Read Lelemi Yesaia 65 Bible Online

Yesaia 65 - Lelemi bible

Yesaia 65

¹“Lídie lɛlɔ lɛ́tina bekyuli bani na béteye-mi lili. Na bekyuli bani na bátawia-mi kama ulu bánu-mi. Na kadi bani bekyuli nátakpali-mi lɛnyi kudii ni, lɛ́su-ma nnini, ‘Bɛɛnu-mi mɛni, nnye mɛni.’

²Lídie mina enu nnye limeyi limodi ngya bekyuli bani na báta bénye mina lilu lɛlɔ na bakɛ ulu ukpidi lɛlɔ bésela na basia bana kasusu kama kani.

³Na baakya-mi kɔnyi uwi ndi uwi anumi ku anumi. Na bakɛ mmo ku atabi akpabi lidu lidu ƒui lɛlɔ baakyula akpala ku oloƒui.

⁴Bakɛ bekpine kɔvakɔ na kɔƒiɔtɔ akɔ usien umodi lɛlɛɛ talɛɛ talɛɛ banii baakpali ala. Na baadú baplakuo taakun na béƒulo lɛna lidu lɛni muusé lɛlɔ béyile kutu lɛtata.

⁵Bekyuli bamɛni mɔɔsu bekyuli bamba banii batani betede-ma, ɔsika ama bese sɛɛn na belese lɛlɔ aani bana bakpana. Nsu geen ni, bekyuli bamɛni bese aani uyɔ na mina enwu kemmo na bese aani ogya ɔni mɔɔda limeyi limodi.

⁶Bɛnu, mɔɔnu bunweni bɔdi na mina anumi bɔni na Unwoti ɔɔsu ɔnini, ‘Lɛɛɛdubo mina kenye bubile bɔsɔ bulie kpoo mmomu ndubɔƒɔ kayu keyile bute ɔdi biala.

⁷Bana ekpidi ani na bábla ku bana bati ekpidi lɛnɔ. Ɔsika bákyula akpala na abi lɛlɔ na bése kayi báta bénye-mi lɛlɔ na abi lɛlɔ mmɔ. Anwuɔsu ndubo bana lɛyuƒɔla keyile kani námanku bana ablala ani návi ƒui bɔƒɔ bute-ma.’ ”

⁸Unwoti ɔnini, “Kalɛ na si kutu ɛlɛɛ úbu ɔsia kugyii lili na ubo ntu na ɔdia bɔdi na bekyuli baasu banii batada kugyii kɔmmɔ, ɔsika kutu ɔbuni ɔdi úbu ɔsia kugyii lɛlɔ ni, lɛni na ndubo bɔbla bute mina kabla bablane bani mɔɔdi mina litemi lɛlɔ na lɛɛɛdubo bekyuli bammɔ ƒui udu bɔyila bɔsalaku-ma.

⁹Ndubo Yakob kaba kemmo bawɔ bɔƒuna ku Yuda lɛnɔ. Na ama na ndubɔya na beti mina abi ammɔ ƒui benwini bana ɔdi. Na mina bekyuli baƒunadi bamɛni na ndubɔya na beti bana kalɔ kammɔ na belie-ka lɛlɔ.

¹⁰Na Saron ɔdubunwini bebuo kadikɔ kabuni ute bana bebuo. Na Akor Ɔkwalɛ bonwu ɔmmɔ ɔdubunwini kesii kani na bebuo bammɔ badubo butaatɛ taanwuna ute mina bekyuli bani mɔɔwia-mi kama ulu.

¹¹“Nsu amii bani néni ami Unwoti na bɛ́yiƒala mina kɔbi kedee kɔmmɔ na biisé kadikɔ na bɛɛsála ntɛ na bɛɛdi taani teemwi baƒiɔ bɛnii ama mɔɔyá na lili lɛɛdia-mii na ama mɔɔgyumana-mii kasikɔ ni,

¹²ndubo-mii bɔnyonu bute na bɛkya eli kalɔ na bina bekisine badu-mii ƒui. Ɔsika lɛ́kpali-mii na bítatuna bítete-mi. Na lɛ́tɛmiku-mii na bítenu. Mmomu bɛ́bla likpidi na mina anumi na ala ani na alayɔ-mi kaƒɔ mmomu na bɛ́ƒuna ka bitaabla.

