Read Lelemi Lewiƒuɔ Ɔda Bubo 16 Bible Online

Lewiƒuɔ Ɔda Bubo 16 - Lelemi bible

Lewiƒuɔ Ɔda Bubo 16

¹Na Aaron bebi bananabi inyɔ bani nékpi na kakpakɔ mmɔ ka bátabla Unwoti lɛyɔla kukpi kama ni, Unwoti ɔ́tɛmi úte Mose.

²Ɔ́su-nwu ɔnini, “Ya na ƒ'ɔnwani Aaron ɔti anii utata kalɛ kalɛ uwi ɔni na ɔɔyɔ́ na ubalɛ-mi lɛlɔ na Katɔma Kedee kemmo kesii kani na likpidi kɔtu bɔni budie libila libi Bunyimi Adaka lɛlɔ na kakpakɔ bule kɔdi kɔmmɔ kama, si ɔɔɔdi lɛni ɔdubo bukpi, ɔsika ami Unwoti mɔɔdá taalɛ libila lɛmmɔ katɔ na liƒlukutu kemmo.

³“Ulu ɔni lɛlɔ na ɔdubɔsia uduo Unwoti Adi Kevo kammɔ kaduli ndi ɔmɛni, si úsela ni, ɔlɛka uti ɔmantɛ akɔ ɔgyani ɔkɔdi ku koƒonu kɔgyani na uti akɔ ɔmmɔ ɔbla likpidi lili buvele akpala, na uti koƒonu kɔgyani kɔmmɔ ɔbla akpala bɔkyula ƒui ɔdi.

⁴Ɔdi ka ɔkya nwuna awu kpɛtɛ kpɛtɛ gyɔlɔɔ ɔmmɔ ɔsia awuku kpɛtɛ kpɛtɛ ani na ɔdubɔkya use kalɔ na ama-nwu ɔlɔna lɛlɔ mmɔ lɛlɔ. Na ɔkya awu ɔtɔdi akɔnkɔ bune ɔmmɔ ɔsia-nwu lɛlɔ, na uti kavobi lɛduni kpɛtɛ kpɛtɛ lɛmmɔ ɔbala kavobi, na uti dukuu kabwa kpɛtɛ kpɛtɛ kammɔ ubi. Lɛwu lɛmɛni lɛdi lɛwu kedee, anwuɔsu ɔlɛka ɔkpi ntu asa na ɔkya-ni.

⁵Na ɔƒɔ betukpa inyɔ ku koƒonu kɔgyani kunwi ɔsiku Israelƒuɔ bammɔ kudɔ. Na uti betukpa inyɔ bammɔ ɔbla likpidi lili buvele akpala na uti ɔmantɛ akɔ ɔmmɔ ɔbla bɔkyula akpala.

⁶“Aaron ɔdubuti akɔ ɔmmɔ ɔbla nwuna likpidi lili buvele akpala na Unwoti udie likpidi kɔtu bɔni biala na anwu ku nwuna kaduli bekyuli lɛlɔ.

⁷Na uti betukpa inyɔ bammɔ uboku Unwoti na Kevo Kasakɔ kayakun.

⁸Na ɔdubɔtu egulabi ɔnu na betukpa bammɔ lɛlɔ na ɔnu lɛni ndi Unwoti ɔdi ku ɔni ndi bukeli ketukpa lɛdi.

⁹Na ketukpa kani na Unwoti ligulabi lɛ́tina ni, Aaron ɔdubɔdu-ka ɔbla likpidi lili buvele akpala.

¹⁰Na bukeli ketukpa kani na ligulabi linyɔdi lɛ́tina ni, badubuti-ka beboku Unwoti anumi ngba ngba na babla likpidi kɔtu bɔni budie ɔdi na bekyuli bammɔ ƒui lɛlɔ na babɔku-ka na ukeli usie ketele kalɔ kakwiidi kemmo aani bukeli ketukpa.

¹¹“Ɔmmɔ kama Aaron ɔdububoku ɔmantɛ akɔ ɔni nnye ute nwuna ekpidi na ɔdubuti ɔbla likpidi kɔtu bɔni budie akpala na anwu ku nwuna kaduli bekyuli lili. Na ɔdubɔdu ebuo ɔmmɔ ute anwu ɔlati ekpidi bɔkyiɛ akpala.

