Read Lelemi Yesaia 59 Bible Online

Yesaia 59 - Lelemi bible

Yesaia 59

¹Bitakali bɛnii Unwoti ɔyikun ɔ́sɔ na ulakana kɔnu bunene bɔƒɔ-mii iye atu éti-nwu na ulakana na wenu bina bɔkpali.

²Mmomu bina alaekpidi náda-mii ntɛ ɔsu na údie anumi bina lɛlɔ na ɔsɔ ulenu-mii bɔkpali.

³Bina ɔkɔ bɔnyi ku bekyuli bɔdu ku bekyuli lɛlɔ bɔta teenye ɔ́ya na bɛ́dɔli ku ekpidi ammɔ na Unwoti anumi.

⁴Biiti lɛlɔ teesienku litemi katɛkɔ nsu bilátɛ etemila ulu siin lɛlɔ. Mmomu unyeƒi ukpludi ku kenye ogya ku ɔkɔ ala sɔɔn na bɛɛsu. Na biilie taabla kasusu kekpidi uwi biala anwuɔsu lɛnɔ na bɛɛwɔ likpidi.

⁵Bina ablala eevuo balakpi bekpidi avala, na ɔdi biala makun bina avala ammɔ ɔdubo bukpi. Na kakwɛ biala na bɛdubudie keyi aani avala akladi ani nébu buvuo ni, balakpi bekpidi bammɔ kani ndubo bɔlɛ pii.

⁶Anasi kɔgbu na biidí, na ɔɔɔdi adi ani na bebi lɛlɔ. Likyulikpi bɔbla ku kalala bɔ́ƒɔ-mii enu ƒui.

⁷Bɛkɛ usi uwi biala ka bitábla likpidi, na bɛdu bekyuli bani na bátabla-mii lɛla lɛdi, ku ekpidi bamba lidu lɛnɔ. Likpidi kasusu kani na biilie taabla uwi biala na ala bubile kani na baanu na bina kasiakɔ ƒui.

⁸Bina ablala aaadanku keyi buɛɛ kadi, anwuɔsu bekyuli bani nsiaku-mii kama ƒui beeebo bɔnwuna bɔdi biala ku keyi buɛɛ kadi.

⁹Ka bénu ala amɛni ni, básu banini, “Ukyuli biala útebo ɔnii ubekpo ute-bu iye ubatɛ bula etemila ute-bu na ulu siin lɛlɔ. Nka bula anu asia bukeye nwaa lɛlɔ, nsu lɛdisa kemmo na bɔkɛ susuusu.

¹⁰Na enu kani na bɔkɛ buubó aani banumbwɛne. Na ɔƒiiwi nwaa muedi bɔkɛ buutulo aani si usien na bɔkɛ iye kekpine na bɔkya.

¹¹Buubó adi aani eƒiebuo na buudumo aani babloduma teewulo kɔnyana. Bɔɔwia ka batɛ-bu litemi siin na bɔdi lɛlɔ, nsu ɔmɛni ƒui ɔ́vi-bu lɛgya.”

¹²O Unwoti Katɔti, bɔ́ɔƒiɔ-ɔ kɔlɛ kɔlɛ, na bɔ́ta búnye-ɔ lɛlɔ. Na bula ekpidi aadú-bu kɔtɔ ka bɔ́bla likpidi!

¹³Bɔ́ta búnye-ɔ lɛlɔ na búni bɔnii bulasiaku-ɔ kama. Ɔkɔ etemila sɔɔn néyi-bu kayi kemmo anwuɔsu na ɔkɔ ɔmmɔ kani na bɔɔnyi na bɔɔnya bula bakpana taakya.

¹⁴Ɔkɔ etemila bɔtɛ kani náƒɔ kesii biala. Na ala bɔbla siin bɔdi bɔsɔ buuubo, na litemi geen ani lɛ́sa ƒui aani kalɛ na baabɔku lɛla lɛdi teedie kesii kadi.

¹⁵Litemi lɛlɔ bɔdi siin bɔdi bɔsɔ buuubo anwuɔsu ukyuli ɔni muuní likpidi bɔbla ni, bekyuli beeti anumi taalɛ-nwu ɔni na kawɔlɔkɔ bɔdu kani na baadú-nwu teedie. Na ka Unwoti ɔ́nu litemi tatɛ ulu lɛlɔ bɔmɛni ni, kaƒɔ kátayɔ-nwu.

¹⁶Ɔ́nu ka ukyuli ina unwi pɛ muedi uuubo ɔni mɔɔwia ka litemi bɔtɛ ulu siin lɛlɔ bɔmɛni bɔƒɔ bekyuli akɔ, anwuɔsu anwu ɔlati údie nwuna kɔnu na ɔ́bla ɔyikun ala na ɔ́ya na nwuna litemi geen lɛmmɔ lɛ́di lɛlɔ.

¹⁷Siin bɔbla ndi awu na Unwoti ɔkya aani kekpo lɛgyumanala na nwuna bɔƒɔ ɔyikun ɔdi kekpo kabwa kebi-nwu lili na nwuna kɔnyi kɔni na ɔdubuti udie likpidi bablane kasi ku lɛnungyie ndi nwuna awu gyɔlɔɔ.

¹⁸Unwoti ɔdubo kɔnyi buti geen na udie nwuna bekisine kasi, bekisine bani nde ku bani nkya ɔlɔgyu ƒui, na udie kasi na ekpidi ani na bábla kenye.

¹⁹Na ɔ́si ɔƒɛ katukɔ útédu kanukɔ ƒui bekyuli badubo butaayia-nwu na bemwi-nwu kalɛ na uukeye. Ɔsika ɔdubɔda ɔlɛ-ma lɛlɔ aani ketu kani néyi na kadanku ɔƒɛƒɛɛ kpakplaa na ɔbɔku-ma ƒui.

²⁰Unwoti ɔnini, “Udiene ɔdubo Sion na udie Yakob kaba kemmo bebi bani ndubunwini kama bakya bana ekpidi.

²¹“Líse-ma kenye ka ndubuti mina Kɔyu ku linyesia lite-ma. Na ɔmɛni ndi mina etela ani na ndubuti lite-ma ku bina kɔduli bekyuli úsela uwi ƒui.” Lɛni na Unwoti ɔ́su.