Read Lelemi Lewiƒuɔ Ɔda Bubo 23 Bible Online

Lewiƒuɔ Ɔda Bubo 23 - Lelemi bible

Lewiƒuɔ Ɔda Bubo 23

¹Amu na Unwoti ɔ́sɔ ɔsu Mose ɔnini,

²“Kɔ lɛsa na asu Israelƒuɔ anini, ‘Unwoti emeyi ani na údie úse ka Israelƒuɔ badubo butaasa ndi amɛni.

³“ ‘Emeyi aku na bɛdubuti bɛbla bina kabla, nsu limeyi maatɛdi ni, lɛdi bɔsa kedee limeyi lite-mii. Na ɔdi utalɛka ɔbla kabla kadi na kesi kesii na bilie, ɔsika ɔdi Lɛnwunameyi ute Unwoti.

⁴“ ‘Emeyi amɛni na Unwoti údie úse ka bitaadi úte bɔsa kedee na ɔlɛka akɔ-nya lɛsa ete-ma si uwi ɔmmɔ údu.

⁵Kɔbuli kudeedi kɔni ndi Abib limeyi leevu-linedi lɛlɔ useyi uwi si ɔƒɛ úsela kanukɔ ni, na bise kalɔ bitaadi Unwoti Kukpi Lili Bɔvia Limeyi.

⁶Na kadi kegye kɔbuli kɔmmɔ kani limeyi leevu-lɛlɔndi lɛlɔ ni, Bodobodo Ɔni Néteƒu Limeyi bɔdi buusé kalɔ na bɛdubɔdi bodobodo ɔmmɔ emeyi maatɛ.

⁷Na limeyi lideedi lɛni na emeyi bɔdi bɔmɛni búse kalɔ ni, bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi.

⁸Nsu na emeyi maatɛ ammɔ ƒui kemmo ni, na bitaabla akpala bɔkyula teete Unwoti. Na limeyi maatɛdi lɛlɔ ni, bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi.’ ”

⁹Amu na Unwoti ɔ́su Mose ɔnini,

¹⁰“Kɔ lɛsa na asu Israelƒuɔ anini, ‘Si bísie bítéduo kalɔ kani na líti muute-mii kemmo na bɛ́ƒɛ bina edula edeedi ni, na biti-nya bisienku ɔkpane.

¹¹Na ɔkpane ɔmmɔ ɔdubɔkɔliku-nya katɔ ɔtina Unwoti na ubo-nya kudu na badubɔƒɔ-nya bete-mii. Na ɔkpane ɔmmɔ ɔdubɔbla akpala ammɔ lɛnwunameyi kadi kegye.

¹²Ɔƒɛni na limeyi lɛni na ɔkpane ɔmmɔ ɔɔbla akpala ammɔ ni, na biti koƒonu kɔgyani kɔni na bɔsɔ bɔdi buuubo-ku lɛlɔ na ɔ́ɔkɛ lɛkwa na uti ɔbla akpala bɔkyula ute Unwoti.

¹³Na biti edula ebi lɛkyami linwi lɛni béti bákɔ ɔlaaƒɔ na uukeye na biti nnɔ bɛsala-nwu kemmo na biti bɛbla akpala bɔkyula ammɔ bite Unwoti úbunku ntɛ akpala ɔsii unwi. Na akpala ammɔ ɔnyi ƒɛƒɛɛ ɔdubɔyɔ Unwoti kaƒɔ.

¹⁴Ɔdi utadi bodobodo biala iye edula ebi ani na béƒi iye awɔdi úti útédu limeyi lɛni bíti akpala ammɔ bíbabla akpala bíte bina Katɔti. Na ɔda bubo bɔmɛni buse bute amii ku bina bawɔ ƒui na kesi kesii na bɛdubulie.

¹⁵“ ‘Bɛka kwasida maatɛ ɔ́si lɛnwunameyi lɛni lɛlɔ na bíti bina edula ebi aboyo bíbakɔliku katɔ bɛ́tina Unwoti bíbo-nya kudu mmɔ.

