Read Lelemi Lewiƒuɔ Ɔda Bubo 17 Bible Online

Lewiƒuɔ Ɔda Bubo 17 - Lelemi bible

Lewiƒuɔ Ɔda Bubo 17

¹Amu na Unwoti ɔ́su Mose ɔnini

²“Tasu Aaron ku nwuna bebi bananabi ku Israelƒuɔ bananabi ƒui anini, ‘Lɛni na Unwoti uubó-mii ɔda ka

³ɔnana biala na ɔ́si Israel kaba kemmo ɔni madu ɔmantɛ akɔ iye koƒonu ubi iye ese ɔdi na kaduli kemmo iye bina kakyakɔ kama

⁴na úteboku-nwu Unwoti anumi na Kasakɔ Kevo mmɔ ni, ukyuli ɔmmɔ úwi ubugya kalɔ. Na ɔkɛnku ɔmmɔ ɔsu ɔlɛka bedie-nwu lɛti basiku mina bekyuli akɔ.

⁵Na lɛla lɛni na ɔmɛni ɔdanku ndi ka akpala ani na Israelƒuɔ bátaabla na kesi kesii ni, beti-nya beboku ɔkpane na Unwoti anumi ɔƒɛni amu na Kevo Kasakɔ kayakun kenye na beti babla unwi bɔbla akpala.

⁶Na ɔkpane ɔmmɔ ɔkuna ubugya ɔmmɔ uwi Unwoti lɛkpabi lɛni nlɛ Kevo Kasakɔ kayakun kenye mmɔ lɛlɔ na ɔkyula lɛmwi lɛmmɔ na uyɔ ɔmmɔ ɔnyi ƒɛƒɛɛ ɔyɔ-mi kaƒɔ.

⁷Na básɔ batabla akpala adi betete bese udu baƒiɔ bani na bakɛ basiaku aani kalɛ na bayalɛ baabla. Na ɔda bubo bɔmɛni buse bute amii ku bina kaba ɔ́si ɔƒɛni úsela uwi ƒui.’

⁸“Na bɛsu Israelƒuɔ ku kadi bamba bekyuli bani nli-mii akɔ ka si ɔdi ɔ́sɔ ɔ́bla akpala bɔkyula adi iye úti etela adi úsienku kesii bamba kadi

⁹na úteti akpala ammɔ úteboku Kevo Kasakɔ kayakun kenye mɛni na mina anumi ni, badubɔda ukyuli ɔmmɔ bedie mina bekyuli akɔ.

¹⁰“ ‘Ɔƒɛni lɛnɔ ukyuli biala na ɔ́si Israel kaba kemmo iye ɔƒɔ ɔni nli-mii akɔ na ɔdi ɔ́di ubugya ni, ndubuti mina lɛnimi lɛlɛ ukyuli ɔmmɔ lɛlɔ na lɛda-nwu lidie mina bekyuli akɔ.

¹¹Ɔsika lɛla lidiedi biala ngba ndi nwuna ubugya, na líti ubugya ɔmmɔ líte-mii ka biti bidie likpidi kɔtu bɔni biala na bina ekpidi lili. Na ubugya ndi lɛla lɛni muudie likpidi kayu na ukyuli lɛlɔ.

¹²Anwuɔsu na lɛ́su Israelƒuɔ ku baƒɔ bani nkya-mii akɔ ka ɔdi biala utadi ubugya.

¹³“ ‘Anwuɔsu si Israelni ɔdi iye ɔƒɔ ɔni ɔkya-mii akɔ ɔdi úsie kabuikɔ na útádu ebuo iye aasɛ ɔdi ka bakun-nwu ni, ukulo-nwu ɔkwɛ na ubugya ɔmmɔ uwi kalɔ na uku lɛti ubi ubugya ɔmmɔ lɛlɔ,

¹⁴ɔsika lɛla lidiedi biala ngba ndi nwuna ubugya. Ɔmɛni ɔsu na lɛ́su Israelƒuɔ nnini, “Bina akɔ ɔdi utadi lɛla lidiedi biala ubugya, ɔsika lɛla lidiedi biala ngba ndi nwuna ubugya. Na ukyuli biala madi ubugya ɔmmɔ ni, ɔlɛka bidie-nwu bina akɔ.”

¹⁵“ ‘Na si ukyuli ɔdi ɔ́kun ebuo ukpine lɛna iye ɔ́kun lɛna lɛni na eƒiebuo bamba náduli-nwu kɔkɛ kɔkɛ ɔ́va na ɔdi Israelni iye ɔƒɔ ni, ɔlɛka ɔƒɔ nwuna adala na ɔkpi ntu na ulie utédu useyi uwi asa na nwuna lɛlɔ lɛdubɔbla sɛɛn.

¹⁶Nsu si úni na útaƒɔ nwuna adala na útakpi ntu ni, anwu ɔlati nwuna etila na adi.’ ”