Read Lelemi Yesaia 55 Bible Online

Yesaia 55 - Lelemi bible

Yesaia 55

¹“Amii bani ƒui na utukwɛ ɔɔda ni, bibo na bibani ntu! Na amii bani na kɔka kɔɔda na biiibo egulabi adi ni, bibo na bibeye bɛdi ƒaa kayu taƒɔ taƒɔ! Bɛni ntɛ bɔbuni ku anyi ntu ƒaa nsu bitaƒɔ kayu kadi.

²Bi ɔsu na biibile egulabi na lɛla lɛni naaadi adila geen lɛlɔ na binye biitú lɛlɔ na lɛla lɛni neeemo ukyuli lɛlɔ? Bise atu na binu-mi litemi kaduɛ, na bɛdubɔdi emini biala na bɛɛyɔ́, na bɛkɛ adila abuni ƒui bɛdi bimo.

³“Bise atu kaduɛ na bibo-mi kudɔ, na bɛkɛ ngba bilie. Na kenye kani na lɛ́su Dawid líse ni, ndubuse amii lɛnɔ kenye kammɔ, na lɛyɔ-mii uwi ƒui na bɛnu kalɛ na mɔɔdi mina litemi lɛlɔ uwi ndi uwi.

⁴Lɛ́bla-nwu na ɔdi kadi bekyuli ƒui ɔtɔnkune na anwu nádi mina kenye udiene úte-ma.

⁵Na kadi bekyuli bani na nka bɛɛɛgyi-ma dii iye ama bati-mii ni, bɛdubɔlɔ-ma biboku bina kudɔ na benu kalɔ na bɛnu ka bakɛ ku usi. Na ami Unwoti bina Katɔti ndubo ɔmɛni bɔbla, ɔsika línyene-mii kenyekɔ kenengudi na biikeye.”

⁶Bɛwia Unwoti ɔƒɛni, ɔsika bɛdubɔkana na bɛnu-nwu. Na bɛkpali-nwu, ɔsika ude-mii na ɔdubunu-mii bɔkpali.

⁷Bɛda bina kalala ku likyulikpi ala bɔbla bɛya, na binwini kama bɛkya-nya na Unwoti ɔdubuti-nya ƒui ɔkyiɛ-mii.

⁸Unwoti ɔlati násu ɔnini, “Mina kasusu ku kasiakɔ ƒui kávumana ku amii bɔdi.

⁹Na kalɛ na kayaa kágyunku kalɔ kakaaka ni, lɛni na mina kasusu kágyu kakaaka kásiku bina ɔdi kudɔ.

¹⁰Ɔnantu ku etubankɛ aana taasi kayaa taayu kalɔ. Na ɔdi ulásɔ teenwini taakɔ katɔ na ulete kalɔ kammɔ bɔba na ɔya na bɛkɛ edula ebi pii ani na bɛkya na bɛkɛ adila bɛdi bimo.

¹¹Lɛni na mina etemila ese na si lɛ́su lɛla lɛdi ni, etemila ammɔ alásɔ teenwini teebo-mi kudɔ na lɛla lɛmmɔ lilebo-nwu kemmo kalɛ na lɛ́su-ni.

¹²Na bɛdubɔkɛ ebiti na bɛdi limeyi na binwini bisie ɔma ku keyi buɛɛ. Na bina lɛlɔyɔ lɛdubɔya na ɔbla aani abi ku abinkpo ammɔ muudie ɔnu si bɛɛví, na ɔbla aani enukpɛ na egyii ammɔ aagyá.

¹³Na egyii abuni enengudi ani mɔɔdia ala buti taabla adubɔkwɛ enye kesii kani na nka liyu alakpi nákya mmɔ. Na egyii ammɔ ndubunye mmɔ uwi ƒui, na atina kalɛ na Unwoti uukeye na ubo ɔbu.”