Read Lelemi Lewiƒuɔ Ɔda Bubo 13 Bible Online

Lewiƒuɔ Ɔda Bubo 13 - Lelemi bible

Lewiƒuɔ Ɔda Bubo 13

¹Amu na Unwoti ɔ́su Mose ku Aaron ɔnini,

²“Si ala adi álɛ éwi ukyuli lɛlɔ iye nwuna ɔlɔna ɔɔtina aani kalɛ na ɔkpaala ɔɔsia lɛla lɛdi lɛlɔ iye eƒula adi na ɔɔtina aani ɔlɛgyie ni, ɔlɛka beti-nwu beboku Aaron ɔni ndi ɔkpane iye nwuna bebi bananabi ɔdi ɔni ndi ɔkpane kudɔ.

³Na ɔkpane ɔmmɔ ɔdubɔsia alɛbi ammɔ anu kaduɛ. Na si alɛbi ammɔ kemmo linwini lɛ́bla ƒututuu na use aani kalɛ na alɛbi aagyú ɔlɔna taabla ubu ni, na alɛbi ammɔ adi ɔlɛgyie. Na ɔlɛka ɔkpane ɔmmɔ ute bɔti ka ukyuli ɔmmɔ uuuse sɛɛn.

⁴“Nsu si alɛbi ani na ɔlɔna lɛlɔ use ƒututuu, nsu útebo útanu aani kalɛ na lɛna lɛɛgyú ɔlɛ kemmo na linwini lɛmmɔ lítabla ƒututuu ni, ɔkpane ɔmmɔ udie ɔlɛne ɔmmɔ lɛti utákya kesii kadi emeyi maatɛ.

⁵Na limeyi maatɛdi lɛmmɔ lɛlɔ ɔlɛka ɔkpane ɔmmɔ ɔsɔ ɔsia-nwu anu. Na si ɔ́nu-nwu na alɛbi ammɔ átavumana ni, ɔlɛka ɔsɔku-nwu usienku kesii kani nse sɛsɛɛ.

⁶Na limeyi maatɛdi lɛmmɔ lɛlɔ ɔlɛka ɔkpane ɔmmɔ ɔsɔ usie utásia-nwu anu. Na si ɔ́nu-nwu na alɛbi ammɔ aƒana na étegyingya na ɔlɔna ɔmmɔ lɛlɔ ni, na ɔlɛka ɔkpane ɔmmɔ ɔsu-nwu ka use sɛɛn na lɛla bamba lɛdi lɛɛɛda-nwu, na akpaabi kani na adi. Na ɔmmɔ kama na ukyuli ɔmmɔ ɔƒɔ nwuna adala na ɔbla sɛɛn.

⁷“Nsu si ɔmmɔ kama na alɛbi ammɔ ásɔ égyingya éwi nwuna ɔlɔna lɛlɔ uwi ɔni na ɔkpane ɔmmɔ ɔ́ɔnu-nwu kama na ɔ́bla-nwu sɛɛn ni, ɔlɛka ɔsɔ usie ɔkpane ɔmmɔ kudɔ na uti lɛlɔ utátina.

⁸Na si ɔkpane ɔmmɔ ɔ́sɔ ɔ́sia-nwu anu na únwini ka ɔlɛ ukpidi ɔni mɔɔví ɔdi na ɔdi ni, na ɔkpane ɔmmɔ ɔdubute bɔti ka uuuse sɛɛn.

⁹“Si ukyuli ɔdi uuuƒi ɔlɛgyie ɔni mɔɔví ni, ɔlɛka beti-nwu batátina ɔkpane.

¹⁰Na ɔkpane ɔmmɔ ɔnu ɔlɛ ɔmmɔ. Na si ɔkpaala ƒututuu ɔmmɔ ɔsu nwuna linwini lɛ́bla ƒututuu, nsu ɔlɔna ɔmmɔ ɔ́lɛ ɔlɛ ɔwɔdi ni,

¹¹na ɔlɛ ɔmmɔ ɔdi ɔlɛ ɔni muusié na uubo. Ɔmmɔ ɔsu ɔlɛka ɔkpane ɔmmɔ ɔsu-nwu ka uuuse sɛɛn. Na utalɛka ɔkpane ɔmmɔ uti-nwu utákya kesii kadi ute anu bɔsia bɔdi, ɔsika úunwini ukyuli ɔni na uuuse sɛɛn kukuuku.

