na ada ukyuli kalɔ bɔkya kabuli kani nda-a ɔkwɛ mmɔ edie.

³Unwoti ɔnini, “Béye mina bekyuli, nsu ɔɔɔdi egulabi kenye.

⁴Kuuku ni, bísie bítélie Egyipte kalɔ lɛlɔ aani baƒɔ. Mmɔ na Asiriaƒuɔ bábla-mii kalala ku ulikplu ala.

⁵“Na kadi bamba béƒie-mii bátɔlɔku ɔni na nka bítabla lɛla lɛdi. Bina batɔnkune bédumo geen na ɔlɛ bunu ɔsu. Na limeyi ndi limeyi ni, baakpali-mi lɛnyi teewida.

⁶Mina kadi bekyuli, bɛdubo-mi bɔnu bɔti ukyuli ɔni udu na ndi ku ami ɔni mɔɔtɛmiku-mii ɔni na nkya-mii akɔ mɛni.”

⁷Bi mɔɔdia bɔnu lɛni! Bɛnu abi lɛlɔ na binu bekyuli bani ndubo babakɔ litemi buni lɛmmɔ lɛsa kalɛ na bana bubo kɔku kɔɔda kubiti. Baakɔ́ keyi buɛɛ ku ngba bɔƒɔ lɛsa banini, “O Sion, ɔƒɛni amu ƒula Katɔti ndi bina ɔga.”

⁸Bise atu na binu ka bina bagyumanane beedie ebiti lɛnu ku lɛlɔyɔ. Na badubɔnu ku bana anumi uwi ɔni na Unwoti únwini ɔdubo Sion.

⁹Yerusalem, awɔ ɔni na bábwɛ béwi kalɔ, ta na awɔ lɛnɔ atu kɔgya ku ebiti, ɔsika Unwoti ɔ́yala nwuna bekyuli kaƒɔ na úbo ɔnii ubedie Yerusalem.

¹⁰Unwoti údie nwuna ɔyikun bonwu keyi ɔ́tina kadi bekyuli ƒui. Na ɔƒaani ni, ukyuli biala ɔdubɔnu ɔti bula Unwoti Katɔti ɔni mɔɔƒɔ́ ukyuli ngba.

¹¹Bɛda Babel ɔma unengudi ɔmmɔ biwi na bɛlɛ-nwu kemmo! Na bitetuku lɛla lɛni muusé lɛlɔ lɛdi. Na bɛƒɔ bina adala ƒui amii bani nti Unwoti lɛlɔ ala ani nse kedee.

¹²Bitasu bɛnii biikeli, ɔsika ukyuli ɔdi ɔɔɔdubo-mii kama bɔsia. Israel Unwoti Katɔti ɔlati ɔdubo-mii bɔtɔnku na ɔgyumana-mii anumi ku kama ƒui ɔsiku bina bekisine bukpoku biala kudɔ.

¹³Unwoti ɔ́su ɔnini, “Mina kabla ɔblane ɔdubo lɛlɔ bɔdi! Na bekyuli badubo-nwu bumwi ku ɔbu unengudi ƒui.

¹⁴Liƒu bonwu lɛ́da bekyuli pii na lɛla lɛni nálɛku-nwu ɔsu. Na bani ƒui nánu-nwu ni, liƒu lɛ́da-ma lítulo, ɔsika úbo abi na nwuna bɔnu bɔsɔ bulátina aani si ukyuli na ɔsɔ ɔdi muedi.

¹⁵Mina kabla ɔblane ɔmɛni ndubɔya na kadi bekyuli bamanku kalɛ na bakpa-mi. Na ɔdubɔbla baga kalɛ kadi na babla kpoo, na beboku eli kalɔ. Na lɛla lɛni na bétenu iye banu kudii ni, badubɔbla kasusu basiku-nya lɛlɔ na ɔbla-ma nwaa.”