¹⁶Na bɛka emeyi liti útédu lɛnwunameyi maatɛdi kadi kegye na biti edula ebi awɔdi ammɔ bɛbla akpala bite Unwoti.

¹⁷Na kesi kesii na bilie ni, kaduli biala basiku bodobodo inyɔ inyɔ ɔni na béƒi ku ɔlaaƒɔ ɔni muukeye na bɔnyii bɔkya-nwu kemmo biboku bibakɔliku katɔ bɛtina Unwoti bibo kudu aani edula ebi edeedi akpala.

¹⁸Na biti baƒonu bebi maatɛ bani na ɔdi biala ɔ́ƒɔ lɛkwa linwi na bɔsɔ bɔdi buuubo-ma lɛlɔ ku ɔmantɛ akɔ unwi ku baƒonu bagyani inyɔ bibunku bodobodo ɔmmɔ. Ala amɛni na bɛdubuti bɛkyula ƒui úbunku edula ebi ku nwuna lɛlɔ ntɛ aani akpala bɔkyula na ana uyɔ ɔnyi ƒɛƒɛɛ ɔyɔ Unwoti kaƒɔ.

¹⁹Bɛdu ketukpa bɛbla likpidi lili buvele akpala na bɛdu baƒonu inyɔ bani na báaƒɔ lɛkwa linwi linwi biti bɛbla unwi bɔbla akpala.

²⁰“ ‘Na ɔkpane ɔmmɔ ɔdubuti baƒonu inyɔ bammɔ ɔkɔliku katɔ ɔtina Unwoti ubo kudu ku edula ebi edeedi bodobodo ɔmmɔ. Na adi Unwoti akpala kedee ani ndi ɔkpane ɔmmɔ adi.

²¹“ ‘Na limeyi lɛmmɔ kani lɛlɔ ni, kɔ lɛsa na bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi. Ɔda bubo bɔmɛni buse bute amii ku bina bawɔ na kesi kesii na bɛdubulie.

²²“ ‘Na si bɛɛƒɛ bina edula ni, bitaƒɛ ana ƒui mmomu bibu adi bɛkya bina mmo amadɔ iye bibu adi bise bina kakpa kemmo bite bawabane ku baƒɔ bani nnkya-mii akɔ. Ami ndi bina Unwoti Katɔti.’ ”

²³Amu na Unwoti ɔ́su Mose ɔnini,

²⁴“Kɔ lɛsa na asu Israelƒuɔ anini, ‘Na limeyi lideedi na kɔbuli maatɛdi kemmo ni, biti limeyi lɛmmɔ bɛbla bina bɔnwuna limeyi na bɛsa bɔsa kedee na mina lɛnyi lɛlɔ si uwi ɔni na bínu ka kɔkpɛɛ kɔɔku.

²⁵Na ɔdi utabla kabla kadi. Mmomu bɛbla akpala bɔkyula bite bina Unwoti.’ ”

²⁶Amu na Unwoti ɔ́su Mose ɔnini,

²⁷“Su Israelƒuɔ ka kɔbuli maatɛdi limeyi leevudi lɛlɔ ni, ɔdi Likpidi Kɔtu Bɔni Budie Limeyi. Bikisi lɛlɔ bɛsa bɔsa kedee na mina lɛnyi lɛlɔ na bɛkyula akpala.

²⁸Na ɔdi biala utabla kabla kadi, ɔsika limeyi lɛmmɔ lɛdi Likpidi Kɔtu Bɔni Budie Limeyi lɛni na báƒɔ bina lili likpidi kayu biala na bina Unwoti Katɔti anumi.

²⁹Na ukyuli biala ɔni meni lɛlɔ bukisi na limeyi lɛmmɔ ni, ɔlɛka bekulo kɔna kɔni nkya anwu ku Unwoti bekyuli ntɛ.

³⁰Na ami ndubo ukyuli ɔni mabla kabla kadi na limeyi lɛmmɔ lɛlɔ udu bɔyila nwuna bekyuli akɔ.

