Read Lelemi Lewiƒuɔ Ɔda Bubo 6 Bible Online

Lewiƒuɔ Ɔda Bubo 6 - Lelemi bible

Lewiƒuɔ Ɔda Bubo 6

¹Amu na Unwoti ɔ́su Mose ɔnini,

²“Si ɔƒɛni kalɛ ukyuli ɔdi ɔ́ƒiɔ Unwoti ka útadi nwuna litemi lɛlɔ útete nwuna liku ukyuli ɔdi na lɛla lɛdi lɛlɔ ni, ɔ́bla likpidi. Ɔkana na ɔbla ka lɛla lɛdi na úbese-nwu kudɔ, na ɔ́da-ni uti ukyuli ɔmmɔ kama, iye úyu-nwu, iye ɔ́nya-nwu ɔ́kya, na ɔ́kɛ-nwu lɛlɔ kɔsia,

³iye ɔ́kɛ ukyuli ɔdi lɛla lɛdi, nsu útaƒɔ enu ka béye-nwu, mmomu ɔ́nyi ɔkɔ ɔ́kpali ala ka útanu lɛla lɛmmɔ. Ukyuli ɔni nábla ala amɛni ɔdi ɔ́bla likpidi.

⁴“Na si ɔ́nu nwuna likpidi ɔ́ti na ɔ́nu ka úkpi kɔtɔ ni, ɔlɛka ɔsia ulu biala lɛlɔ na ɔsɔku lɛla lɛmmɔ ubese kenye ute ɔlati. Buyu na úyu-nwu o-o bɔnya na ɔ́nya-nwu ɔ́kya úƒie-nwu lɛla lɛdi ɔƒɔ o-o, nwuna lɛla nse-nwu kudɔ na ɔ́da-ni úti o-o,

⁵bɔkɛ na ɔ́kɛ lɛla lɛdi na útebo-ni kudu mmomu ɔ́kpali ala ka útanu-ni o-o ni, ɔlɛka ɔsɔku lɛla lɛmmɔ ubese kenye ute ɔlati kalɛ kani na líse. Ɔmmɔ kama na ɔƒɔ lɛla lɛmmɔ kayu lɛkpa lɛlɔndi na nina kuye bɔƒɔ kenye ɔsia lɛla lɛmmɔ kuye lɛlɔ ute ɔlati na limeyi lɛni lɛlɔ na ɔ́nu nwuna bɔƒiɔ ɔ́ti mmɔ.

⁶“Ɔmmɔ kama ɔdubuti nwuna kɔtɔ bukpi akpala ani ndi koƒonu kɔgyani kɔni nse sɛɛn na kútasɔ kesii kadi ɔ́siku nwuna baƒonu akɔ uboku ɔkpane na uti ute Unwoti. Na ɔlɛka kɔƒɔ kuye kɔni udu na ɔkpane ɔ́tina.

⁷Na ulu ɔmɛni lɛlɔ na ɔkpane ɔdubɔsia na ɔbla akpala ute Unwoti na udie kɔtu bɔni na ukyuli ɔmmɔ lɛlɔ na liti lɛkyiɛ-nwu.”

⁸Ɔmmɔ kama ni, Unwoti ɔ́sɔ ɔ́su Mose ɔnini,

⁹“Bo Aaron ku nwuna bebi bananabi ɔda anini, ‘Ulu ɔni na ndubo-ma bɔtina mɛni ndi ulu ɔni lɛlɔ na badubo bɔsia butaabla akpala bɔkyula ƒui ɔdi ɔmmɔ. Na muubó-ma ɔda geen na ɔmɛni lɛlɔ, ka akpala ani na baakyula mmɔ ni, ɔlɛka ataasia lɛkpabi lɛmmɔ lɛlɔ usien umodi útálɛ ɔtanta. Na útalɛ ka ogya ɔmmɔ uni.

¹⁰Ɔkpane ɔmmɔ ɔdubɔka lɛwuku bɔkya use kalɔ asa na ɔkya awu kpɛtɛ kpɛtɛ bonwu gyɔlɔɔ ɔsia-nwu katɔ. Na udie ntɔ bɔni na lɛkpabi lɛmmɔ kalɔ ɔni na ogya ɔmmɔ ɔ́kyula akpala ammɔ ɔ́wɔlɔ uboku asi ammɔ kɔmadɔ.

¹¹Ɔmmɔ kama na ɔda lɛwu lɛni na ɔkya mmɔ udie na uti lɛwu lɛbambadi ɔkya asa na uti ntɔ bɔmmɔ ɔlɛku mmɔ utéwiakun na kesii kani bédie bése sɛsɛɛ na úsie bana keliekɔ kani na beli mmɔ kama.

¹²Na ogya ɔni na lɛkpabi lɛmmɔ lɛlɔ ni, ɔlɛka banu ka ɔkya mmɔ uwi mmɔ uwi biala na uteni. Mmomu bakpane bammɔ banu ka bákya ekyweni ogya ɔmmɔ kemmo ɔtanta biala. Na akpala ani na bekyuli beeboku ni, ɔkpane ɔmmɔ ɔnu ka bákyula-nya ƒui ku lɛmwi lɛni bédie na unwi bɔbla akpala ammɔ kemmo.

¹³Banu ka ogya ɔkya mmɔ uwi ndi uwi na uteni.

¹⁴“ ‘Ɔmɛni ndi mina ɔda bubo bɔni nkɛnku edula ebi akpala lɛlɔ. Aaron bebi bananabi badubuti etela ammɔ beboku Unwoti anumi na lɛkpabi anumi.

