Read Lelemi Yesaia 62 Bible Online

Yesaia 62 - Lelemi bible

Yesaia 62

¹Yerusalem, ndubɔtɛmi lidie-ɔ kenye, na ƒula bɔdia ɔsu na lɛɛɛdubo kenye bubile bɔsɔ bulie kpoo wetédu uwi ɔni na lɛ́ƒɔ-ɔ na élie kalɔ na ebo bɔnwuna na eekeye aani ogya unyemi.

²Na kadi ƒui bekyuli ku bana baga badubɔnu kalɛ na ádi lɛlɔ na Unwoti muedi ɔdubute-ɔ lɛnyi lɛwɔdi.

³Na adubɔbla aani kagabwa kani muukeye na ƒula Unwoti Katɔti lɛkɔkɔ.

⁴Na bekyuli basɔ baaadubo ƒula kalɔ kammɔ lɛnyi bɔsia banii, “Udinkɔ ɔni na béni bése.” Mmomu badubɔlɔ-ka banii, “Uleku ɔni na báwɛɛ-nwu kaduɛ.” Ɔsika ƒula lɛlɔ lɛdubɔda Unwoti ebiti na ɔdubɔbla aani uleku ogya ute-ɔ.

⁵Kalɛ na ebiti aada okloƒu ɔni néti adagyaa na lɛlɔ lɛɛyɔ́-nwu na ɔɔda-nwu ni, lɛni na ƒula bebi badubɔda-kalɔ kammɔ. Na kalɛ na uleku ɔgya ku ulekudi beelie ku ebiti ni, lɛni na ebiti adubɔda Unwoti na ƒula lɛlɔ.

⁶Yerusalem ƒula ɔma awodu lɛlɔ na ndubunyene bagyumanane bani ndubo-mi buteenyimene usien ku ɔƒɛ na belebile kenye

⁷ka lɛbla na Yerusalem ɔkɛ ɔlɔkplu na ɔƒɔ lɛnyi na kesi kesii.

⁸Unwoti úse kenye kpakplaa ɔnini, “Nsɔ lɛɛɛdubo bina edula buti bute bina bekisine na badi. Na kadi bamba bekyuli basɔ baaadubo bina ntɛ bɔwɔdi bɔni lɛnɔ na bíbo abi bídie bɔni kudii.

⁹Uwi ɔni na amii alati néti bina enu bɛ́bla bina edula mmo ni, bɛdubo bina adila bɔdi ku lɛlɔyɔ. Na ntɛ bɔni na bídie ni, bɛdubɔni-mu na mina kaduli ku ebiti na bɛgya-mi enu na mina kakpakɔ.”

¹⁰Yerusalem kadi bekyuli, bɛlɛ na bitábwɛ ulu kaduɛ bibeduoku ɔma ɔmmɔ kemmo bite bina bekyuli bani nási badubo na bidie atabi ƒui na ulu lɛlɔ. Bɛlɛ aƒlaga bite kadi bekyuli na banu.

¹¹Na bati ka Unwoti muute-ma bɔti ɔnini, “Yerusalem bebi bɛnu, bina Ɔƒɔne ɔ́si ɔdubo! Na ɔda lɛyuƒɔla ɔduboku-mii.

¹²Na ɔmmɔ kama badubɔlɔ-mii banii, ‘Unwoti ɔlati bekyuli bani na ɔ́ƒɔ ɔ́lɛku bubie kemmo!’ Na bekyuli badubɔtɛmi bɔsiku ƒula ɔma ɔmmɔ lɛlɔ banii kesii kabuni kani na bekyuli bilie ku ɔma ɔni na bekyuli báƒɔ-nwu kemmo geen.”