Read Lelemi Yesaia 58 Bible Online

Yesaia 58 - Lelemi bible

Yesaia 58

¹“Kɔ litemi lɛmmɔ lɛsa na tebile kenye tasɔ telie. Na asu mina kadi bekyuli Israelƒuɔ bana ekpidi ku kalɛ na báta bénye-mi lɛlɔ.

²Baakɔ́ taayu limeyi ndi limeyi banii ami na baasiaku. Na beekpóku lɛlɔ aani si mina litemi na baawia batɛya. Na baatina lɛlɔ aani kadi bani bekyuli mɔɔwia ka babla lɛbuni na baadi mina ɔda bubo lɛlɔ. Baawia ka lɛni lide-ma suɛlɛ suɛlɛ na lɛtɛ litemi na ulu lɛlɔ siin lite-ma, na baasu ka lɛlɔ lɛɛyɔ́-ma ka bataasiaku-mi.

³Beeye banii, ‘Bi ɔsu na búnyimi kenye na átakpete-bu? Na búboku lɛlɔ kalɔ na átanu átati?’ “Nsu uwi ɔni na bɛnii kenye na biinyimi mmɔ ni, na binye bina ala ani mɔɔyɔ́-mii kaƒɔ bɔbla lɛlɔ na bɛɛwia amii lɛti bɔdia na bɛɛnya bina kabla bablane ama taakya.

⁴Bɛɛkɛ́ ku kɔnyi muedi na binye kagyumana ka bikpo. Nsu utabla-mii dɛye dɛye, ɔsika Unwoti ulakana na wenu-mii bɔkpali na ɔbladu ɔmɛni kemmo!

⁵Bɔkali na bɛɛkali bɛnii kalɛ na binyimi kenye, na bini adila bite lɛlɔ, na bɛkya lili kalɔ buɛɛ bite Unwoti aani livo lɛni na ɔƒɛƒɛɛ ku ɔnantu ntu búbo bɔ́kya kalɔ mɔɔda-nwu ebiti? Munuu kalɛ na bɛda kɔnyana ala, na bɛkpi ntɔ na bɛɛlɔ kenye bunyimi bɔni ndi Unwoti limeyi lɛni mɔɔda-nwu kubiti?

⁶“Kudii, mmomu lɛla lɛni mɔɔyɔ́ Unwoti kaƒɔ ndi kalɛ na bɛya na bekyuli bani na baanya taakya bakɛ bɔnwuna na belie bete lɛlɔ. Na kalɛ na bekyuli baládi litemi lɛlɔ siin teete bekyuli na únwini aani kɔgba na kɔda bekyuli ɔkwɛ ni, bidie-ku bana ɔkwɛ na bikulo kɔbuli kɔmmɔ ƒui bana lɛlɔ.

⁷Na bile bina adila bite ukyuli biala na kɔka kɔɔda. Na bɛya na bawabane ku bani neeebo kuduokɔ bakɛ kuduokɔ bina kudɔ na bakɛ kɔtɛnkɔ. Na bani mɔɔyaki adala lɛnɔ na bite-ma adala na babɛ kɔyɔ. Na bilénwini kama bilakya bina lɛlɔ bekyuli.

⁸Si bɛ́bla ɔmɛni ni, bɛdubɔnu kalɛ na muukeye na ɔya na bɛkɛ ɔlɛ bɔbwi. Na bina ala bɔbla siin bɔmɛni bɔdubɔgyumana-mii na bina keliela kemmo na Unwoti bukeye bɔgyumana-mii bɔsiku bina kama.

⁹Na si bɛ́kpali Unwoti ni, ɔdubɔtuna ute-mii kɔnakunwi ɔnini, ‘Bɛɛnu-mi nnye-mii kudɔ mɛni!’ “Bitabla bina bakpana kalala na bitanyi ɔkɔ na bɛdu-ma kɔtɔ iye bɛda litemi bɛsia-ma lɛlɔ lɛnɔ.

¹⁰Bile bina adila bite bani na kɔka kɔɔda na bɛƒɔ bani neeebo kuduokɔ na bakɛ kuduokɔ na bina kudɔ na bɛnu-ma lɛlɔ. Na ɔmmɔ ɔdubɔya na bina ablala ekeye na kesii kani na kese suu. Na si amii lɛnɔ bíduo ɔgbankpi ɔdi kemmo na use aani kalɛ na beeduo lɛdisa kemmo ni, na unwini aani ɔƒiiwi kadi nwaa ute-mii.

¹¹Unwoti ɔdubɔtɔnku-mii na ute-mii ala ani ƒui námanku-mii na kalɔ kakwiidi kammɔ kemmo na ute-mii ɔlɔkplu. Na bɛdubɔbla aani kevoma kemo kani edula mɔɔkɛ́ ntu uwi biala iye ketu kani ntu naaakwii uwi ɔdi.

¹²Bɛdubɔsɔku bina atɔnku ani nábwɛ uwi gyɔlɔɔ aani akwa akwa mɛni bɔtu. Na ɔkɛnku ɔmmɔ ɔsu bekyuli badubɔlɔ-mii banii bekyuli bani mɔɔsɔku atɔnku ku lɛma linengudi awodu taatala na basɔku lɛblɔnu bedie.

¹³“Nsu ɔlɛka bɛka mina Lɛnwunameyi bɔbu aani lɛlɔyɔ lɛkpa limeyi na bɛda enyekpi bɔtɛmi kalɛ kalɛ bɛya ku ala basa basa bɔbla bɛya na limeyi linengudi lɛmɛni lɛlɔ.

¹⁴Na bɛdubɔnu lɛlɔyɔ lɛni nkya mina bɔsiaku kemmo na lɛya na ɔbu ɔkya-mii lɛlɔ na kayawi kadi bekyuli ƒui anumi na bɛdi-ma lɛlɔ útédu abi eli ƒui. Na Unwoti ɔdubute-mii kusɛ kusɛ na bile bɛdi bina nana ati Yakob kalɔ kammɔ uwi ƒui.” Lɛni na Unwoti ɔlati ɔ́su!