Read Lelemi Lewiƒuɔ Ɔda Bubo 5 Bible Online

Lewiƒuɔ Ɔda Bubo 5 - Lelemi bible

Lewiƒuɔ Ɔda Bubo 5

¹“ ‘Si báda ukyuli ɔdi kenye na kadi akɔ na awɔ ɔdi agyi lɛla lɛdi iye énu-ni lɛlɔ lɛla lɛdi na ébulo na étedie kenye ni, ƒula etila na adi na ebo lɛtuni na ɔmmɔ ɔsu.

²“ ‘Na si ɔdi útuku lɛla lɛni muusé lɛlɔ aani ebuo ukpine iye ebuo ɔni na muusé lɛlɔ iye bebweyi bani mɔɔví kalɔ, ina útati ni, ukyuli ɔmmɔ únwini ukyuli ɔni muusé lɛlɔ na ɔ́ƒiɔ.

³“ ‘Na si ukyuli lɛlɔ lɛla lɛdi na útuku na liisé lɛlɔ ni, ina útati na úbati kama ni, ukyuli ɔmmɔ lɛnɔ únwini lɛla lɛni muusé lɛlɔ na ɔ́ƒiɔ.

⁴“ ‘Na si ɔdi útewi lɛlɔ útabla kasusu na ɔ́kpali-mi lɛnyi úse kenye kalɛ kalɛ ka ɔdubɔbla lɛla lɛdi, lɛdia o-o lɛɛɛdia o-o, na údie lɛlɔ atu na útabla útasia na úbati kama kama ni, ɔ́ƒiɔ.

⁵“ ‘Na si ɔdi ɔ́nu ka ɔ́bla likpidi ɔ́ƒiɔ na ala ani ƒui na lɛ́ka lɛ́vi mɛni ɔdi lɛlɔ ni, ɔlɛka udie lɛla lɛni na ɔbla kalɔ ɔsu nwaa na kadi anumi.

⁶Ɔmmɔ kama na uti nwuna likpidi kɔtu bɔni budie akpala uboku Unwoti anumi na likpidi lɛni na ɔ́bla ɔsu. Ɔlɛka uboku koƒonu iye ese uledi ɔsiku nwuna bebuo akɔ ute akpala ammɔ. Na ulu ɔmɛni lɛlɔ na ɔkpane ɔdubɔsia na ɔbla akpala na udie kɔtu bɔni na ukyuli ɔmmɔ lɛlɔ.

⁷“ ‘Nsu si nwuna ɔyikun útedu koƒonu ni, na uti babloduma inyɔ iye bamangbɛ inyɔ uboku Unwoti anumi aani nwuna likpidi kɔtu bɔni budie akpala na nwuna ekpidi lili. Na badubuti unwi babla likpidi kɔtu bɔni budie akpala, na beti unyɔdi babla ogya akpala bɔkyula ƒui ɔdi.

⁸Ɔdubuti ala amɛni uboku ɔkpane. Na ɔni na badubuti babla likpidi kɔtu bɔni budie akpala ni, ɔdubulii-nwu limɔ ɔƒɛ, nsu utekulo-nwu utedie ƒui.

⁹Na ɔdubɔkuna nwuna ubugya ɔmmɔ uwi lɛkpabi lɛmmɔ kɔmadɔ. Na ɔya na ubugya ɔkladi ɔkpala uwi lɛkpabi lɛmmɔ kalɔ. Na ndubɔƒɔ lite-nwu aani likpidi kɔtu bɔni budie akpala.

¹⁰Na unyɔdi ni, ɔdubuti-nwu ɔbla akpala bɔkyula ƒui ɔdi aani kalɛ na líbo-mii ɔda ute ukyuli ɔmmɔ ekpidi ani ƒui na ɔ́bla bɔkyiɛ na liti-nya lɛkyiɛ-nwu.

¹¹“ ‘Nsu si uuubo babloduma inyɔ iye bamangbɛ inyɔ ni, na uti ɔlaaƒɔ ɔni muukeye lɛɛƒɛɛ inyɔ ubabla likpidi kɔtu bɔni budie akpala ammɔ. Na uteti nnɔ iye oloƒui utasia, ɔsika likpidi bɔkyiɛ etela na adi.

¹²Ɔdubuti ala ammɔ uboku ɔkpane, na ɔkpane ɔmmɔ ɔma ɔlaaƒɔ ɔmmɔ lɛkɔkɔ linwi buyi aani enyimo adila na uti ɔkyula ubunku akpala bɔkyula ƒui adi na lɛkpabi lɛlɔ na ɔdi likpidi lili buvele akpala.

¹³Ulu ɔmmɔ lɛlɔ na ɔkpane ɔdubɔsia na ɔbla akpala na udie kɔtu bɔni na ukyuli ɔmmɔ lɛlɔ. Na ɔlaaƒɔ ɔkladi ɔni mebu ɔdubunwini ɔkpane ɔmmɔ kadikɔ aani kalɛ na baabla edula akpala.’ ”

¹⁴Ɔmmɔ kama ni, Unwoti ɔ́su Mose ɔnini,

¹⁵“Si ɔƒɛni kalɛ ukyuli ɔdi útadi nwuna litemi lɛlɔ ɔkɛnku ala ani na lɛ́lɛ ugyii líse ka ute-mi ka ese-mi sɛsɛɛ kedee ɔsu ni, ɔ́bla likpidi si ina útati na úbati kama. Ɔmmɔ ɔsu ɔlɛka uti kɔtɔ bukpi akpala uboku Unwoti ani ndi koƒonu kɔgyani kɔni nse sɛɛn na kútasɔ kesii kadi ɔsiku nwuna baƒonu akɔ. Na ɔlɛka kuna kuye kudu sika ɔƒualadi ɔni na ɔkpane ɔmmɔ ɔ́su kenye. Ɔmmɔ na ɔdubuti ɔbla kɔtɔ bukpi akpala ammɔ.

¹⁶Na ala kedee ani na úni na úteti úteboku-mi mmɔ ni, ɔlɛka uti-nya uboku na ɔƒɔ ala ammɔ kayu lɛkpa lɛlɔndi ɔsia-nya lɛ́lɔ ute ɔkpane ɔmmɔ. Na ɔkpane ɔmmɔ uti koƒonu ɔbla akpala na lidie kɔtu bɔni na ukyuli ɔmmɔ lɛlɔ na liti lɛkyiɛ-nwu.

¹⁷“Ɔƒɛni si ukyuli ɔdi ɔ́bla likpidi ɔ́ƒiɔ ala ani lɛlɔ ɔda na líbo-mii mɛni ɔdi ina útati asa na ɔ́bla-nya ni, ina amu ɔ́bla likpidi, na kɔtu bɔni bɔmmɔ bɔma-nwu lɛlɔ.

¹⁸Ɔmmɔ ɔsu ɔlɛka uti koƒonu kɔni nse sɛɛn na kútasɔ uboku ɔkpane. Na kuna kuye kulieku kalɛ na baakya kuye teete kɔtɔ bukpi ebuo ɔmmɔ udu. Na ɔkpane ɔmmɔ ɔbla likpidi kɔtu bɔni budie akpala na nwuna ekpidi ani na ɔ́bla lili na útati na liti lɛkyiɛ-nwu.

¹⁹Ndubɔƒɔ lite-nwu aani kɔtɔ búkpi akpala, ɔsika ɔ́bla likpidi na Unwoti anumi.”