Read Lelemi Yesaia 8 Bible Online

Yesaia 8 - Lelemi bible

Yesaia 8

¹Na uwi ɔdi kama ni, Unwoti ɔ́sɔ ɔ́su-mi ɔnini, “Ti ebuo ɔku kakunkɛ na eti unwenigyii na enweni lɛnyi lɛni kalɔ ndi Békpo-ma Béƒie-ma Ala Báƒɔ asia-nwu lɛlɔ.

²Na ndubɔlɔ ɔkpane Uria ku Yeberekia ubidi ɔnanabi ɔni baalɔ Sakaria bani muudie-mi litemi kenye ulu lɛlɔ geen na bebo.”

³Amu na lísie mina uleku kudɔ na ɔ́da kaƒɔ na úbawɔ ɔnanabi. Na Unwoti ɔ́su-mi ɔnini, “Sia-nwu lɛnyi anii Békpo-ma Béƒie-ma Ala Báƒɔ.

⁴Na asa na ubi ɔmmɔ ɔdubɔti bɔsu ɔnii, ‘Mina Ati’ iye ‘Nna’ ni, Asiriaƒuɔ ɔga úuti Damasko lɛlakɛ ku ala ani na ɔdubuƒie ɔƒɔ na Samaria ɔ́tɔlɔku uwi ɔmmɔ.”

⁵Na Unwoti ɔ́sɔ ɔ́su-mi na uwi bamba ɔdi ɔnini,

⁶“Ka kadi kamɛni béni kalɛ na nda-ma aani Siloa Ketu kani mɔɔgbá buɛɛ, na Resin lɛlɔ mɔɔyɔ́-ma kaƒɔ mmomu ku Remalia ubidi ɔnanabi ɔsu ni,

⁷Ami bana Unwoti Katɔti ndubɔya na Asiria ɔga ku nwuna bekpone balɛ na bana limomo ku ɔyikun kemmo bebo aani Euƒrate Ketu kani néyi ku atu, na kagbala-ma kavia utubli ɔmmɔ lɛlɔ ƒui.

⁸Na kadubɔgbala ala laa ketédu Yuda, na kabuala kavi na keyi kadanku-ma amɔ. Na kana avwi ani na úgyingya adubo bɔbɛbɛ bubi ƒula kalɔ kammɔ ƒui, O Imanuel!”

⁹Bibo kekpo kudu amii kadi bekyuli, na bibile ala kalɛ na bɛkana na bɛdubo bɔyii udu! Binu amii ɔlɔgyu kadi ƒui bekyuli. Bɛklibi lɛlɔ bite kekpo, nsu bɛdubo bukpi!

¹⁰Bisie kelisa na bɛkya bina kekpo kɔkwɛ ƒui, na bɛtaa kasiakɔ biala bite lɛlɔ, nsu ɔmmɔ ƒui ɔdubɔbla keeke, ɔsika Unwoti Katɔti ulieku-bu.

¹¹Katɔti ɔyikun ɔ́ƒɔ-mi lɛlɔ kemmo na ɔ́su-mi kpakplaa ka ntasiaku bekyuli bɔmmɔ ɔbladu kama ɔnini,

¹²“Lɛla lɛni na badubɔlɔ kelisa kekpidi ni, tasiaku-ma anii kelisa kekpidi kadi. Na uwi ɔni badubɔlɔ unwi bɔbla kasala ni, tenuku-ma kalɔ na asiaku-ma lɛni. Tayia lɛla lɛni na baayia, na liƒu lɛnɔ litada-a.

¹³Unwoti Katɔti ndi ukyuli ɔni kani na ɔdi ka anu ka use kedee, na anwu kani na ɔdi ka ayia, na nwuna lɛlɔ liƒu lɛkya-a kemmo,

¹⁴na ɔdubɔbla katamikukɔ nsu na Israel lɛgakɔdikɔ inyɔ bɔmmɔ ƒui akɔ ni, ɔdubunwini lɛtabi lɛni na bekyuli badubutulo, na ani kani na ndubɔya na begyiile bebuli. Na Yerusalem kadi bekyuli ama ni, ɔdubunwini kakpagyuɛ ku kamia ute-ma.

¹⁵Bana akɔ pii badubo butulo na bebuli baƒɔ lɛlɛ, na kamia kadubo bɔta na kedie-ma.”

¹⁶Kono bunyimi ku ɔda bubo bɔmmɔ na abala-mu kenye ku kɔma ese mina basiakune.

¹⁷Ndubunye ntaanu mina Unwoti anumi, ɔni nábɛla nwuna anumi ɔ́siku Yakob kaduli bebi kudɔ. Ndubuti mina anu ƒui lɛsia Katɔti lɛlɔ.

¹⁸Aanu ami ku bebi bani na Unwoti úti úte-mi. Abu ndi bɔnu bɔti ku likposela na Israel bani nási Unwoti Ɔyikune ɔni nli Sion Kɔbi lɛlɔ kudɔ.

¹⁹Si bekyuli baasu-mii banii bitébo like na biye bekpine ku ayu ani mɔɔtɛmi kabɛnsɛ na baatɛmi linwubwɛ ala binu ni, ɔɔɔdi Katɔti mmomu na biye ala kalɔ binu? Bi ɔsu na bekpine na biiye ala binu bɛsiku bayawine lɛlɔ?

²⁰Bɛnu bɛti ka si bana ala aaakɛnku mina litemi lɛni ndanku ɔda bubo ku bunyimi bɔmɛni ni, na bukeye bɔdi buuubo-ma kemmo.

²¹Ala adubo-ma bukpoku na kɔka lɛnɔ kutaada-ma na bakɛ bataavi kalɔ kammɔ ƒui lɛlɔ. Na si kɔka kɔmmɔ kútulo-ma ni, badubo kɔnyi buti geen na bataanu katɔ teewida bana ɔga ku bana Katɔti.

²²Na si báyula anumi kalɔ lɛnɔ ni, lɛƒɛda lɛmmɔ kani na badubo bɔnu na ɔbla-ma suu na liƒu geen lɛƒɔ-ma lɛlɔ kemmo ƒui na basɔ bakya lɛdisa suu lɛmmɔ kemmo.