Read Lelemi Yesaia 7 Bible Online

Yesaia 7 - Lelemi bible

Yesaia 7

¹Uwi ɔni na Ahas ɔni ɔti ndi Yotam, na ɔdi Usia uwɔ, ɔɔdi lɛga na Yuda ni, Aramƒuɔ Ɔga Resin ku Ramalia ubidi ɔni baalɔ Peka na ɔɔdi lɛga na Israel kalɔ lɛlɔ báta banii bebékpo Yerusalem, nsu bátakana na badi Yerusalem lɛlɔ.

²Kenye kébedu Ahas kudɔ banini, “Ɔga Resin ku Ɔga Peka bása lili na ama ku bana bekyuli báta ka bebékpo-bu.” Ɔmmɔ ɔsu ɔtɔtɔ ɔ́gyu Ɔga Ahas ku nwuna bekyuli na baatɔ́ kpakpaakpa aani kalɛ na ɔƒɛƒɛɛ uukpó taavi egyii akɔ.

³Amu na Unwoti ɔ́su Yesaia ɔnini, “Awɔ ku ƒ'ubidi Sea-Yasub, ɔni kalɔ ndi Badi Badubo Bubu, bisie na bitásiaku Ɔga Ahas na ketu kammɔ kawɔlɔkɔ kesii kani muuduo ligyu kemmo mmɔ. Mmɔ kedenku ulu ɔni néti úsela kesii kani na baakya adi kuvo mmɔ.

⁴Na asu-nwu anii, ‘Da kayi bukpoku ya, na utalɛka ayia Ɔga Resin ku Ɔga Peka, ku bana bekpone kɔnyi momoomo kɔni na béti. Ɔsika bese aani ogya egyukwii ani mɔɔkywí na adubo bɔsa.

⁵Sɔsɔ na ɔdi ka Aram ku Israel kalɔ baga bamɛni báta ka bebékpo-ɔ na baasu banini,

⁶“Bɛya na bukpoku Yuda na bɔgyingya ɔma ɔmmɔ na bule-nwu bɔkya lɛlɔ. Na bɔdubɔbwɛ buduo Yerusalem na buti Tabeel ubidi buse lɛga aani Yudaƒuɔ ɔga.”

⁷Nsu ami Unwoti Ɔyikune Ƒui mɔɔsu nnii, “ ‘Ulebo ulete lɛni, na balakana-mii lɛlɔ bɔdi kudii,

⁸ɔsika Damasko ndi ɔma unengudi ƒui na Aram kalɔ lɛlɔ na Damasko ɔmmɔ lɛlɔ ɔdine kani ndi Resin. Ɔƒɛni Israel kalɔ aka ni, na akwa liti ku leevu-ɛlɔ kemmo ni, badubo ɔma ɔmmɔ bɔbwɛ na bayila-nwu udu ƒui.

⁹Israel ɔma unengudi ƒui ndi Samaria. Na ɔma ɔmmɔ lɛlɔ ɔdine kani ndi Ramalia ubidi Peka. Na si eeenye mina bɔƒɔtaadi kemmo kpakplaa ni, agyi anii eeebo kenyekɔ kadi.’ ”

¹⁰Unwoti ɔ́sɔ ɔsu Ahas ɔnini,

¹¹“Vele ami Unwoti ƒula Katɔti na lɛtina-a likposela lɛdi ɔ́si kalɔ kemmo ƒui útédu katɔ kakaaka.”

¹²Nsu Ahas úbulo na ɔ́su ɔnini, “Oowo, lɛɛɛdubo mina Unwoti bɔkɔku bɔnu.”

¹³Amu na Yesaia ɔ́su ɔnini, “Binu kaduɛ, amii Dawid kaba bebi! Kalɛ na biléte bekyuli lɛlɔ buwi útabɔ? Ɔlɛka biti ɔmɛni bɛlɛku Katɔti lɛnɔ?

¹⁴Ɔmmɔ ɔsu ni, Unwoti ɔlati ɔdubute-mii likposela lɛdi. Bɛnu! Adagyaa ɔdi ɔdubɔda kaƒɔ na ɔwɔ ubi ɔnanabi. Na badubɔlɔ-nwu banii Imanuel.

¹⁵Na uwi ɔni kemmo na ubi ɔmɛni ɔdubɔti bebuo lɛnyi ntu ku uwɔ bɔdi ni, ɔdubɔti lɛla kanaalɛ na ɔƒuna lɛla lɛni ndia na uni lɛla likpidi.

¹⁶Nsu asa na ɔdubɔti likpidi ku lɛbuni kavumana ni, baga inyɔ bani na aayia geen na badi Israel ku Aram baga mmɔ béekpi bábavi.

¹⁷Unwoti ɔdubɔya na uwi kpakplaa ɔni nétebo tɔ dii ɔ́si uwi ɔni na béle Salomo lɛga kadikɔ na kénwini Yuda ku Israel ubasiaku-mii, awɔ ku ƒula kadi bekyuli ku ƒula ɔtɔ kemmo bekyuli ƒui lɛlɔ, na ɔya na Asiria ɔga ubo ubekpoku-mii.”

¹⁸Na limeyi lɛmmɔ lɛlɔ ni, Unwoti ɔdubɔvwi lise ɔkpali bekpone ɔkya-mii, na bana bumomo bɔdubɔbla aani baalɔlɔ ku banwɛnwɛ ɔsiku Egyipte ntukpa ɔvi na katɔ kakɛ ƒui ku Asiria kalɔ lɛlɔ.

¹⁹Badububo na babaƒɔ bina awɛ ƒui kemmo ku atakpɛ libu ku ana kɔka ƒui kemmo ku liyu akunkpo ku abiɔ ƒui kemmo.

²⁰Na Unwoti ɔdubɔya na Asiria ɔga ku anwu badi bekpeyi-mii eli ku bina lɛlɔ linwini ku bina likwi lɛnɔ na bakya-mii kɔƒa.

²¹Na bebuo bani na badubuƒie bebu akɔ ni, ɔmantɛ akɔ ɔkɔdi ku koƒonu kɔkɔdi ku ese ɔkɔdi unwi unwi ɔdubo bubu kaduli biala.

²²Na lɛnyi ntu pii lɛni na bebuo bammɔ badubo butaayu ɔsu ni, nkyuli ɛlɛɛ bani ndubo bubu mmɔ badubɔkɛ lɛnyi ntu pii na udu-ma bɔni.

²³Na bina adingyii mmo bɔni na bíse na bɔdubɔƒɔ kuye sika ɔƒualadi mpim ɛlɛ ɛlɛ ni, bɔdububie bunwini liyu likpidi yayaaya aku sɔɔn.

²⁴Na bina atula ku kɔtaminta na bɛdubuteeti teesie taatábui na mmɔ ka mmɔ kasɔ kaaadia bɔtuma ɔsu.

²⁵Kalɔ kani na nka bɛ́kya-ka anwami bɛ́tuma dii ni, kadubunwini liyu yayaaya aku ani nsɔ naaadubo bɔdia bɔmɛnɛ buduo na bɛtuma. Mmomu ɔdubunwini kesii kani na bina bebuo badubuteesie taatávi taawia bana alakpi ani na bakun.