Read Lelemi Yesaia 57 Bible Online

Yesaia 57 - Lelemi bible

Yesaia 57

¹Bekyuli beenye taanu na beetiku bekyuli babuni taatádu ɔni na balasu lɛla lɛdi.

²Nsu si ina bekyuli siin bamɛni békpi ni, baatɛ kekpine mmɔ buɛɛ na bana keyi kaayɔ́ na kalɛ na bénu Unwoti litemi ɔsu.

³“Nsu amii ni, bilenu litemi munu munu. Bɛkɛ bekebone ku baƒiɔkpane lɛlɔ bɛɛkɔ́ taayu. Na ɔƒaani ni, bise atu na binu!

⁴Ɔma lɛlɔ na bɛɛkya lɛma na bɛɛpii-nwu? Bɛnu kalɛ na bina ekpidi ése-mii lisusu na bɛ́dɔlɔ.

⁵Lɛyalɛ ala ku lɛlɔ kudɔ bɔtɛ na baƒiɔ bani na bɛɛkpá mmɔ anumi na egyii enengudi ammɔ kalɔ. Na biiti bina bebi taakpa na akpabi ani na bɛ́tu bínyene ɔkwalɛ na atakpɛ ani nƒa mmɔ kalɔ.

⁶Bɛɛkali ka kaƒɔ kadubɔyɔ-mi ka bɛ́ƒuna ka bitaakpa atabi suɛlɛ suɛlɛ ani na bɛ́sala bɛlɛ esu mmɔ aani baƒiɔ ku bina lɛla biala, na biiti akpala ku ntɛ ku antabi etela teetéte-nya?

⁷Biiti bina akpala teesienku abi ani nákuku eli taatákpa teete bina baƒiɔ. Na mmɔ na bɛɛvá atɛla teesie lɛlɔ kudɔ ɔnana ku uleku kalɛ.

⁸Na bina kɔduli kesi kesii ni, bɛ́ta baƒiɔ bammɔ udu bɛ́sia kɔyakun ku bina kɔtɛnkɔ bonwu bonwu kɔni bɛ́lɛ mmɔ ƒui lɛlɔ. Na bíni ami, na bíti lɛlɔ bíte ama. Na bɛɛkɔ́ taatátɛ ku bina bayɔne bammɔ na bidie lɛlɔ kasɔngya ƒui, na bɛɛɛdaku-ni útédu uwi ɔni na údu-mii ɔkwɛ.

⁹Bɛɛkpí taawɛɛ ligyulo ƒɛƒɛɛ lidu lidu na biisié taatákpa Molek baƒiɔ. Na bɛɛtala batu na ɔlɔgyu na beesié taatálɔ ku bekpine ayu muedi teeye ala teenu.

¹⁰Bíitu lɛlɔ kalɛ na bɛdubɔkana, nsu bítanu tɔ bítati bɛnii kɔsia kuuubo ɔmɛni ƒui kemmo na bɛda bɛya. Nwuna lɛlɔ kani binye, na bíkeli bɛkɛ bɛsia-ma kama na kesi kesii, ka bana ala akya-mii kayi kemmo kpakplaa ɔsu.

¹¹“Bi ndi baƒiɔ bani kama na bɛsiaku, na ama na bɛɛyia teetulo ami ɔsu na bɛ́yiƒala-mi ku mina ala ani na lɛ́bla, na bɛsɔ binyimo adi na bina kayi kemmo? Munuu ɔni na líbile kenye mɔɔnu-mii kpoo ɔsu na mina lɛlɔ liƒu lɛsɔ liiibo-mii lɛlɔ kemmo?

¹²Bɛɛkali ka bɛdaku lɛla lɛbuni lɛdi bɔbla taagya, nsu ndubo-mii keyi budie ku bina ablala na bɛnu bina kenyekɔ bɛti.

¹³Na si uwi ɔni na lɛla lɛdi lítulo-mii na bɛɛwia ubunkune ni, na bɛkpali bina baƒiɔ lidu lidu lɛni nkya-mii na bebunku-mi. Nsu bitayiƒala ka ɔƒɛƒɛɛ ndubo ubébo-ma ugyingya mmɔ. Na ɔƒɛƒɛɛ ɔni mɔɔlɛ́ enwu kemmo kani ndubo-ma udu bɔyila. Na si bíbo-mi kudɔ ka lɛgyumana-mii ni, kalɔ kamɛni ku mina kɔbi kedee kɔmmɔ ƒui kɔdubunwini bina ɔdi uteesie uwi ƒui.”

¹⁴Na Unwoti ɔdubɔsu ɔnini, “Bɛbwɛ lilu ƒui bise kaduɛ bite mina kadi bekyuli na babasia-nwu lɛlɔ!”

¹⁵Bula Katɔti ɔni nse kedee uli katɔ kakaaka ƒui úsela uwi ƒui, na anwu mɔɔsu ɔnini, “Ina ka katɔ kakaaka kesii kani nse kedee na nli ni, nkya-mii akɔ mɛni ka libunku bani ƒui néboku lɛlɔ kalɔ na béti bana anu ƒui básia-mi lɛlɔ na baanu-mi anumi.

¹⁶Mina kadi bekyuli, lɛɛɛdubo kɔnyi buti bɔsɔ bulie butaadu-mii kɔtɔ kani. Ɔ́bla bi ɔ́bla dɛ ni, ami nédie-mii líboku kayawi. Anwuɔsu lɛɛɛdubo bɔya na enu aƒɛ-mii na bɛyila lɛnunsia ƒui.

¹⁷Bina ɔdivo náya na líti kɔnyi lɛ́kya-mii na lɛ́ni-mii kɔtu na lɛ́bɛla-mii mina lɛlɔ na bɛsɔ bilanu-mi. Nsu ɔmɛni ƒui ni, bɛmu bibo atu ɔkplu na binye bina alaekpidi bɔbla lɛlɔ ku ɔƒɛni.

¹⁸Ngyi-mii kalɛ na bise! Nsu ndubo-mi ɔlɛ ɔmmɔ bɔbwi ƒui na lɛtɔnku-mii na lɛya na kaƒɔ kayɔ-mii ku bani ƒui muuwulo kɔnyana.

¹⁹Na lɛya na bese kalɔ beteedie lɛnu teemwi-mi. Na mɔɔsu kpakplaa nnii wɛ na ɔdi ulie iye wɛ na uuulie ni, ami Unwoti ndubɔbwi ɔdi biala na ɔkɛ keyi buɛɛ.

²⁰Bekyuli bekpidi bese aani ɛpu ɔni mɔɔnwanɛ lɛlɔ na ɔɔtala nwuna kalɔ eku ku aba uwi biala.

²¹Nsu ami Unwoti líse kenye nnii ukyuli ukpidi biala ɔdi ɔɔɔdubo bulie ku keyi buɛɛ.”