¹³“Binu! Ami Unwoti Ɔyikune Ƒui mɔɔsu-mii nwaa ka mina kabla bablane badubo bɔdi, nsu kɔka kɔdubo amii alaekpidi bablane butaada uwi biala. Na badubo bɔni, nsu ntukwɛ ɔdubo-mii butaada uwi ndi uwi. Na lɛlɔ lɛdubo-ma bɔyɔ, nsu kɔƒa kɔdubo-mii bukpo.

¹⁴Mina kabla bablane badubo lɛnu budie ku kubiti bɔsiku bana kayi kemmo nsu amii bɛdubo kɔnyana buwulo na kayi kakpulu-mii na bɛyila lɛnunsia biala.

¹⁵Mina kabla bablane bammɔ badubɔkpali bina anyi bewida bekyuli banii badubɔnuku-ni aani bina kalɛ. Nsu ama ni, ndubute-ma anyi awɔdi.

¹⁶Ami kani ndi Katɔti ɔni lɛlɔ na ukyuli ɔdubɔkana na ɔsia lɛnu. Ala ani na ékpoku-mii dii ƒui ávi ni, ami nsɔ neeeti-nya lɛlɔ kasusu. Si biivele kusɛ kusɛ teete ukyuli ɔdi iye biisé kenye kadi ni, bɛbla lɛla biala na mina lɛnyi kemmo. Ami lɛti kani ndi Katɔti ɔni kani na ukyuli ɔsia lɛnu.

¹⁷“Ndubo katɔ kawɔdi ku kalɔ kawɔdi budie na bekyuli bayiƒala ala ani na ávi ƒui.

¹⁸Bɛdi limeyi ku ebiti na lɛlɔ litaayɔ-mii uselaku uwi ƒui! Muudie Yerusalem ɔwɔdi ɔni kemmo na lɛlɔyɔ bekyuli sɔɔn ndubɔƒɔ-nwu kemmo.

¹⁹Na ndubɔdiku Yerusalem bekyuli bammɔ ƒui limeyi ɔni na kɔnyana buwulo iye keku kadi kasɔ kalakya ɔma unengudi ɔmmɔ kemmo.

²⁰“Na ubi ɔdi ɔsɔ ulekpi lɛnamu uwi mmomu badubulie babi lɛlɔ babla benengu geen. Na ukyuli biala na ɔ́ƒɔ akwa eti anyɔ ni, badubɔnu-nwu ɔnamu ɔni na si úkpi na útaƒɔ tɔ akwa eti anyɔ ni, na ewida na adi-nwu.

²¹Mina bekyuli badubulie lɛtɔ lɛni na ama alati bátu kemmo. Na badubɔdi egyiibi mmo bɔni na bése ebi.

²²Ukyuli ɔdi uláƒɔ bana lɛtɔ lɛni bátu iye bana mmo bɔni na bése. Na mina kadi bekyuli baƒunadi bamɛni badubulie babi lɛlɔ aani egyii na badi ala ani na ama alati béti bana enu bábla.

²³Bana kabla kalayii udu na ɔlɛ ukpidi ɔdi uládu bana bebi mmomu ndubute bana bebi ku bawɔ lɛnɔ kusɛ kusɛ.

²⁴Ndubute-ma lɛla lɛni baawia asa na bakpali-mi muedi nsu si baakpali lɛnɔ ni, ndubunu lɛla lɛni na beevele-mi.

²⁵Begidi ku baƒonubi badubɔdi basala na bagyata ku bakɔ ƒui badubɔkun keti. Na balakpi badubɔkun lɛti kani! Na baladu iye babla ɔdi lɛla lɛdi na mina kɔbi kedee lɛlɔ mmɔ. Lɛni na ami Unwoti mɔɔsu!”