Read Lelemi Lewiƒuɔ Ɔda Bubo 7 Bible Online

Lewiƒuɔ Ɔda Bubo 7 - Lelemi bible

Lewiƒuɔ Ɔda Bubo 7

¹“ ‘Ɔda bubo bɔmɛni ndanku kɔtɔ bukpi akpala ani ndi lɛla lɛni nse kedee ƒui.

²Na kesii kani na bádu bɔkyula ƒui akpala ebuo ni, mmɔ kani na ɔlɛka badu kɔtɔ bukpi akpala ebuo ɔmɛni lɛnɔ na beti nwuna ubugya bakuna bewi lɛkpabi lɛmmɔ lɛlɔ bamana.

³Na badubuti nwuna lɛmwi ƒui bete-mi. Lɛmwi lɛni ndanku ɔka ku lɛmwi lɛni mma kaƒɔ ala ammɔ ƒui lɛlɔ.

⁴Akabi anyɔ ammɔ lɛmwi lɛni mma-nwu lɛlɔ ku kasɔma lɛmwi lɛmmɔ ku akɔ ammɔ kenye kammɔ ƒui ɔlɛka uti-nwu ubunku akabi ammɔ.

⁵Na ɔkpane ɔmmɔ ɔdubuti-nya ɔsia ogya lɛlɔ na lɛkpabi lɛmmɔ lɛlɔ. Na ndubɔƒɔ-nwu aani kɔtɔ bukpi akpala bɔkyula.

⁶Ɔnana biala na bakpane bammɔ akɔ ɔdubɔkana na ɔkun lɛna lɛmmɔ lɛdi na Unwoti Adi Kevo kammɔ kaduli kesii kani na bédie bése sɛsɛɛ na use kedee ƒui mmɔ.

⁷“ ‘Kɔtɔ bukpi akpala ese aani likpidi lili buvele akpala na ɔda bubo bunwi kani ndanku ɔnanyɔ. Na ɔkpane ɔni névele ka bedie kɔtu bɔni na bekyuli bammɔ lɛlɔ ni, anwu mbo lɛna lɛmmɔ.

⁸Na ɔkpane ɔni nábla ebuo bɔdu taakyula akpala ute-mi ni, ebuo ɔku ɔmmɔ ɔdi anwu ɔdi.

⁹Ɔƒɛni edula ebi etela biala na béƒi na lɛyu kemmo ku lɛla biala na banwa na lɛbuala libui kemmo iye lɛbuala kalɛkɛ lɛlɔ ni, ɔkpane ɔni nábla akpala ammɔ ɔdi na ɔdi.

¹⁰Na lɛkpabi lɛlɔ edula ebi akpala biala na básala ku nnɔ iye ukpludi na ɔdi ni, ɔdi Aaron bebi bananabi ƒui ɔdi likeke.

¹¹“ ‘Ɔƒɛni mɔɔwia ka enu ɔda bubo bɔni lɛlɔ na badubɔsia na babla unwi bɔbla akpala ani na badubuti beboku Unwoti anumi.

¹²“ ‘Si ukyuli ɔmmɔ ɔnii ɔɔbla akpala ammɔ na adanku linugya ni, na ɔlɛka ubunku ɔlaaƒɔ ɔni na bánwu na béƒi-nwu aani bodobodo na bɔnyii buuubo-nwu kemmo, na ɔsala-nwu ku nnɔ, ku bodobodo uƒidi udu bamba ɔni nse bɛbɛɛbɛ kunu kunu na bésusu nnɔ nwuna lɛlɔ. Na edula ebi ɔlaaƒɔ ɔni na bánwu béƒi mɛni ni, banu ka bábaka-nwu kaduɛ ku ɔlaaƒɔ ɔni nse sɛɛn na básala-nwu ku nnɔ.

¹³Na si úti unwi bɔbla akpala ammɔ aani enugya ni, na ɔ́lɛka uti bodobodo ɔni kemmo na bɔnyii bɔkya ubunku edula ebi akpala ani bánwu na bɔnyii buuubo-nwu kemmo mmɔ.

¹⁴Na ala eƒidi amɛni akɔ ni, ɔdubudie ɔdi biala unwi unwi aani lɛla lɛni na anwu lɛnɔ úti uute Unwoti. Na ala ammɔ adubunwini ɔkpane ɔdi anwu ɔni néti unwi bɔbla akpala ammɔ ubugya ɔ́kuna úwi lɛkpabi lɛmmɔ lɛlɔ.

¹⁵Ɔƒɛni ebuo ɔni na úti úboku úbo ɔɔbla unwi bɔbla enugya akpala ammɔ ni, limeyi lɛni na bábla akpala ammɔ lɛlɔ kani na ɔlɛka bakun lɛna lɛmmɔ. Na ukyuli ɔmmɔ ulada-ni ulése na kadi kegye kewi-nwu lɛlɔ.

¹⁶“ ‘Nsu is akpala ammɔ adi lili budie iye kaƒɔ ƒaa akpala ni, bakana bakun lɛna lɛmmɔ na limeyi lɛmmɔ. Na si lítasa ni, bakana bakun-ni kadi kégye.

¹⁷Na si ebuo ɔni na béti bábla akpala ammɔ lɛna lɛdi lɛsɔ líbu limeyi lɛtɛdi anwu ni, na ɔlɛka bakyula-ni.

¹⁸Anwuɔsu si unwi bɔbla akpala ebuo ɔmmɔ lɛna lɛdi líbu limeyi lɛtɛdi na ɔdi ɔ́kun-ni ni, lɛɛɛdubo ukyuli ɔmmɔ bɔƒɔ ulu ɔdi lɛlɔ. Na akpala ammɔ aaadubo kɔsia kɔdi bɔlɛ bute ukyuli ɔmmɔ mmomu ɔdubɔkya-mi kɔnyi geen na ndubɔdu-nwu kɔtɔ geen.

