Read Lelemi Yesaia 9 Bible Online

Yesaia 9 - Lelemi bible

Yesaia 9

¹Nsu kalɛ na báyila lɛnunsia na beli lɛdisa kemmo mmɔ ni, ulése lɛni uwi ƒui. Uwi ɔni návi ni, bátabu Sebulon ku Naƒtali bátakya lɛla lɛdi kemmo. Nsu uwi ɔdi ɔdubo ɔni na Katɔti ɔdubuti bukeye ute kadi bamba bekyuli bani nlie Galilea na Yordan Ketu ulu lɛlɔ úti útédu ɛpu kɔtu.

²Bekyuli bani na nka beli baabla ala na lɛdisa kemmo badubɔnu bukeye. Na bani na belie kukpi ɔgbankpi kemmo ni, Katɔti bukeye bɔdubuwi-ma lɛlɔ.

³Na Israel kadi badubɔsɔ balɛ lili na baƒɔ lɛnyi na lɛlɔ lɛyɔ-ma aani kalɛ na lɛlɔ lɛɛyɔ́ bekyuli si báƒɛ edula awɔdi. Na badubo kudu bubo geen ku lɛlɔyɔ aani bekpone muule ala ani na béƒie báƒɔ bana bekisine kudɔ.

⁴Ɔsika lɛbibo ku ukyuli kalala bɔbla bɔni nénwini lɛbibo kɔgba na kɔda ƒula bekyuli ni, adubo-ku bɔƒɛ ƒui, aani kalɛ na áyila Midianƒuɔ bekpone udu ƒui.

⁵Na bekpone adala ku agbanvuo ani nákpi ubugya na kekpo ni, ala ammɔ bene ƒui adubunwini ala ani na badubo ogya bɔkya.

⁶Ɔsika báwɔ ubi ɔnanabi béte-bu. Na bekyuli ƒui lɛlɔ bɔdi lɛdubɔsia-nwu lɛlɔ. Na badubɔlɔ-nwu banii Kasusu Buni Ɔkyane ku Katɔti Ɔyikune ku Ati Ɔni Nli Uwi Ƒui ku Keyi Buɛɛ Ɔga Ubi.

⁷Na nwuna lɛga kadikɔ kadubo katɔ butaakɔ ku keyi buɛɛ, na kaaadubo ulu bɔwɔ kudii. Na ɔdubulie Dawid lɛgaboku lɛlɔ utaadi lɛga lɛmmɔ, na nwuna lɛgadi lɛdubunye uwi ƒui. Na ɔdubɔtɛ litemi ulu lɛlɔ, na nwuna ablala ƒui adubuse siin. Na Katɔti ɔdubɔya na ɔmɛni ubo-nwu kemmo ɔkɛnku nwuna ɔyikun lɛlɔ!

⁸Unwoti ɔdanku linyesia kpakplaa ute Yakob kaduli bekyuli, na lɛla lɛmmɔ lɛdubo Israel lɛlɔ.

⁹Na bekyuli ƒui badubo-ni bɔnu bɔti, Eƒraim ku Samaria kalɔ lɛlɔ bekyuli ƒui. Ama mɔɔkun lɛmɛnɛ na baakɔliku lɛkɔ katɔ taasu banii,

¹⁰“Unwoti ɔkɛnku bula bekisine lɛlɔ na ɔ́ya na báƒɛ bula awodu atimbɔ lɛtɔ ƒui béwi kalɔ, nsu bɔdubo lɛni ndia ntulo lɛmmɔ bɔtu ku atabi abwɛdi ani na bánwi kaduɛ. Na báƒɛ ɔtɔ ɔmmɔ ligyii ka liiibo ɔkplu ɔsu, nsu bɔdubɔvumana-ni ku ligyii kpakplaa geen.”

¹¹Nsu bana lɛlɔ katɔ bɔkɔliku bɔmɛni ɔsu ni, Unwoti ɔdubɔya na bana bekisine bani ndi Resin ku Asiria bekpone basala bata babasiaku-ma.

¹²Na Siriaƒuɔ badubɔsi ɔƒɛ katukɔ, na Ƒilistiƒuɔ basi ɔƒɛ kanukɔ na bebebweli-ma aani eƒiebuo kalɛ. Nsu ina ɔmmɔ ƒui ni, Unwoti kɔnyi kútayɔ tɔ, mmomu ɔ́mu únene kɔnu unye ka ɔƒiɛmi-ma.

¹³Nsu bekyuli bamɛni belenu kalɔ ka benwini bebo ukyuli ɔni mɔɔní-ma kɔtu kudɔ, bana Unwoti Ɔyikune Ƒui kudɔ.

¹⁴Anwuɔsu limeyi linwi kani na Unwoti ɔdubɔyila Israel kadi bekyuli udu ɔ́si lili útédu lɛgba, aani kalɛ baamɛnɛ kubo kɔɔƒɛkɛ ku livo alakpi ƒui teewi kalɔ limeyi linwi.

¹⁵Ɔma benengu ku batɔnkune ndi lili. Na ɔkɔ kenye bediene ndi lɛgba lɛmmɔ.

¹⁶Batɔnkune bamɛni baatɔnku-ma taatáyila, na bani batɔnku mmɔ lɛnɔ baayii ulu.

¹⁷Anwuɔsu na lɛlɔ lilayɔ Unwoti Katɔti na bana bakɔdi lɛlɔ munu munu, na bekpinebi ku bekpinele basɔ baládu-nwu kaƒɔ, ɔsika bana ƒui basɔ balábla Unwoti lɛyɔla, na baabla kalala na baanyi ɔkɔ. Nsu ina ɔmmɔ ƒui Unwoti kɔnyi kútayɔ tɔ, mmomu ɔ́mu únene kɔnu unye ka ɔƒiɛmi-ma.

¹⁸Geen ni, kalala bɔbla buse aani lɛku kemmo ogya. Ɔɔkyula liyu ku alakpi bamba, na lɛku limodi lɛmmɔ lɛɛkywí, na uudie uyɔ litigbli taakɔliku kayaa.

¹⁹Unwoti Ɔyikune Ƒui kɔnyi kpakplaa ɔsu ni, kalɔ kammɔ kadubɔkula lɛlɔ geen, na bekyuli bénwini ekyweni bete ogya ɔmmɔ, na ɔkpanadi kɔnyana bɔnu buuubo.

²⁰Benye kesi kesii beemú taadi, nsu belemo na kɔka kɔsa. Ama alati bebi na badubo bɔkun ɔƒɛni amu.

²¹Manase ɔdubo Eƒraim badi bɔkun, na Eƒraim ɔ́kun Manase badi aani beƒiebuo kalɛ. Na bana inyɔ benwini benye Yuda lɛlɔ. Nsu ina ɔmmɔ ƒui Unwoti kɔnyi kútayɔ tɔ, mmomu ɔ́mu únene kɔnu unye ka ɔƒiɛmi-ma.