¹²Ɔmmɔ kama ɔdubuti oloƒui bɔkyula libui lɛni na ɔdubuyile ku agyabi bɔsiku Unwoti lɛkpabi lɛmmɔ lɛlɔ ku oloƒui ɔni bákɔ kaduɛ akɔkɔ anyɔ na uti uduoku kakpakɔ bule kɔdi kɔmmɔ kama.

¹³Na uti oloƒui ɔmmɔ uwi ogya ɔmmɔ lɛlɔ na Unwoti anumi mmɔ na uyɔ ɔmmɔ ɔdubɔƒɔ likpidi kɔtu bɔni budie libila lɛni na Bunyimi Adaka ɔmmɔ katɔ mmɔ ƒui suu na ɔbɛla libila lɛmmɔ kalɛ na ulekpi.

¹⁴Na ɔdubuti akɔ ɔni na ɔ́du mmɔ ubugya ɔdi na uti nwuna lɛnimi ɔkya ubugya ɔmmɔ kemmo na ɔkuna ubugya ɔmmɔ ɔdi uwi likpidi kɔtu bɔni budie libila lɛmmɔ anumi. Na ɔmmɔ kama ɔsɔ uti lɛnimi ɔkya ubugya ɔmmɔ kemmo na ɔkuna ubugya ɔmmɔ libila lɛmmɔ lɛtɔtɔ maatɛ.

¹⁵“Ɔmmɔ kama ni, ɔdubɔlɛ utádu likpidi lili buvele akpala ketukpa kammɔ na Israelƒuɔ lili, na uti ebuo ɔmmɔ ubugya uduoku kakpakɔ bule kɔdi kɔmmɔ kama na ɔblaku-nwu kalɛ kani na ɔ́blaku ebuo udeedi ubugya. Ɔdubɔkuna ubugya ɔmmɔ ɔdi uwi libila lɛmmɔ lɛlɔ ku nina anumi.

¹⁶Lɛni na ɔdubɔbla na udie likpidi kɔtu bɔni bɔni nkɛnku Katɔma Kedee kammɔ lɛlɔ ala bɔbla na Israelƒuɔ ala ani muusé lɛlɔ bɔbla ku kalɛ na bénwini kama bákya Unwoti ɔsu ina bi ekpidi na bábla. Lɛni kani na ɔdubɔbla ute Kasakɔ Kevo kani nkya-ma ntɛ na bana ɔbladu ɔni muusé lɛlɔ mmɔ ɔsu.

¹⁷Uwi ɔni na Aaron úduo Katɔma Kedee kammɔ kemmo utábla likpidi kɔtu bɔni budie ɔdi ɔmmɔ ni, utalɛka ukyuli ɔdi ɔkya Kasakɔ Kevo kammɔ kemmo útédu ka ɔ́wɔlɔ ɔdi ɔmmɔ bɔbla na anwu ɔlati ku nwuna kaduli bekyuli ku Israel kadi bekyuli ƒui lili na ɔ́vi ɔ́lɛ mmɔ.

¹⁸“Ɔmmɔ kama ɔdubɔlɛ ubo Unwoti lɛkpabi lɛmmɔ kudɔ na uti akɔ ɔmmɔ ubugya ku ketukpa kammɔ ubugya ɔdi ususu bebuo ese ani nlɛ lɛkpabi lɛmmɔ lɛlɔ ƒui na ɔbla-ni ɔdi ɔmmɔ kalɛ kani na ɔ́bla Kevo kammɔ.

¹⁹Na uti nwuna lɛnimi ɔkya ubugya ɔmmɔ kemmo na ɔkuna-nwu uwi lɛkpabi lɛmmɔ lɛlɔ maatɛ na ɔbla-ni sɛsɛɛ ɔsiku Israelƒuɔ ala ani muusé lɛlɔ bɔbla kudɔ.

²⁰“Si Aaron ɔ́wɔlɔ sɛɛn bɔbla akpala ɔdi ɔmmɔ bɔbla bute Katɔma Kedee kammɔ ku Kevo Kasakɔ kammɔ ku lɛkpabi lɛmmɔ ni, mmɔ na ɔdubuti ketukpa kani ku ngba mmɔ uboku.

²¹Na ɔdubuti nwuna enu anyɔ ɔsia ese ɔmmɔ kuli na ɔka Israelƒuɔ ekpidi lidu lidu udie ɔsu na bana ulikplu ala bɔbla ku kalɛ na baalɛ́ bana Unwoti kama ku bana ekpidi lidu bamba lɛni ƒui na baabla. Na ekpidi ammɔ ƒui adubɔsia ese ɔmmɔ kuli. Na ɔkɛnku ukyuli ɔni na báalɛ lɛnimi bése lɛlɔ ni, na ɔbɔku ese ɔmmɔ utákya alakpi akɔ na ketele kalɔ kakwiidi kemmo.