¹²“Nsu si ɔlɔna ɔlɛ ɔmmɔ uwi-nwu ɔlɔna ƒui lɛlɔ na ɔkpane ɔ́nu ɔ́ti ka ɔlɛ ɔmmɔ uwi-nwu ɔ́si kuli lɛlɔ útédu lɛgba lɛlɔ ni,

¹³ɔlɛka ɔkpane ɔmmɔ ɔsia-nwu anumi kaduɛ na si ɔlɛ ɔmmɔ ɔ́ƒɔ-nwu ɔlɔna kesii biala ni, ɔlɛka ɔsu ka ukyuli ɔmmɔ use sɛɛn. Ɔsika ɔlɔna ɔmmɔ lɛlɔ ƒui lɛ́bla ƒututuu, ɔmmɔ ɔsu use sɛɛn.

¹⁴Nsu si ɔlɔna ɔmmɔ kesii kadi kábwɛ kálɛ ɔlɛ ɔwɔdi ni, na ukyuli ɔmmɔ ɔ́sɔ na uuuse sɛɛn.

¹⁵Si ɔkpane ɔ́nu nwuna ɔlɔna lɛlɔ ɔlɛ ɔwɔdi ɔmmɔ ni, ɔlɛka ɔsu-nwu ka ɔ́sɔ na uuuse sɛɛn. Ɔsika ɔlɛ ɔmmɔ ɔdi ɔlɛ ukpidi ɔni mɔɔví.

¹⁶Na si úbo úte ka ɔlɛ ɔwɔdi ɔmmɔ úbavumana ɔ́bla ƒututuu ni, ɔlɛka uti lɛlɔ utátina ɔkpane.

¹⁷Na ɔkpane ɔmmɔ ɔnu-nwu. Na si alɛbi ammɔ énwini ábla ƒututuu ni, ɔlɛka ɔkpane ɔsu ɔlɛne ɔmmɔ ka ɔ́bla sɛɛn. Na ɔsɔ ɔɔɔdi ukyuli ɔni na ɔ́sɔ lɛnɔ.

¹⁸“Si lɛla lɛdi líƒu ukyuli ɔdi na ɔlɛ ɔmmɔ ɔ́sa,

¹⁹na kesii kani na lɛla lɛmmɔ líƒu ukyuli ɔmmɔ kásɔ kéƒu kábla ƒututuu iye ɔ́bla ugyiedi ku ɔƒualadi ni, ɔlɛka uti lɛlɔ utátina ɔkpane.

²⁰Ɔkpane ɔmmɔ ɔlɛka ɔsia-nwu anu na si ɔlɛ ɔmmɔ ɔ́lɛ aani ɔlɛ bonwu nágyu-nwu ɔlɔna na linwini lɛni nákwɛ mmɔ lɛ́bla ƒututuu ni, ɔlɛka ɔkpane ɔmmɔ ɔsu-nwu ka ɔ́sɔ na uuuse sɛɛn. Ɔsika ɔlɛgyie ɔni mɔɔví na ɔdi nálɛ úwi-nwu kesii kani na liƒula lɛmmɔ lɛ́sia-nwu mmɔ.

²¹Nsu si ɔkpane ɔmmɔ ɔ́sia-nwu anu na linwini ƒututuu lɛdi lítakwɛ na kesii kani liƒula lɛmmɔ lɛ́sia-nwu mmɔ, na ɔlɛ ɔmmɔ lɛnɔ útagyu ɔlɔna ni, ɔlɛka ɔkpane ɔmmɔ uti ɔlɛne ɔmmɔ utákya kesii kadi sɛsɛɛ emeyi maatɛ.

²²Nsu si alɛbi ammɔ égyingya áƒɔ ɔlɔna ɔmmɔ lɛlɔ ni, ɔlɛka ɔkpane ɔmmɔ ɔsu-nwu ka ɔ́sɔ na uuuse sɛɛn. Ɔsika ɔlɛ ɔmmɔ ɔdi ɔlɛgyie ɔni mɔɔví.

²³Nsu si kesii kammɔ kátavumana na lɛni kani na ɔtaala ɔmmɔ use na ulégyingya ni, ɔkpane ɔmmɔ ɔdubute kati ka use sɛɛn. Ɔsika liƒula ɔtaala na ɔdi na ɔɔɔdi lɛla bamba lɛdi.