¹⁹“ ‘Na lɛna biala nétuku lɛla lɛni muusé lɛlɔ ni, lɛsɔ lɛɛɛdia ka ɔdi ɔkun-ni. Mmomu ɔlɛka bakyula-ni kede kede. Na si uwi ɔni na lɛ́mu lise sɛɛn na lítetuku lɛla lɛni muusé lɛlɔ ni, ukyuli ɔni na use sɛɛn kani ndubɔkana na ɔkun-ni.

²⁰Nsu ukyuli ɔni na uuuse sɛɛn na wakun unwi bɔbla akpala lɛna lɛni nse kedee ka béti bákpa béte Unwoti ni, ndubukulo kɔna kɔni nkya anwu ku nwuna badi ntɛ.

²¹Si ukyuli ɔdi útuku lɛla lɛni muusé lɛlɔ na ɔdi ukyuli ɔni na lɛla lɛdi lɛda o-o, ebuo na ɔdi o-o, iye lɛla bamba biala na muusé lɛlɔ na nkisi o-o, asa na ɔ́kun unwi bɔbla lɛna lɛni na béti bákpa béte-mi ni, ɔlɛka bekulo kɔna biala nkya anwu ku nwuna badi ntɛ.’ ”

²²Ɔmmɔ kama Unwoti ɔ́su Mose ɔnini,

²³“Tásu Israel kadi bekyuli anini, ‘Ɔdi utakun ɔmantɛ akɔ lɛmwi iye koƒonu iye ese lɛmwi.

²⁴Na ebuo ɔni na úkpi iye ebuo ukpidi ɔdi néƒie-nwu na ɔ́duli-nwu ɔ́va ni, bakana beti lɛmwi babla lɛla bamba biala, nsu betetuku-nwu kenye anwu lo.

²⁵Na ebuo ɔni na beti básia lɛkpabi lɛlɔ béte-mi ni, ukyuli ɔni makun-nwu lɛmwi lɛmmɔ ndubukulo kɔna kɔni nkya anwu ku anwu badi ntɛ.

²⁶Na kesi kesii na bilie ni, útalɛ ka bɛdi ubugya ɔdi. Aasɛ ubugya na ɔdi o-o, ebuo bamba ɔdi ubugya na ɔdi o-o ni, ɔdi utadi.

²⁷Ukyuli biala madi ubugya ni, ndubukulo ukyuli ɔmmɔ kɔna kɔni nkya anwu ku anwu badi ntɛ.’ ”

²⁸Amu na Unwoti ɔ́su Mose ɔnini,

²⁹“Tasu Israel kadi bekyuli anini, ‘Si ɔdi úti unwi bɔbla akpala ɔduboku Unwoti ni, anwu ɔlati uti nwuna unwi bɔbla akpala uboku ubete Unwoti.

³⁰Anwu ɔlati nwuna enu kemmo na ɔdubɔda-nya uboku na babla akpala ammɔ. Na lɛmwi ku ebuo ɔmmɔ kayi ɔvu ni, ɔdubuti uboku na bakɔliku-nwu katɔ batina-mi bebo-ni kudu.

³¹Na ɔkpane ɔdubɔkyula lɛmwi lɛmmɔ, nsu kayi ɔvu ɔmmɔ ni, ɔdi Aaron ku nwuna bebi bananabi ɔdi.

³²Na kɔdianu libuli lɛnɔ ni, ɔdubuti ute ɔkpane aani nwuna unwi bɔbla akpala kebunku kani na úti uute.

³³Na Aaron bebi akɔ ɔkpane ɔni néti ubugya ɔmmɔ ku unwi bɔbla akpala ammɔ ku lɛmwi úte-mi ni, kɔdianu libuli lɛmmɔ lɛdi nwuna lɛdi aani nwuna kadikɔ.

³⁴Ɔsika ebuo kayi ɔvu ɔni na bákɔliku katɔ bátina-mi bébo-ni kudu mmɔ ku nwuna kɔdianu libuli lɛni na Israel kadi bekyuli badubo buteete aani bana kebunku ɔsiku bana unwi bɔbla akpala kemmo ni, líti muute ɔkpane Aaron ku nwuna bebi bananabi aani bana kadikɔ úsela uwi ƒui ɔ́siku Israel kadi bekyuli ƒui kudɔ.’ ”

³⁵Ɔmɛni ndi lɛla lɛni na bálɛ ugyii bése sɛsɛɛ béte Aaron ku nwuna bebi ɔ́siku bɔkyula ƒui akpala ani na bábla béte-mi kemmo ɔ́si limeyi lɛni na lɛ́ƒuna-ma ka bataabla ɔkpane kabla teete-mi.

³⁶Ala amɛni na líbo ɔda ka Israel kadi bekyuli beti bete-ma ɔ́si limeyi lɛni na béwi-ma nnɔmii lili bése-ma likpo. Na ɔmmɔ ɔdubɔbla bana kadikɔ úti úsela kaba kaba kemmo ƒui.

³⁷Ɔda ɔmɛni na Unwoti úbo ɔkɛnku ebuo bɔdu taakyula akpala ku edula ebi akpala ku likpidi lili buvele akpala ku kɔtɔ bukpi akpala ku ɔkpane buse akpala ku unwi bɔbla akpala ƒui lɛlɔ.

³⁸Ala amɛni lɛlɔ ɔda na Unwoti úbo Mose na Sinai kɔbi lɛlɔ na limeyi lɛni lɛlɔ na Unwoti úbo Israel kadi bekyuli ɔda ka beteeti akpala teeboku-nwu na Sinai ketele kemmo mmɔ.