²²Na ese ɔmmɔ ndubuti Israelƒuɔ bammɔ ekpidi ƒui utákya ketele kemmo kesii kani na ukyuli ɔmmɔ úsela utányonu-nwu ɔkya na ukyuli ɔdi uuubo mmɔ.

²³“Ɔmmɔ kama na Aaron uduo Kevo Kasakɔ mmɔ na udie nwuna lɛwu gyɔlɔɔ lɛni na ɔ́kya úduoku Katɔma Kedee kemmo mmɔ use mmɔ.

²⁴Na ɔdubusie kesii kani na kese sɛsɛɛ na utákpi ntu na uti nwuna lɛkpa adala geen ɔkya na ɔlɛ ubo ubabla akpala bɔkyula ƒui ute ɛlɔ ku Israel kadi bekyuli ƒui na Unwoti udie likpidi kɔtu bɔni biala na bana lɛlɔ.

²⁵Na ɔkyula lɛmwi lɛmmɔ ƒui lɛnɔ na lɛkpabi lɛmmɔ lɛlɔ aani likpidi lili buvele akpala.

²⁶“Na ɔnana ɔni ndubutiku bukeli ketukpa kammɔ utákya alakpi akɔ na ketele kalɔ kakwiidi kemmo mmɔ lɛnɔ ɔlɛka ɔƒɔ nwuna adala ƒui na ɔkpi ntu asa na ɔsɔ unwini utéduo bana keliekɔ mmɔ.

²⁷Na ɔmantɛ akɔ ku ese ɔni ndi likpidi lili buvele akpala bebuo bani ubugya na béti béduoku Katɔma Kedee kemmo mmɔ, na bátábla likpidi kɔtu bɔni budie akpala mmɔ ni, ɔlɛka balɛku-ma bana keliekɔ mmɔ batákyula ƒui na bana kakyakɔ kama ku bana lɛku ku lɛna lɛmmɔ ku ala ani na béwilimi-ma nƒɔ kemmo ƒui.

²⁸Na ukyuli ɔni makyula bebuo bammɔ ɔdubɔƒɔ nwuna lɛwu na ɔkpi ntu asa na unwini usie bana keliekɔ.

²⁹“Na bunyimi bɔni lɛlɔ na bɛdubo butaadi ɔ́si ɔƒɛni úsela uwi ƒui ndi ka kɔbuli maatɛdi limeyi leevudi biala lɛlɔ ni, ɔlɛka bikisi lɛlɔ na bilie kɔka na bilabla kabla kadi amii ku kadi bamba bekyuli bani nkya-mii akɔ na limeyi lɛmmɔ lɛlɔ.

³⁰Ɔsika limeyi lɛmmɔ lɛlɔ na badubo likpidi kɔtu bɔni budie ɔdi bɔbla na bina lɛlɔ na bɛbla sɛɛn bɛsiku bina ekpidi ƒui kudɔ.

³¹Na limeyi lɛmmɔ lɛdi lɛnwunameyi lite-mii na ɔdi ka bikisi lɛlɔ na bilie kɔka. Na ɔmɛni ɔdi bunyimi bɔni ndubunye bute uwi ƒui.

³²Ɔkpane ɔni báƒuna na béwi-nwu lili nnɔmii bése-nwu likpo ka unye ɔti kabla kenye aani ɔkpane unengudi kalɛ ndubo likpidi kɔtu bɔni budie ɔdi ɔmɛni bɔbla na ɔlɛka ɔkya ɔkpane lɛwu gyɔlɔɔ kedee lɛmmɔ

³³asa na ɔbla ɔdi ɔmmɔ ɔkɛnku Katɔma Kedee kammɔ ku Kasakɔ Kevo kammɔ ku lɛkpabi lɛmmɔ lɛlɔ ablala kalɛ na lɛla biala lise sɛɛn ku bakpane bammɔ ku Israel kadi bekyuli ƒui.

³⁴“Na bunyimi bɔmɛni bɔdubuse bute-mii uwi ƒui. Na ɔlɛka babla likpidi kɔtu bɔni budie akpala ɔdi ɔmɛni kunwi na lɛkwa kemmo ute Israelƒuɔ ƒui ekpidi lili.” Na bábla básia kalɛ kani na Unwoti úbo Mose ɔda.