²⁴“Si ɔlɛ ɔdi ɔ́lɛ uwi ukyuli ɔdi lɛlɔ, na ɔ́bla aani kalɛ na ukyuli ɔlɔna ɔɔkywí iye nwuna lɛlɔ líbo lɛ́kya ugyiedi ku ɔƒualadi, na ɔƒualadi ɔɔtina ɔlɛ ɔwɔdi ɔmmɔ kemmo ni,

²⁵ɔlɛka ɔkpane ɔsia lɛla lɛmmɔ anumi. Na si nwuna ɔlɔna linwini lɛ́bla ɔƒualadi na ɔlɛ ɔwɔdi ɔmmɔ ɔ́gyu-nwu ɔlɔna kemmo ni, na ɔlɛgyie ɔni mɔɔví néwi-nwu. Na ɔkpane ɔmmɔ ɔlɛka ute bɔti ka ɔ́sɔ na uuuse sɛɛn.

²⁶Nsu si ɔkpane ɔmmɔ ɔ́sia-nwu anu na linwini lɛƒualadi liiibo ɔlɛ ɔmmɔ kemmo na ɔlɛ ɔmmɔ lɛnɔ útagyu-nwu ɔlɔna kemmo mmomu bɔsa na ɔɔsá ni, ɔlɛka ɔkpane ɔmmɔ uti ɔlɛne ɔmmɔ utákya kesii kani nse sɛsɛɛ emeyi maatɛ.

²⁷Na limeyi maatɛdi lɛmmɔ lɛlɔ ni, ɔlɛka ɔkpane ɔmmɔ ɔ́sɔ ɔsia-nwu anu. Na si ɔlɛ ɔmmɔ uugyingya taakya ɔlɔna ɔmmɔ lɛlɔ ni, ɔlɛka ɔkpane ɔmmɔ ute bɔti ka ɔ́sɔ na uuuse sɛɛn, ɔsika ɔlɛ ɔmmɔ ɔdi ɔlɛ ukpidi ɔni mɔɔví.

²⁸Nsu si kesii kani na ɔlɛ ɔmmɔ ɔ́lɛ úwi-nwu kátavumana, na útegyingya, mmomu bɔyii na ɔɔyii taakya ni, na liƒula lɛmmɔ kasiakɔ nákɔ kálɛ ɔ́bla ɔtaala ni, ɔkpane ɔmmɔ ɔdubute kati ka ukyuli ɔmmɔ útasɔ na use sɛɛn.

²⁹“Na si ɔnana iye uleku ɔdi na ɔlɛ ɔdi ɔ́bla-nwu kuli iye keduo lɛlɔ ni,

³⁰ɔlɛka ɔkpane ɔnu ɔlɛ ɔmmɔ. Na si ɔlɛ ɔmmɔ ɔ́gyu-nwu ɔlɔna na nwuna linwini lɛ́ƒuala lɛ́bla aani akɔkɔ lɛmwi ni, ɔlɛka ɔkpane ute bɔti ka ukyuli ɔmmɔ ɔ́sɔ na uuuse sɛɛn, ɔsika bɔƒɛni bɔmmɔ bɔɔtina ka ɔlɛgyie ɔni ɔɔví na ɔdi nwi-nwu kuli iye keduo mmɔ.

³¹Nsu si ɔkpane ɔmmɔ ɔ́sia ɔlɛ ɔmmɔ anu na útagyu-nwu ɔlɔna kemmo na linwini lɛtondi lɛnɔ liiibo ɔlɛ ɔmmɔ kemmo ni, na ɔlɛka ɔkpane ɔmmɔ uti ɔlɛne ɔmmɔ utákya kesii kani nse sɛsɛɛ emeyi maatɛ.

³²Na limeyi maatɛdi lɛmmɔ lɛlɔ ni, ɔlɛka ɔkpane ɔmmɔ ɔsɔ utánu ɔlɛne ɔmmɔ. Na si ɔlɛ ɔmmɔ uláƒɛni-nwu na útegyingya na linwini lɛmmɔ lítaƒuala lítabla aani akɔkɔ lɛmwi na ɔlɛ ɔmmɔ útagyu-nwu ɔlɔna kemmo lɛnɔ ni,

³³ɔlɛka bekpeyi mmɔ na bada ɔlɛ ɔmmɔ anumi bese na ɔkpane ɔmmɔ ɔsɔ uti-nwu utákya kesii kani sɛsɛɛ emeyi maatɛ bamba.