³¹Lɛla lɛmmɔ kani ndi ka ukyuli ɔdi utabla kabla kadi munu munu. Na ɔda bubo bɔmɛni ndubo bɔtɛ buteesie uwi ƒui ku bina bawɔ bawɔ na kesi kesii bɛdubo bulie.

³²Na limeyi lɛmmɔ lɛdi lɛnwunameyi lite-mii, anwuɔsu na ɔlɛka bikisi lɛlɔ. Na úti ɔ́si kɔbuli kɔmmɔ limeyi yaalenwidi useyi uwi úti útédu kadi kegye useyi uwi na ɔlɛka bɛdi Lɛnwunameyi lɛmmɔ.”

³³Amu na Unwoti ɔ́su Mose ɔnini,

³⁴“Kɔ lɛsa na asu Israelƒuɔ anini, ‘Na kɔbuli maatɛdi limeyi leevu-lɛlɔndi lɛlɔ ni, Kevo Kemmo Bulie Emeyi bɔdi buusé kalɔ, na ɔdi emeyi maatɛ limeyi bɔdi.

³⁵Limeyi lideedi ni, bɛsa bɔsa kedee na mina lɛnyi lɛlɔ na ɔdi utabla limeyi ndi limeyi kabla kadi.

³⁶Na emeyi maatɛ ammɔ kemmo ni, bitaabla ogya akpala bɔkyula. Na limeyi maanedi lɛlɔ bina ƒui bɛsa bɔsa kedee na mina lɛnyi lɛlɔ na bɛbla ogya akpala bɔkyula bite Unwoti. Ka limeyi lɛmmɔ na bɛɛdi-ni bɛwɔlɔ ɔsu ni, ukyuli ɔdi utabla kabla kadi.

³⁷“ ‘Emeyi amɛni ndi Unwoti emeyi bɔdi ani na ɔ́lɛ ugyii úse na ɔlɛka akɔ-nya lɛsa ka adi emeyi kedee ani na ɔlɛka beboku akpala ani ƒui na badubɔkyula bete Unwoti ku ntɛ akpala ani bálɛ ugyii bése úte mina emeyi bɔdi.

³⁸Na emeyi bɔdi bɔmmɔ kemmo biti bina lɛnwuna emeyi bɔdi ku bina etela akpala ku bina kenye kani bise Unwoti ku bina kayi ƒaa etela bɛda bibunku.

³⁹“ ‘Anwuɔsu ɔsi limeyi leevu-lɛlɔndi na kɔbuli maatɛdi lɛlɔ uwi ɔni bɛ́ƒɛ bina edula bɛ́wɔlɔ ni, na bɛdi limeyi lɛmmɔ emeyi maatɛ bite Unwoti. Na biti limeyi lideedi ku limeyi maanedi bɛbla lɛnwuna emeyi.

⁴⁰Na limeyi lideedi lɛlɔ ni, na bɛƒɛ like ku kugyii kɔgba kɔni mbo evete na bɛdi limeyi lɛmmɔ ku lɛlɔyɔ na Unwoti Katɔti anumi emeyi maatɛ.

⁴¹Na bitaadi Edula Bɔƒɛ Limeyi lɛmɛni lɛkwa biala na biteeti emeyi maatɛ taadi-ni. Na bitaadi-ni kɔbuli maatɛdi lɛlɔ. Na ɔda bubo bɔmɛni buse bute amii ku bina bawɔ.

⁴²Na uwi ɔmmɔ kemmo Israelni biala ɔlɛka ulie kevo kemmo.

⁴³Babla lɛni kalɛ na bina bawɔ banu bati ka uwi ɔni na Israelƒuɔ bákya Egyipte kalɔ lɛlɔ ni, ami Unwoti lɛ́ya na bílie nvo kemmo. Ami Ndi Bina Unwoti Katɔti.’ ”

⁴⁴Anwuɔsu Mose ɔ́kɔ lɛsa úte Israelƒuɔ na ɔ́su-ma uwi ɔni na beti bataadi Unwoti Emeyi.