¹⁵Na ɔkpane ɔmmɔ ɔdubɔma akpala etela ammɔ ɔlaaƒɔ ɔni muukeye lɛkɔkɔ linwi ku nwuna lɛlɔ nnɔ ku oloƒui ɔna ƒui ɔni nsia etela ammɔ lɛlɔ. Na ɔdubuti ɔkyula na lɛkpabi lɛmmɔ lɛlɔ aani lɛkpabi lɛlɔ enyimo likposela adila bɔkyula ƒui akpala na uyɔ ɔmmɔ ɔnyi ƒɛƒɛɛ ɔyɔ-mi kaƒɔ.

¹⁶Ɔƒɛni ɔlaaƒɔ ɔni mebu ni, Aaron ku nwuna bebi ɔdi ɔdidi na ɔdi, nsu bɔnyii butakya-nwu kemmo asa badi adila ammɔ na kesii kani na bédie bése sɛsɛɛ na Unwoti Adi Kevo kaduli kemmo mmɔ.

¹⁷Utalɛ ka beƒi-nwu na bɔnyii bɔkya-nwu kemmo. Ami néti lɛla lɛmmɔ líte-ma aani bana kadikɔ ɔ́siku akpala ani na béti bákyula béte-mi kemmo. Na ese kedee aani likpidi bɔkyiɛ ku kɔtɔ bukpi akpala.

¹⁸Ɔnana biala na Aaron bebi akɔ ɔkana na ɔdi adila ammɔ. Ɔsika adi bana kadikɔ na ala ani na bákyula béte-mi kemmo úsie bina kaba kaba kemmo bekyuli ƒui akɔ. Na lɛla biala nétuku ala ammɔ adubɔbla kedee. Na ukyuli biala metuku ala ammɔ lɛnɔ ɔ́bla kedee.’ ”

¹⁹Ɔmmɔ kama ni, Unwoti ɔsɔ ɔ́su Mose ɔnini,

²⁰“Akpala ani ndubo-ɔ bɔtina mɛni ndi akpala ani na Aaron ku nwuna bebi bananabi badubuti beboku-mi na limeyi lɛni lɛlɔ na badubuwi bana ɔdi nnɔmii lili na bese-nwu likpo. Ɔlaaƒɔ sɛɛn ɔni mabla aani antabi lɛkyami linwi na badubuti beboku aani limeyi ndi limeyi etela ani beele kakɛ ɔtanta ku kakɛ useyi uwi.

²¹Badubɔnwu ɔlaaƒɔ ɔmmɔ na beƒi-nwu na lɛbuala kalɛkɛ lɛlɔ na basala-nwu ku nnɔ. Si bátu-nwu bénwini na ɔ́bi kaduɛ ni, badubuti beboku na bedie-nwu unwi unwi kalɛ na béƒi-nwu mmɔ, na báƒɛ-nwu kemmo kɔkɛ kɔkɛ bete-mi aani edula ebi akpala na ɔnyi ƒɛƒɛɛ ɔmmɔ ɔyɔ-mi kaƒɔ.

²²Ɔƒɛni ɔkpane unengudi ɔni bése likpo mmɔ lɛnɔ ɔdubunye nwuna kenyekɔ na nwuna bebi bammɔ akɔ. Na anwu uti akpala ammɔ ɔkyula ƒui ute-mi na ulu ɔni lɛlɔ na lɛ́lɛ ugyii líse lɛlɔ.

²³Anwuɔsu ɔkpane edula ebi etela udu biala ani na úti úboku ni, ɔdubɔkyula ana ƒui na batadi ɔdi.”

²⁴Amu na Unwoti ɔ́su Mose ɔnini,

²⁵“Tásu Aaron ku nwuna bebi bananabi anini, ‘Ulu ɔni na ndubo-ma bɔtina mɛni lɛlɔ na badubɔsia babla ekpidi bɔkyiɛ akpala. Kesii kani na bádu ebuo ɔni badubuti babla bɔkyula ɔdi ni, mmɔ kani na badubɔdu ekpidi bɔkyiɛ akpala ebuo ɔmmɔ lɛnɔ na Unwoti anumi, ɔsika lɛla lɛni nse kedee na lɛdi.

²⁶Na ɔkpane ɔni nábla ekpidi bɔkyiɛ akpala ammɔ ubo nwuna kadikɔ. Na kadikɔ kammɔ ni, Unwoti Adi Kevo kaduli kesii kani nse kedee mmɔ na badubɔdi adila ammɔ.

²⁷Na ukyuli biala ɔni métuku lɛna lɛmmɔ ni, ɔ́bla kedee. Na si ebuo ɔmmɔ ubugya úwi awu ɔdi lɛlɔ ni, ɔdi ka baƒɔ awu ɔmmɔ na kesii kani nse kedee mmɔ.

²⁸Na avɔbui ani ƒui kemmo na béƒulo lɛna lɛmmɔ ni, ɔdi ka bebo-nya babwɛ. Na si abuala ebui kemmo na béƒulo-ni ni, ɔlɛka bekuo-nya kemmo baƒɔ kaduɛ.

²⁹Ɔnanabi biala na bakpane bammɔ akɔ ɔkana na ɔkun lɛna lɛmmɔ ƒaa, ɔsika lise kedee ƒui.

³⁰Nsu likpidi bɔkyiɛ ebuo biala na béti-nwu ubugya béduoku Unwoti Adi Kevo kesii kani nse kedee mmɔ ka babla akpala na bedie kɔtu bɔni na ukyuli ɔmmɔ lɛlɔ ni, útalɛ ka ɔdi biala utuku-nwu kenye, mmomu badubɔkyula-nwu ƒui.’ ”