³⁴“Na limeyi maatɛdi lɛmmɔ lɛlɔ ni, ɔlɛka ɔkpane ɔmmɔ ɔ́sɔ utánu-nwu na si ɔlɛ ɔmmɔ útegyingya ɔlɔna lɛlɔ na útagyu-nwu ɔlɔna kemmo lɛnɔ ni, ɔlɛka ɔkpane ɔmmɔ ɔsu ka use sɛɛn. Na ɔlɛne ɔmmɔ ɔlɛka ɔƒɔ nwuna adala na ɔ́bla sɛɛn sɔsɔ.

³⁵Nsu si ɔlɛ ɔmmɔ útegyingya tɔ na nwuna ɔlɔna lɛlɔ na ɔsu-nwu ka ɔbla sɛɛn

³⁶na ɔmmɔ kama asa na ɔlɛ ɔmmɔ úbo uugyingya ni, ɔkpane ɔmmɔ ɔdubɔsia-nwu anu ɔnu si ɔlɛ ɔmmɔ úgyingya sɔsɔ. Na si use lɛni ni, ɔ́sɔ útalɛka ɔkpane ɔnu si nwuna linwini lɛ́ƒuala lɛ́bla aani akɔkɔ lɛmwi mmomu ɔɔtina ka ukyuli ɔmmɔ ɔ́sɔ na uuuse sɛɛn.

³⁷Nsu si ɔkpane ɔmmɔ ɔ́nu ka útavumana na linwini lɛtondi lɛɛkwɛ́ na ɔlɛ ɔmmɔ lɛnɔ ɔ́sa ni, ukyuli ɔmmɔ ɔ́bla sɛɛn. Na ɔlɛka ɔkpane ɔmmɔ ɔsu ka use sɛɛn.

³⁸“Si ɔnana iye uleku ɔdi ɔkya na ala aƒualadi adi alɛ éwi-nwu lɛlɔ ni,

³⁹ɔlɛka ɔkpane ɔsia ɔlɛ ɔmmɔ anu. Nsu si ɔlɛ ɔmmɔ uuuse ƒututuu ƒui, ni, na ɔlɛ ɔmmɔ ɔɔɔdi ɔlɛ ɔni muukpóku ukyuli nálɛ úwi ukyuli ɔmmɔ ɔsu útasɔ mmomu use sɛɛn.

⁴⁰“Si ketikɔ kápa ukyuli ɔdi ni, ukyuli ɔmmɔ útasɔ use sɛɛn, na lili kani nápa-nwu.

⁴¹Lɛni kani na si lɛtɛntɛ nápa ukyuli ni, anwu lɛnɔ use sɛɛn na lɛtɛntɛ kani nápa-nwu.

⁴²Nsu si alɛbi gyie gyie aatina na nwuna ketikɔ iye lɛtɛntɛ kapakɔ mmɔ ni, na ɔlɛgyie ɔni mɔɔví na ɔdi mɔɔlɛ́ teewi-nwu.

⁴³Na ɔlɛka ɔkpane ɔsia-nwu anumi kaduɛ ɔnu. Na si alɛbi ani nákɔ álɛ-nwu ketikɔ ku lɛtɛntɛ mmɔ adi ugyiedi ku ɔƒualadi ɔ́sala aani ɔlɛgyie ɔni mɔɔví ni,

⁴⁴na ukyuli ɔmmɔ uuƒi na ɔ́sɔ na ɔkpane ɔmmɔ ɔdubute kati ka ɔ́sɔ na uuuse sɛɛn na alɛbi ani nwi-nwu lili ɔsu.

⁴⁵“Na ukyuli ɔni na ɔlɛ ɔmmɔ udu ɔda ni, ɔlɛka ɔda adala ani nábwɛ na ulegyeli nwuna kuli linwini na uti lɛla lɛdi ubi nwuna anumi na utaava momoomo taasu ɔnini, ‘Lɛ́sɔ o-o, lɛ́sɔ na liiise sɛɛn!’

