Read Lelemi Yesaia 54 Bible Online

Yesaia 54 - Lelemi bible

Yesaia 54

¹“Die lɛnu ku kɔvanu momoomo, awɔ udinkɔ, ina ka átawɔ kudii, ɔsika uleku ɔni na ɔgyani údie-nwu atu ni, anwu ndubo bɔwɔ butulo.

²Bɛtu bina nvo na bubomo bubu. Na bisienku kevo akpa ammɔ kama bibu, na bɛni kɔbuli ewele ammɔ bisienku kama na bibo-nya bɛlɛ kalɔ kpakplaa.

³Amii ku bina bawɔ ndubɔƒɔ kadi bamba bekyuli bammɔ kɔlɔ, na kunwini bina kɔdi. Na bana lɛma lɛni nábwɛ mmɔ linwini bina kuliekɔ.

⁴“Bitayia, na kɔƒa lɛnɔ kutekpo-mii, na enu lɛnɔ ataƒɛ-mii, ɔsika lɛɛɛdubo-mii kɔƒa bɔkya. Bɛyiƒala bina lɛnamu uwi ekpidi ani na bɛ́bla. Na kalɛ na bɛ́ƒɔ lɛlɔ bɛkya aani bekpinele lɛnɔ ɔsɔ utekpo-mii kɔƒa.

⁵“Unwoti Ɔyikune Ƒui, Israel Katɔti, mɔɔdi kayawi ƒui lɛlɔ. Anwu ndi bina Udiene ku bina ɔgya na ɔdubudie-mii.

⁶Bina ala álɛ uleku ɔkɔdi ɔni na ɔgyani údie ɔda na úduo kɔnyana, na uuwulo keku ka úni-nwu ɔsu. Nsu Unwoti bina Katɔti ɔnii ndubɔya na bɛsɔ binwini bibo!

⁷Uwi klukwii ɔdi kani na lídie-mii ɔda, nsu ndubɔsɔ lɛƒɔ-mii na lɛkya-mii kɔgbu ku bɔyɔ geen.

⁸Uwi klukwii ɔdi kani na línwini kama lɛ́kya-mii ku kɔnyi kati kati. Nsu ɔ́si ɔƒɛni úsela uwi ƒui ni, ndubɔnu-mii kɔnyana! Ami ɔni ndi bina ɔgyumanane ku Unwoti muusé-mii kenye kamɛni.

⁹“Líse Noa kenye kamɛni udu dii nnii, nsɔ lɛɛɛdubo ntu buti bɔkyula kayawi kudii. Na ɔƒaani ni, líse kenye ka nsɔ lɛɛɛdubo-mii kɔnyi buti bɔkya na lɛni-mii kɔtu kudii.

¹⁰Abi ku abinkpo ƒui adubɔkana na ayii nsu ami ndubo-mii kɔnya butaanu uwi ƒui na lɛbla-mii lɛƒɔndia. Na kenye kani na líse ka ndubɔya na keyi buɛɛ kebo bina kalɔ lɛlɔ ni, neeebile linyese lɛmmɔ kudii.

¹¹“Yerusalem, mɔɔnu ka eewulo kɔnyana na enu áƒɛ-ɔ, na ɔƒɛƒɛɛ ɔɔda-a uubó taavinku. Nsu ami Unwoti ndubɔsɔku ɔma unengudi ɔmmɔ lɛtu ku atabi ani na áƒɔ kuye geen. Na sika atabi kpakplaa ani náƒɔ kuye na baalɔ-nya Saƒir na ndubuti lɛkya ɔma ɔmmɔ kowodu ɔka kalɔ.

¹²Na ɔma ɔmmɔ kɔgyumanakɔ ni, atabi udu adi náƒɔ kuye na égyie na badubuti batu-ku na sika asɛɛ ebi ani na baakya ala bɔdia na badubuti babla kɔyakun kɔmmɔ na beti atabi kpakplaa ani na áƒɔ kuye batu awodu ammɔ lɛnɔ.

¹³Ndubɔtina bina bebi ala na bakɔ katɔ ku keyi buɛɛ.

¹⁴Ndubɔya na bɛbla bekyuli bani nse siin, na baabla lɛla biala taasiaku ulu lɛlɔ, na bilie kalɔ kpi ɔni na bɛsɔ biláyia lɛla lɛdi, na ala ani muukpóku-mii ƒui adubusie kama ƒui na bina kudɔ.

¹⁵Nsɔ lɛɛɛdubo bɔya na bekyuli badi bebekpoku-mii. Na bani mabla lɛni muedi ni, bɛdubuƒie-ma binwini bina kabla bablane.

¹⁶“Na bitayiƒala ka ami nédie bakywɛne bani muuti abuala taakywɛ ekpola na aƒɛ agyabi lɛlɔ. Na bekpone bani mɔɔkana na baabwɛ lɛma na beebile ala ni, ami nédie ama lɛnɔ.

¹⁷Ekpola ani na bákywɛɛ ka beti bekpo-mii aladi-mii lɛlɔ. Na enyekpi ani na bekyuli badubɔsu basiku-mii lɛlɔ alabla-mii lɛla lɛdi. Yerusalem ɔdi bina ɔdi na ndubute-mii kusɛ kusɛ na bɛdi lɛlɔ. Ami Unwoti násu.”