⁴⁶Na uwi ɔni kemmo ƒui na alɛbi ammɔ asia-nwu lɛlɔ mmɔ ni, na ukyuli ɔmmɔ ɔ́sɔ na uuuse sɛɛn. Na ɔlɛka bedie-nwu sɛsɛɛ.

⁴⁷“Si butili kuyi kɔ́ƒɔ adala adi kemmo ni, unwo lɛla o-o adi kpɛtɛ kpɛtɛ o-o

⁴⁸na ɔdi lɛla lɛni na bédi iye bátu ku udila iye bebuo ɔku iye nwuna lɛla lɛdi ni,

⁴⁹si butili kuyi kɔmmɔ kɔ́ya na adala iye bebuo ɔku iye kedi kammɔ iye lɛla lɛni na bátu ku udila iye bebuo ɔku lɛla biala lɛ́ta liigyie iye lɛ́bla aani evete awɔdi ni, ɔlɛka beti ala ammɔ batina ɔkpane.

⁵⁰Na ɔkpane ɔmmɔ ɔlɛka ɔsia ala ammɔ anu na udie ala ani kemmo na butili bɔmmɔ bɔ́ƒɔ mmɔ use kɔmadɔ sɛsɛɛ emeyi maatɛ.

⁵¹Na limeyi maatɛdi lɛmmɔ lɛlɔ ɔlɛka ɔsɔ udie lɛdiku lɛmmɔ iye lɛla lɛmmɔ na ugyingya-nwu ɔnu. Na si butili bɔmmɔ kɔ́bɛbɛ kúbu na ɔsu ka lɛdiku iye kɔdi iye lɛla lɛmmɔ lɛ́sɔ na liiise sɛɛn.

⁵²Anwuɔsu ɔlɛka bakyula lɛdala lɛmmɔ iye awu iye kɔdi iye ebuo ɔku ɔmmɔ, ɔsika butili kuyii kɔni muubile ala kɔ́ƒɔ lɛla lɛmmɔ kemmo na ɔlɛka bakya-nwu ogya.

⁵³“Nsu si ɔkpane ɔmmɔ ɔ́nu na butili bɔmmɔ bútegyingya bútakya awu iye kɔdi iye lɛla lɛmmɔ kemmo ni,

⁵⁴na ɔkpane adubɔsu-ma ka baƒɔ awu ɔni na butili bɔmmɔ búduo. Na ɔsɔ ɔda lɛla lɛmmɔ use emeyi maatɛ bamba.

⁵⁵Na si bɛ́ƒɔ lɛdiku iye awu iye lɛla lɛmmɔ kama ni, ɔlɛka ɔkpane ɔmmɔ ɔsɔ ɔnu lɛla lɛmmɔ na nwuna bɔƒɔ kama. Na si butili bɔmmɔ bɔ́sɔ bɔ́tina kesii kadi ni, na lɛla lɛmmɔ liisé lɛlɔ. Na ɔlɛka bakyula-ni.

⁵⁶Na si ɔkpane ɔmmɔ ɔ́nu ka butili bɔmmɔ bɔsɔ buuubo lɛla lɛmmɔ kemmo uwi ɔni báƒɔ-nwu mmɔ ni, na ɔlɛka ɔduli kesii kani butili bɔmmɔ búduo awu iye kɔdi iye lɛla lɛmmɔ kemmo udie.

⁵⁷Na ɔmmɔ kama si butili bɔmmɔ bɔ́sɔ búduo awu iye kɔdi iye lɛla lɛmmɔ kemmo ni, na ɔɔtina ka ɔlɛ na ɔdi. Anwuɔsu ɔlɛka bakyula lɛla limodi lɛmmɔ ƒui.

⁵⁸Na si báƒɔ awu iye kɔdi iye lɛla lɛmmɔ na butili bɔmmɔ bɔ́lɛ ni, ɔlɛka basɔ baƒɔ awu ɔmmɔ kunyɔdi na ɔmmɔ kama lɛla lɛmmɔ lɛdu bɔbla sɛɛn.”

⁵⁹Amɛni ndi ɔda bubo bute kedi ala aani awu iye kɔdi iye ala ani na bátu ku bebuo lɛku ala lɛlɔ kalɛ na ɔkpane ɔnu ɔsu si lɛla lɛmmɔ lise sɛɛn iye liiise sɛɛn.